एलिसनको डेब्युमा लिभरपुलको जित
डब्लिन — ब्राजिलियन गोलरक्षक एलिसनले डेब्युमा क्लिन सिट राखेपछि शनिबार लिभरपुलले नेपोलीलाई डब्लिनमा भएको मैत्रीपूर्ण खेलमा ५–० ले पराजित गरेको छ । एलिसन ६ करोड ७० लाख पाउन्डमा इटालियन क्लब एएस रोमाबाट लिभरपुल आएका थिए ।
खेलको सुरुआती १० मिनेटमा जेम्स मिल्नर र जिओर्जिनियो वाइनाल्डमले गोल गरेपछि लिभरपुलले अभिभा रंगशालामा उत्कृष्ट सुरुआत लिएको थियो ।
दोस्रो हाफको सुरुआतमा मिल्नर र नेपोलीका डिफेन्डर मारिओ रुइको टाउको जुधेपछि मिल्नरलाई अस्पताल लगिएको थियो । कार्लो एन्सेलोटीको नेतृत्वमा रहेको इटालियन क्लबविरुद्ध सलाहले तेस्रो गोल थपे ।
ड्यानिएल स्टुरिज र अल्बर्टो मोरेनोले अन्त्यतिर गोल थप्दै लिभरपुलको सहज जित पक्का गरे । लिभरपुलले मंगलबार हुने अन्तिम मैत्रीपूर्ण खेलमा टोरिनोको सामना गर्नेछ ।
प्रकाशित : श्रावण २१, २०७५ ०७:५७प्रतिक्रिया