नेपालको पदक निश्चितजस्तै

प्याराग्लाइडिङतर्फ दोस्रो स्थानमा
ध्रुव तुलाधर

काठमाडौँ — नेपालले १८ औं एसियाली खेलकुदमा पहिलो पदक जित्ने लगभग निश्चित जस्तै भएको छ । इन्डोनेसियामा भइरहेको प्रतियोगितामा प्याराग्लाइडिङको क्रस कन्ट्रीतर्फ नेपालको पुरुष टोली उत्कृष्ट प्रदर्शन गर्दै पदकनजिक पुगेको छ ।

पुरुष क्रसकन्ट्रीको पाँचमध्ये चौथो चरण सकिँदा नेपाल अंक तालिकाको दोस्रो स्थानमा उक्लिएको छ ।


पश्चिम जाभास्थित गुनुङ मास पुन्चकमा मंगलबार चौथो चरण सकिँदा नेपालले २७ सय ९८ अंक स्कोर गरेको छ । समग्रमा भने नेपालको ८ हजार ५ सय ९१ अंक स्कोर छ । नेपालभन्दा ७ सय ६८ अंक बढी स्कोर गरेको जापान शीर्षस्थानमा छ । तेस्रो स्थानको दक्षिण कोरियासँग ८ हजार अंक छ । चौथो स्थानको इन्डोनेसियाभन्दा नेपाल झन्डै १ हजार अंक अगाडि छ ।

Yamaha


नेपालले अब पाँचौं तथा अन्तिम चरणमा बिहीबार खेल्नेछ । १८ औं एसियाडमा अहिलेसम्म पदक जित्न नसकेको नेपालले पाराग्लाइडिङबाट पदक जित्ने सम्भावना बलियो बनेको छ । नेपाली टोलीमा विजय गौतम, विमल अधिकारी, सुशील गुरुङ, युकेश गुरुङ र विमल थापा प्रतिस्पर्धा गर्दै छन् ।


एसियाडमा पाराग्लाइडिङ पहिलोपल्ट समावेश खेल हो । टोलीका व्यवस्थापक योगेश भट्टराईले नेपालले आफ्नो लय कायम राखे कम्तीमा कांस्य पदक पक्का रहेको बताए । ‘आजकै (मंगलबार) प्रदर्शनलाई कायम गर्ने हो भने पदक निश्चित जस्तै छ । मौसम खराब नभएको अवस्थामा सबै योजना अनुसार भयो भने हामीले पदक जित्नेछौं,’ उनले भने ।


एसियाडको इतिहास पल्टाउने हो भने पनि प्याराग्लाइडिङमा पदक आउँदा सुखद संयोग जुर्नेछ । नेपालले हालसम्म तीन खेलबाट (तेक्वान्दो, कराँते र बक्सिङ) एसियाडमा पदक ल्याएको छ । यी तीनै खेलमा नेपालले पहिलोपटक सहभागी हुँदा नै पदक ल्याएको थियो । सन् १९९४ एसियाडमा कराँते पहिलोचोटि समावेश हुँदा सीता राईले कांस्य जितेकी थिइन् । त्यसअघि सन् १९८६ मा दक्षिण कोरियाको सोलमा तेक्वान्दो र बक्सिङ पहिलोचोटि समावेश हुँदा दुवै खेलले ४–४ कांस्य हात पारेका थिए ।


पाराग्लाइडिङ जारी एसियाडमा पदकको सम्भावना भएपछि आयोजकले इन्डोनेसियाले समावेश गरेको खेल हो । एक्युरेसी इभेन्टको पुरुष टिम इभेन्टमा इन्डोनेसियाले स्वर्ण जितिसकेको छ । एक्ययुरेसीकै पुरुष एकलमा पनि इन्डोनेसियाका जाफ्रो मेगावान्टोले स्वर्ण हात पारे । महिलातर्फ एक्युरेसी टिम इभेन्टमा घरेलु टोलीले रजत जित्दा एकलमा स्थानीय खेलाडी रिका विजायन्ती कांस्यमा सीमित भइन् ।


