किशोरी हत्या प्रकरण: सीआईबीको अर्को टोली महेन्द्रनगरमा

बम दिदीबहिनीको बयान लिइँदै
भवानी भट्ट

कञ्चनपुर — भीमदत्त नगरपालिका २ उल्टाखामकी १३ वर्षीया निर्मला पन्तको बलात्कारपछि हत्या घटना अनुसन्धानका लागि दोस्रोपटक प्रहरीको केन्द्रीय अनुसन्धान ब्युरो (सीआईबी) टोली महेन्द्रनगर आएको छ ।

स्रोतका अनुसार एसएसपी ठाकुरप्रसाद ज्ञवाली नेतृत्व टोली आइतबार आइपुगेको हो । यसबारे प्रहरीले आधिकारिक जानकारी भने दिएको छैन ।

यसअघि डीएसपी अंगुर जीसी नेतृत्व टोलीले गरेको अनुसन्धान शंकास्पद भन्दै फिर्ता पठाइएको थियो । गत साउन ११ गते भीमदत्त नगरपालिका १८ निम्बुखेडामा निर्मलाको शव भेटिएको दोस्रो दिन डीएसपी जीसी नेतृत्वको टोली यहाँ आएको थियो ।

Yamaha

पहिलो टोली फिर्ता भएको डेढ सातापछि अर्को आएको हो । ‘हामीलाई आवश्यक परे प्राविधिक टोली पनि मगाउँछौं, आफ्नो काम गरेर फर्किन्छ,’ जिल्ला प्रहरी कञ्चनपुरका एसपी कुबेर कडायतले भने, ‘अहिले भने घटनाकै अनुसन्धानका लागि कुनै त्यस्तो टोली आएको छैन ।’

उनले आवश्यक परे धनगढी र हेडक्वार्टरबाट समेत विज्ञ मगाएर अनुसन्धान गरिने बताए ।
खासगरी मोबाइल, फेसबुक र अन्य प्राविधिक विषयमा अनुसन्धानका लागि आवश्यक सहयोग माग्ने गरिएको उनले बताए ।

कडायतले घटनाको भने गम्भीर रूपमा अनुसन्धान भइरहेको जानकारी दिए । अनुसन्धानकै क्रममा बम दिदीबहिनीमध्ये वविताको बयान लिइरहेको उनले जनाए । बहिनी रोशनीको भने यसअघि नै बयान भइसकेको छ ।

बिहीबार जिल्ला अदालतमा थुनामा म्याद थप्नुअघि रोशनीले सरकारी वकिल कार्यालयमा बयान दिएकी हुन् । ‘उनीहरूको बयान लिने काम भइरहेको छ,’ एसपीले भने, ‘हामी गम्भीर भएर लागेका छौं । घटनाको २६ औं दिनमा जिल्ला प्रहरीले जीसी नेतृत्व सीआईबी टोलीको सहयोगमा भीमदत्त नगरपालिका १९ बाग्फाँटाका ४१ वर्षीय दिलीप विष्टलाई सार्वजनिक गरेपछि शंका उपशंका आएका थिए ।

त्यसपछि अंगुर जीसी नेतृत्व टोली फिर्ता भयो । प्रहरीले मानसिक अवस्था ठीक नभएका व्यक्तिलाई मुख्य अभियुक्तका रूपमा सार्वजनिक गरेको भन्दै पीडित परिवार तथा स्थानीयले आन्दोलन चर्काएका थिए । आन्दोलनले उग्ररूप लिएपछि प्रदर्शनकारीमाथि प्रहरीले गोली चलाउँदा एक जनाको मृत्यु भएको थियो ।

उक्त घटनापछि तत्कालीन प्रहरी प्रमुख एसपी दिल्ली विष्टलाई केन्द्रमा तान्नुका साथै निलम्बनसमेत गरिएको छ । तत्कालीन प्रमुख जिल्ला अधिकारी कुमारबहादुर खडका, डीएसपी ज्ञानबहादुर सेटी र अनुसन्धान अधिकृत एकिन्द्र खडकालाई पनि केन्द्र तानिएको थियो ।

