नि:शुल्क रगत
टीकापुर — टीकापुर नगरपालिकाका बासिन्दाले नि:शुल्क रगत पाउन थालेका छन् । रगत निकाल्दा लाग्ने प्रोसेसिङ चार्ज नगरपालिकाले व्यहोरिदिने भएपछि बिरामीले रगत नि:शुल्क पाउन थालेका हुन् ।
नेपाल रेडक्रस सोसाइटी शाखा टीकापुरका सचिव धर्मराज शर्माले टीकापुर नगरपालिकाभित्रका बिरामीलाई आवश्यक रगत जाँचको खर्च रकम नगरपालिकाले व्यहोर्ने रेडक्रससित सम्झौता भएको बताए । उनले भने,’ रगत त पहिले पनि नि:शुल्क नै हो तर एक पिन्ट रगत प्रोसिसिङका लागि करिब ८ सय रुपैयाँ लाग्छ । त्यो रकम नगरपालिकाले दिने भएपछि बिरामीले त्यो रकम तिर्न नपर्ने भएको छ ।
उनका अनुसार अस्पतालमा उपचाररत कतिपय बिरामीले रगत प्रोसेसिङको पनि रकम तिर्न नसक्ने अवस्था हुँदा गाह्रो हुने भएकोले नगरपालिकाको सहयोगमा बिरामीले सहज रगत पाउन सक्नेछन् । रगतको जोहो रेडक्रसले नै गर्नेछ ।
टीकापुर नगरपालिकाबाहेक अन्य ठाउँका बिरामीले भने टीकापुर अस्पतालमा उपचार गराउँदा आवश्यक रगत परीक्षणको शुल्क आफैं व्यहोर्नुपर्ने नेपाल रेडक्रस टीकापुर शाखाले जनाएको छ ।
नगरपालिकाले यसका लागि आर्थिक वर्ष २०७५/०७६ का लागि करिब १० लाख रुपैयाँ बजेट विनियोजन गरेको जनाएको छ । रेडक्रससँगको सहकार्यमा नि:शुल्क रगत उपलब्ध गराउने व्यवस्था मिलाएको नगरपालिकाले जनाएको छ ।
प्रकाशित : कार्तिक १८, २०७५ १०:२९