क्रस कन्ट्री टिम इभेन्टमा भने इन्डोनेसियाको पुरुष टोली चौथो र महिला टोली तेस्रो स्थानमा छन् । एक्युरेसी इभेन्टमा नेपालले कुनै पदक हात पारेन । सन् २०१९ मा नेपालमा हुने भनिएको दक्षिण एसियाली खेलकुद (साग) मा पनि प्याराग्लाइडिङ समावेश गरिएको छ ।


क्रसकन्ट्रीकै महिला टिम इभेन्टमा नेपाल छैटौं स्थानमा यथावत् छ । चौथो चरणमा २ सय १६ अंक स्कोर गरेको नेपालले समग्रमा ११ सय ६२ अंक जोडेको छ । शीर्षस्थानको दक्षिण कोरियाको ४ हजार ३ सय ३९ अंक छ । महिला टिम इभेन्टमा नेपालका लागि प्रतिभा भुजेल, त्रिशा बोम्जन र सविता तामाङले प्रतिस्पर्धा गरिरहेका छन् ।

प्रकाशित : भाद्र १३, २०७५ ०९:०८
प्रतिक्रिया
पठाउनुहोस्
ADVERTISEMENT

किशोरी हत्या प्रकरण: विष्टको स्वास्थ्य परीक्षण काठमाडौंमा

स्थानीयको शंकामा परेका बम दिदीबहिनीसँग बुधबारदेखि बयान
कान्तिपुर संवाददाता

कञ्चनपुर — कञ्चनपुरको भीमदत्त नगरपालिका २ उल्टाखामकी १३ वर्षीया निर्मला पन्तको बलात्कारपछि हत्या घटनामा प्रहरीले साताअघि सार्वजनिक गरेको दिलीपसिंह विष्टलाई स्वास्थ्य परीक्षण गर्न मंगलबार काठमाडौं पठाइएको छ ।

हत्या आरोपमा पक्राय गरिएका दीलिपसिंह विष्ट ।

मानसिक अवस्था ठीक नभएका व्यक्तिलाई अभियुक्तका रूपमा सार्वजनिक गरेको भन्दै आन्दोलन चर्केपछि प्रहरीले घटनाको प्रारम्भिक चरणबाट अनुसन्धानसँगै विष्टलाई स्वास्थ्य परीक्षण गर्न पठाएको हो । प्रहरीका अनुसार उनको महाराजगन्जस्थित टिचिङ अस्पताल र पाटनस्थित मानसिक अस्पतालमा परीक्षण गरिनेछ ।

‘पक्राउ परेका व्यक्तिको मानसिक अवस्था ठीक नभएको भन्ने विषयले व्यापकता पाएपछि उनको मानसिक अवस्थाबारे बुझ्न परीक्षण गर्न लागिएको हो,’ जिल्ला प्रहरी कञ्चनपुरका एसपी कुबेर कडायतले भने, ‘यसबाहेक अन्य आवश्यक स्वास्थ्यसम्बन्धी जाँच पनि गरिनेछ ।’ उनलाई धनगढी हुँदै हवाईजहाजबाट काठमाडौं पठाएको हो ।

जिल्ला प्रहरीले गत सोमबार भीमदत्त नगरपालिका १९ बाग्फाँटाका विष्टलाई निर्मलाको बलात्कारपछि हत्याको दोषीका रूपमा सार्वजनिक गरेको थियो । मानसिक रूपले अस्वस्थ र अशक्त तथा घटनाको मुख्य आरोपी भनेर पत्याउनै नसकिने निर्दोष व्यक्तिलाई प्रहरीले पक्राउ गरेर घटना ढाकछोप गरेर वास्तविक अपराधीलाई उम्काउन खोजेको आरोप लगाउँदै पीडित र स्थानीयवासी आन्दोलनमा उत्रिएका थिए । यही कारण साता दिनसम्म महेन्द्रनगर अशान्त हुन पुग्यो । आन्दोलनका क्रममा प्रहरीको गोलीबाट १ किशोरको ज्यानै गयो ।