घटना छानबिनका लागि गृह मन्त्रालयले सहसचिव हरिप्रसाद मैनाली नेतृत्वमा तीनवटै सुरक्षा निकाय प्रतिनिधि र प्रदेश ७ को आन्तरिक मामिला तथा कानुन मन्त्रालयका उपसचिव सदस्य रहेको ५ सदस्यीय उच्चस्तरीय छानबिन टोली महेन्द्रनगर पठाएको छ । उक्त टोलीले पनि आवश्यक अनुसन्धान र सूचना संकलन गरिरहेको जनाएको छ ।

Esewa Pasal

प्रकाशित : भाद्र १८, २०७५ ०९:५३
ADVERTISEMENT
प्रतिक्रिया
पठाउनुहोस्
ADVERTISEMENT

हराउँदै ढिकी–जाँतो

मनोज बडू

दार्चुला — विद्युत र डिजेलबाट चल्ने मिल स्थापना भएपछि परम्परागत ढिकीजाँतो र पानी घट्टको प्रयोग घटेको छ । गाउघरमा आधुनिक प्रविधि भित्रिएपछि कुटानी –पिसानीका परम्परागत साधन हराउँदै गएका हुन् ।

दार्चुलाको दुहु गाउपालिकाको कुकुरे गाडमा परम्परागत रुपमा संचालित पानी घट्ट । तस्बिर : मनोज

अहिले गाउँ–गाउँमा धमाधम आधुनिक विद्युतीय र डिजेलबाट चल्ने मिल स्थापना भइरहेका छन् । प्रविधिले परम्परागत साधनलाई विस्थापित गर्दै लगेको छ । महाकाली –६ की जमुना रैखोलाले आधुनिक उपकरणले धान कुट्ने, तोरी पेल्ने, गहु, मकै पिस्ने परम्परागत मेसिन विस्थापित गरेको बताइन । ‘ढिकी, पानी घट्ट र जाँतोमा पिसेको अनाज बाट पकाइएका परिकार निकै स्वादिला हुन्थे,’ उनले भनिन्, ‘विधुतिय उपकरणले सजिलो त भएको छ । तर स्वाद हरायो ।’

परिवर्तित समय, प्रविधिको विकास र मानिसको कष्ट गर्ने बानी हराउदैं जाँदा परम्परागत प्रविधि लोप हुदैं गएको उनको भनाई छ । परम्परागत प्रविधि लोप हुदैं गएपछि पानी घट्ट, ढिकी र जाँतोमा कुटेको चामल र पिठोसमेत पाइनै छाडेको दुहु –१ का रामसिंह महराले बताए । ‘ढिकीमा कुटेको चामल र पानी घट्टमा पिसेको पीठो नै मीठो लाग्छ,’ उनले भने, ‘ढिकीको चामल, जाँतो र पानी घट्टको पीठोको स्वाद अब कहा पाउनु ? त्यसले स्वास्थ्यलाई पनि फाइदा पुग्थ्यो ।’

कुनैकुनै गाउँमा फाटफुट परम्परागत ढिकी जाँतो देख्न पाइन्छ । खुट्टाले धान कुट्ने ढिकी त भेटिनै छाडेको छ । स्थानीय बासिन्दा छिटो, छरितो र सुखभोगी भएकाले पनि परम्परागत साधन छोडदै गएका हुन । ‘पहिले प्रत्येक घरमा ढिकी र जाँतो हुने गरेपनि हाल भने कहिकतै मात्रै प्रयोगमा ल्याएको भेटिन्छ । यस्ता प्रविधिहरूको आधुनिकिकरण गरी अझै कम लागत र सर्वसुलभताका आधारमा विकास गरे परम्परागत प्रविधिको संरक्षण हुन्थ्यो,’ महराले भने ।

प्रकाशित : भाद्र १८, २०७५ ०९:५०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT