चौरमै पहिरोपीडित

कान्तिपुर संवाददाता

धनगढी — गत शुक्रबार राति घर माथिबाट आएको पहिरोमा पुरिएर बूढीगंगा–१ कुँडीकी ४५ वर्षीया कला परीको च्यापिएर मृत्यु भयो । पति नन्दे गम्भीर घाइते छन् । पहिरोको जोखिमले गाउँका १ सय ३५ परिवार विस्थापित भएका छन् ।

वडासचिव प्रेमराज जैशीले पहिरोमा ३ घर बगेको बताए । सुरेन्द्र साउद, तुली साउद र नन्दे परीको घर बगेको छ । विस्थापित परिवार ६ दिनसम्म स्थानीय कुँडी आधारभूत विद्यालयको चौरमा बसेका थिए । अहिले आटीचौर सुर्काबजारको खुला चौरमा सरेको सचिव जैशीले जानकारी दिए ।

विस्थापित परिवारको बिचल्ली भएको वडाध्यक्ष राजेश सिंहले बताए । ‘६ दिनसम्म विद्यालयको चौरमा रात बिताए । ओत लाग्ने ठाउँ नहुँदा बालबालिका र महिलाको झन् धेरै बिचल्ली छ,’ उनले भने ।

Yamaha

विस्थापितमध्ये १ सय १४ परिवार दलित समुदायका हुन् । बाढी र पहिराले खानेपानीका मुहानमा क्षति पुर्‍याएपछि विस्थापितले ६ दिनसम्म शुद्ध पिउने पानीसमेत पाएनन् । खोलाको पानी खाएर प्यास मेटेको आइते परीले बताए ।

तरकारीको टनेलमा प्रयोग भएको एउटा त्रिपालमा ५ परिवार बस्ने गरेको अर्का स्थानीय सुरेन्द्र साउदले बताए । ‘पहिरोले घर पूर्णरूपमा पुरेको छ, खाद्यान्न छैन, एउटै त्रिपालमा ५ जना परिवारका २३ जना बस्ने गरेका छौं,’ उनले भने ।

रेडक्रसले विस्थापित परिवारका लागि २० वटा त्रिपाल दिएको छ । ३ परिवारका लागि खाना सेट उपलब्ध गराएको रेडक्रसका जिल्ला सभापति दिलबहादुर बुढाले बताए । अन्य कुनै पनि निकायबाट राहत नपाएको गुनासो विस्थापितको छ ।

बूढीगंगाका नगरप्रमुख दीपकविक्रम शाहले धेरै परिवार विस्थापित भएकाले राहत व्यवस्थापनमा असहज भएको बताए । राहतका लागि विभिन्न निकायसँग पहल गरिरहेको उनको भनाइ छ ।

मृतक कला परीको परिवारलाई भने किरिया खर्चबापत जिल्ला प्रशासनले एक लाख रुपैयाँ उपलब्ध गराएको प्रमुख जिल्ला अधिकारी चेतराज बरालले बताए ।

उनले प्रदेशस्थित आन्तरिक मामिला तथा कानुन मन्त्रालयबाट त्रिपाललगायतका अत्यावश्यक सामग्री जिल्लामा आइसकेको र आवश्यकताअनुसार पीडित परिवारलाई वितरण गरिने बताए ।

‘विस्थापित परिवार भोकभोकै बस्नुपर्ने अवस्था छैन, अन्य समस्याबारे हामी नियमित अनुगमन गरिरहेका छौं,’ उनले भने ।

Esewa Pasal

प्रकाशित : भाद्र ९, २०७५ १०:३०
ADVERTISEMENT
प्रतिक्रिया
पठाउनुहोस्

असारे विकास रोक्न भदौमै काम

भदौमै योजना संचालनका लागि वडामार्फत उपभोक्ता समिति गठन गरी धमाधम काम भइरहेको छ
तुलाराम पाण्डे

कालिकोट — पलाता गाउँपालिकाले आर्थिक वर्षको अन्तिममा हुने असारे विकास रोक्न भदौ पहिलो सातादेखि नै काम सुरु गरेको छ ।

कालिकोटको पलाता–९ थिर्पुस्थित सरस्वती माविको छात्रामैत्री शौचालय निर्माणका लागि ढुंगा बोक्दै स्थानीय महिला । तस्बिर : तुलाराम

वैशाख जेठमा सझौता गर्ने र असारको झरीमा हतारमा काम गर्दा कामको गुणस्तर पनि नहुने र अनियमितताको सम्भावना हुने भएकाले आर्थिक वर्षको सुरुदेखि नै योजना सुरु गरिएको हो ।