प्रहरीले घटनामा संलग्न भएको भन्दै स्थानीयले आशंका गरेका बम दिदीबहिनीलाई नियन्त्रणमा लिएर अनुसन्धान सुरु गरेको छ । उनीहरूलाई अदालतबाट ६ दिनको म्याद थपेर आवश्यक सूचना संकलन तथा बयान लिन थालिएको प्रहरीले जनाए । ‘घटनास्थलको अध्ययन तथा शंकास्पद बम परिवारको घरको पनि अध्ययन भइरहेको छ,’ कडायतले भने, ‘अनुसन्धान अधिकृत र सरकारी वकिल सँगै गएर घटनास्थलको अध्ययन गरेका छन् ।’

सरकारी वकिल र अनुसन्धान अधिकृत घटनास्थलमा सँगै जाने चलन विगतमा भए पनि बीचमा रोकिएको थियो । निर्मला घटनामा भने यो अभ्यास गरिएको छ । सर्वत्र चासोको विषय भएकाले पनि यसमा सरकारी वकिललाई पनि अवस्था बुझ्न सहज होस् भनेर यस्तो गरिएको एसपी कडायतले बताए । उनका अनुसार २०४८ अघि यस्तो चलन थियो ।

कडायतले बुधबारदेखि बम दिदीबहिनीसँग बयान लिने जानकारी दिए । ‘अनुसन्धान क्रम अगाडि बढ्दै जाँदा घटनाको केही न केही तथ्य बाहिर आउँछ,’ उनले भने, ‘अहिले अनुसन्धानबारे सबै कुरा सार्वजनिक गर्ने अवस्था भइसकेको छैन, हामी अत्यन्त गम्भीर भएर अनुसन्धानमा छौं, अघि बढ्दै जाँदा केही निष्कर्ष निस्कने आशा गरौं ।’ तत्कालीन एसपी दिल्लीराज विष्टले गराएको अनुसन्धान मिसिल तथा प्रमाणहरूको पनि अध्ययन भइरहेको कडायतले जनाए । ‘हिजोको अनुसन्धान पनि एउटा आधार हो,’ उनले भने, ‘यसबाहेक हामी आन्तरिक रूपमा गर्नुपर्ने प्राविधिक पक्षतर्फ पनि लागिरहेका छौं ।’

यतिबेला निर्मला हत्याकाण्ड जताततै चर्चाको विषय बनेको छ । प्रहरीले अनुसन्धानमा लापरबाही गरेको भन्दै आन्दोलन चर्केपछि गृह मन्त्रालयले तत्कालीन प्रजिअ कुमारबहादुर खड्का, एसपी विष्ट, डीएसपी ज्ञानबहादुर सेठी र अनुसन्धान अधिकृत एकिन्द्र खड्कालाई केन्द्र तानेको छ । विष्टलाई निलम्बन नै गरेको छ ।

नयाँ एसपी, डीएसपीलगायत प्रमुख जिल्ला अधिकारीले अब कसरी अनुसन्धान अघि बढाउँछन् भन्नेमा सबैको चासो छ । बलात्कारपछि हत्या गरिएको घटनामा भएको लापरबाहीप्रति स्थानीय आक्रोशित बनेका हुन् । जिल्ला प्रहरीसँगै गृहले गठन गरेको उच्चस्तरीय छानबिन समिति पनि सरोकारवालासँग भेटघाट र सूचना संकलनमा लागेको छ ।

जनजीवन सामान्य हुँदै
सदरमुकामको जनजीवन सामान्य हुँदै गएपछि स्थानीय प्रशासनले मंगलबारबाट कफ्र्यु अवधि पनि घटाएको छ । मंगलबार बिहान ५ देखि साँझ ८ बजेसम्म कफ्र्यु हटाइएको कञ्चनपुरका सहायक प्रजिअ शंकर विष्टले जानकारी दिए । रातको समय साँझ ८ देखि बुधबार बिहान ४ बजेसम्म कफ्र्यु जारी रहने उनले बताए ।

प्रकाशित : भाद्र १३, २०७५ ०८:३०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT