नेपाललाई टिम फाइटमा स्वर्ण
काठमाडौँ — दक्षिण कोरियाको पोहाङमा भएको अन्तर्राष्ट्रिय तेक्वान्दो च्याम्पियनसिपमा नेपाली राष्ट्रिय तेक्वान्दो टोलीले पुरुष टिम फाइटमा स्वर्ण पदक जितेको छ ।
नेपालले फाइनलमा दक्षिण कोरियाको सिहान युनिभर्सिटीलाई ५८–४६ अंकले हराउँदै स्वर्ण जितेको हो । पाँच खेलाडीसम्मिलित नेपाली टिमले सेमिफाइनलमा कोरियाकै टिमलाई ४८–४१ अंकले हराएको थियो ।
टोलीका प्रशिक्षक दीपक विष्टका अनुसार नेपालबाट अनुज पुजारी, ज्ञानेन्द्र हमाल, वीरबहादुर महरा, सागर गुभाजु र भूपेन्द्र श्रेष्ठ सहभागी थिए । शुक्रबारै महिला टिम फाइटमा भने नेपाली टोली रजत पदकमै सीमित भयो । तीन राष्ट्रसम्मिलित टिम फाइटको फाइनलमा नेपाल चीनसँग ५६–४८ अंकले हारेको थियो ।
त्यसअघि नेपालले कोरियालाई हराउँदै फाइनल तय गरेको हो । महिलामा ज्ञानी चुनारा, नीमा गुरुङ, निशा रावल, संगीता बस्याल र अस्मिता खड्काले प्रतिस्पर्धा गरेका थिए ।
एसियाड तयारीलाई दक्षिण कोरियामा रहेको नेपाली टोलीले शुक्रबारदेखि नै छुम्बिक हेल्थ एन्ड साइन्स युनिभर्सिटीमा प्रशिक्षण सुरु गरेको विष्टले जनाए ।
प्रकाशित : असार ३०, २०७५ ०७:४३