पलाता कालिकोटको सबैभन्दा विकट र अभावग्रसत क्षेत्रका रूपमा चिनिन्छ । विगतमा असारे विकासले कामको गुणस्तर नभएको, बजेट मात्र सकिएको, काम गर्ने स्थानीयलाई पनि खेतीपातीको काम गर्ने बेला विकास निर्माणको काम गर्नुपर्दा समस्या हुने गरेको थियो ।

भदौ पहिलो सातादेखि योजनाको सम्झौता गरेर काम सुरु गरेको गाउँपालिकाका प्रमुख प्रशासकीय अधिकृत रामप्रसाद कुस्माले बताए । ‘वर्षको सुरुमै काम गरेपछि समयको पनि चाप हुँदैन,’ उनले भने, ‘उपभोक्तालाई जवाफदेही बनाउन पनि सहज हुन्छ ।’ उनका अनुसार अनुगमनका लागि पनि पर्याप्त समय हुने भएकाले कामको गुणस्तरमा कम्प्रमाइज गर्नुपर्ने अवस्था रहँदैन ।

गाउँपालिकाले वार्षिक कार्ययोजना बनाएर भदौमै योजना सञ्चालनका लागि वडामार्फत उपभोक्ता समिति गठन गरेर अधिकांश योजनाको सम्झौता भएको जनाएको छ ।

वडा तथा गाउँसभा हुँदै योजना तर्जुमा प्रक्रियाबाट छनोट भएका आयोजनाको इस्टिमेट गरेर काम थालिएको नायब सुब्बा राजबहादुर बमले बताए । ‘पहिले जिविस हुने बेला जहिले पनि जेठमा सम्झौता गरेर असारमा काम सक्नुपथ्र्यो,’ बमले भने ‘योजना झारा टार्ने खालका मात्र हुन्थे ।’

गाउँपालिकाले यस वर्षदेखि एक सय ५० जना युवाको सहभागितामा विकास निर्माण कार्यदल गठन गरेको छ । मासिक २४ हजार रकम तलब दिने गरी कार्यविधि पारित गरेर युवा परिचालन गरिएको जनप्रतिनिधिको भनाइ छ ।

युवालाई काम दिन पनि १२ महिना निर्माणको काम गरिने गाउँपालिका अध्यक्ष लक्ष्मणबहादुर बमले बताए । ‘हतार हतारमा काम गर्दा गतिलो हुँदैन,’ अध्यक्ष बमले भने ‘असारे विकासको बेतिथि रोक्न समयमै काम थालनी गरियो ।’ ६ महिनाभित्र काम सम्क्ने गरी उपभोक्ता समितिसँग सम्झौता गरिएको छ । सम्झौता नभएका योजनाका लागि पनि ९ वटै वडा कार्यालयलाई पहल गर्न गाउँपािलकाले पत्राचार गरेको छ । समयमै विकास निर्माणका प्रक्रिया अघि बढाउँदा काम नगरेर भनसुनमा योजना फरफारक गर्न दबाब दिनेको मनोबल घट्ने, गुणस्तरका संरचना बन्ने अध्यक्ष बमले जानकारी दिए ।

पलातामा चालु आर्थिक वर्षमा सञ्चालन हुने २० भन्दा बढी योजनाको सम्झौता भइसकेको छ । असोज मसान्तसम्म एक सय बढी योजनाको सझौता गरेर काम थालिनेछ । अहिले खानेपानी, साना सिँचाइ, विद्युत्, सडक, विद्यालय भवनलगायत पूर्वाधारको काम सुरु भएका छन् । पलातामा यस वर्ष ५० हजारदेखि दुई करोडसम्मका सय बढी योजना छन् ।

तीमध्ये सबैभन्दा बढी वन तथा खानेपानी निर्माण गर्ने टुक्रे योजना छन् । प्रदेश सरकारअन्तर्गतका कार्यक्रममा १३ योजनाका लागि १४ करोड रकम छ । प्रदेश र गाउँपालिका गरी ५ करोड बढी रकम सडक निर्माणमा खर्च गरिनेछ । पलाताले यस वर्ष ४१ करोड रुपैयाँ विनियोजन गरेको छ । गत वर्षको पलाता गाउँपालिकाले सबै क्षेत्रको कुल २३ करोड बजेट अनुमोदन गरेको थियो ।

प्रकाशित : भाद्र ९, २०७५ १०:२९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT