निर्मलाका लागि न्याय माग्दै जाजरकोटमा विप्लवको प्रदर्शन

भीमबहादुर सिंह

जाजरकोट — नेत्र विक्रम चन्द ‘विप्लव’ नेतृत्वको नेपाल कम्युनिष्ट पार्टीले निर्मला पन्तको न्यायका लागि जाजरकोटमा प्रदर्शन गरेको छ । विप्लव समूहको अगुवाईमा आईतवार खलंगामा निर्मला पन्तको न्यायका लागि भन्दै प्रदर्शन गरेको हो ।

प्रदर्शनमा विभिन्न विद्यालय सयौं विद्यार्थीले सहभागिता जनाएका थिए । खलंगाको तल्लो थाप्लेबाट सुरु भएको प्रदर्शन ठाटीबजार–गैरीखाली, जिल्ला प्रशासन हुँदै ठाटी बजारमा आएर कोणसभामा परिणत भएको थियो ।

कोण सभामा सो पार्टीका भेरी ब्यूरो सदस्य तथा डोल्पा जिल्ला ईन्चार्ज वीरबहादुर खड्काले कञ्चनपुरकी निर्मला पन्तलाई बलात्कारपछि हत्या गरेको ४ महिना बितिसक्दा पनि दोषी पत्ता लगाउन नसकेको भन्दै सरकारप्रति आक्रोश व्यक्त गरे ।

पन्तको हत्यारा पत्ता लगाउन नसक्ने अहिलेको सरकारले नयाँ युगको सुरुवात भनेर जताततै पोष्टर टाँस्न लाज मान्नुपर्ने बताए ।

जनतामा भ्रम सृजना गरेर अहिलेको सरकारले आफ्नो लुटको स्वर्ग बचाई राखेको उनले बताए । जनतामा भ्रम सृजना गरिरहेको सत्ता र सरकारका विकल्पमा नेपाल कम्युनिष्ट पार्टीले जनताको वैकल्पिक सत्ताका रुपमा देशव्यापी रुपमा जनसरकार गठन गरेको ईन्चार्ज खड्काले बताए ।

निर्मला पन्तको दोषीलाई अहिलेको सरकारले पत्ता नलगाए पनि आफ्नो पार्टीले पत्ता लगाई छाड्ने उनले दाबी गरे ।

प्रकाशित : मंसिर १६, २०७५ १८:२१
प्रतिक्रिया
पठाउनुहोस्

न्याय माग्दै सडकमै सुते महिला

प्रकाश बराल

बागलुङ — निर्मला पन्तको बलात्कारपछि गरिएको हत्यामा न्याय खोज्दै यहाँका महिलाहरु सडकमै सुतेका छन् । नेपाल महिला संघको अगुवाईमा सदरमुकामस्थित बाघचोकमा भेला भएका झण्डै दुई सय महिला सडकमै सुतेका हुन् ।

‘एउटी अबोध बालिकाले न्याय नपाएपछि दवावस्वरुप सडकमै सुतेका हौं’ संघकी अध्यक्ष शकुन्तला शर्माले भनिन्, ‘दैनिक भइरहेका बलात्कारका दोषीलाई राज्य संयन्त्रले संस्थागत रुपमै उम्काउने प्रयास गरिरहेको छ।’ यस्ता घटनामा राज्य संयन्त्र चुप लाग्नुले दुई तिहाई मतको सरकारको बेइज्जत भएको उनको टिप्पणी थियो।

चिसो भूइँमा झण्डै एकघण्टा सुतेका महिलाले निर्मला पन्तको फोटोसहितको व्यानर छातिमा टाँसेका थिए। सबै महिलाले टाउकोमा कालोपट्टीसमेत बाँधेर विरोध गरेका थिए। ‘सरकार भेटियो, न्याय भेटिएन’ भन्ने नारा लेखिएको व्यानर र पोस्टर लिएर उनीहरुले दोषीलाई पक्राउ गर्न माग गरेका थिए।

सडकमै सुत्ने कार्यक्रममा ७० वर्षीयादेखि १५ वर्षीया किशोरीहरु पुगेका थिए। उनीहरुको मागको समर्थनमा कांग्रेससहितका अन्य राजनीतिक दलका नेता, नेपाल ट्रेड युनियन कांग्रेसका पदाधिकारी, कार्यकर्ता, अधिकारकर्मी तथा नेविसंघका कार्यकर्ता सहभागी थिए। उनीहरुको विरोधले सडकको आवागमन अवरुद्ध भएको थियो।

यो पनि पढ्नुहोस्

प्रकाशित : मंसिर १६, २०७५ १७:५७
पूरा पढ्नुहोस्
प्रतिक्रिया
पठाउनुहोस्