धनगढी — सर्वाधिक धनराशिको सुदूरपश्चिम खप्तड गोल्डकप फुटबलको उद्घाटन खेलमा शुक्रबार आयोजक सुदूरपश्चिम ११ विजयी भएको छ । धनगढी रंगशालामा आयोजकले च्यासल युथ कलब काठमाडौंलाई टाइब्रेकरमा ५–४ ले हराएको थियो ।
क्षेत्रीय रंगशालामा निर्धारित समयमा दुवै टिमले १–१ गोलको बराबरी खेलेका थिए । प्रतिस्पर्धात्मक खेलको पहिलो हाफ गोलरहित बन्यो । दोस्रो हाफको २६ औं मिनेटमा च्यासलका विदेशी खेलाडी सेगुनले गोल गर्दै टोलीलाई अग्रता दिलाए ।
च्यासलको अग्रता १५ मिनेट पनि टिकेन । दोस्रो हाफको ४० औं मिनेटमा सुदूरपश्चिमका विनोद केसीले गोल गरेर खेललाई रोचक मोडमा ल्याए । त्यसपछि गोल थपिन नसक्दा पेनाल्टी सुटआउटका आधारमा निर्णय भएको हो ।
पेनाल्टी सुटआउटमा च्यासलका सुमन लामाको प्रहार सुदूरपश्चिमका गोलरक्षक जीवन भट्टराईले रोकेपछि आयोजक जितसहित सेमिफाइनल पक्का गर्यो । आयोजकका नियमित गोलकिपर अमानत शेख घाइते भएपछि पहिलो हाफमा जीवनले पोस्ट सम्हालेका थिए । उनी म्यान अफ द म्याच हुँदै १० हजार पुरस्कार जित्न सफल भए ।
खप्तड गोल्डकपको दोस्रो संस्करणमा नेपाल र भुटानका एक गरी १२ टोलीले भाग लिएका छन् । विजेताले ११ लाख ११ हजार १ सय ११, उपविजेताले ५ लाख ५५ हजार ५ सय ५५ रुपैयाँ पुरस्कारा पाउने छन् । शनिबार सहारा युवा क्लब पोखरा र एपीएफ क्लबबीच प्रतिस्पर्धा हुनेछ ।
प्रकाशित : पुस २२, २०७४ ०६:५८