अल्ट्रा धावक रोकायालाई ५० हजार सहयोग
काठमाडौँ — बाँसबारीस्थित न्यूरो अस्पतालमा उपचारपछि कोठामा आराम गरिरहेका अल्ट्रा धावक हरिबहादुर रोकायालाई सहयोग गरिएको छ । भक्तपुरको लोकनथलीस्थित रोकायकै कोठामा पुगेर कालिकोटका युवा व्यवसायी तथा पूर्वखेलाडी दिलबहादुर कडायतले मंगलबार ५० हजार आर्थिक सहयोग गरेका छन् ।
जुम्लामा प्रशिक्षार्थीसँगै दौडको तयारीमा रहेका रोकाया असार ३ गते एक्कासी बिरामी परेका थिए । उनका हात खुट्टा चल्न छोडेपछि काठमाडौं ल्याएर बाँसबारीस्थित न्यूरो अस्पतालमा उपचार गरिएको थियो ।
करिब तीन हप्तासम्मको उपचारपछि रोकायालाई डिस्चार्ज गरिएको थियो । रोकायाले आफ्नो स्वास्थ्यप्रति सरकारले बेतास्ता गरेको भन्दै दुखेसो पोखेका थिए ।
धावक रोकाया सामान्य हिँड्डुल गर्न सक्ने भएका छन् । तर, खान र पानीका लागि उनले अरुकै सहयोग लिइरहेका छन् ।
दौडेरै गिनिज बुकमा नाम लेखेर रोकायाले नेपाललाई विश्वमा चिनाएका छन् । २०३९ सालबाट राष्ट्रियस्तरका प्रतियोगितामा सहभागी हुन सुरु गरेका रोकाया ३० पटकसम्म अन्तर्राष्ट्रिय प्रतियोगितामा भाग लिइसकेका छन् । धावक रोकायाले सन् १९८८ मा ४२ किलोमिटर ३ घण्टा ५६ मिनेट १० सेकेण्ड पूरा गरेर विश्व रेकर्ड कायम गरेका थिए । सोही रोकर्डलाई रोकाया आफैले सन् १९९२ मा ३ घण्टा ५० मिनेट २३ सेकेण्डमा पार गरेर आफ्नो तोडेका थिए ।
धावक रोकायाले धेरै अवसरलाई छोडेर जुम्लाबाट खेलाडी उत्पादन गर्ने भनेर स्पोर्ट्स क्लव संचालन गर्दै आएका छन् । ५७ वर्षीय रोकायाले अल्टिच्युड ट्रेनिङ सेन्टर स्थापना गरेका छन् ।
प्रकाशित : श्रावण १, २०७५ १८:५५
