एसिया कप छनोट: नेपाल बाहिरियो

कान्तिपुर संवाददाता

काठमाडौँ — हङकङसँग लज्जास्पद पराजय भोगेपछि नेपाल एसिया कप छनोटबाट बाहिरिएको छ । सन्दीप लामिछानेको ५ विकेट प्रदर्शनलाई पन्छाउँदै हङकङले मंगलबार नेपालमाथि ३ विकेटको विजय हात पार्‍यो ।

यो विजय हङकङलाई फाइनलमा पुर्‍याउन पर्याप्त बन्यो ।

फाइनल पुग्ने आशालाई जीवितै राख्न नेपालले हङकङमाथि ठूलो अन्तरको विजय हात पार्नुपथ्र्यो । तर निर्णायक जस्तै मानिएको खेलमा नेपालको ब्याटिङ पुन: फितलो रह्यो । टस जितेपछि ब्याटिङ रोजेको वान–डे अन्तर्राष्ट्रिय मान्यता राष्ट्र नेपाल ३७.५ ओभरमा ९५ रनमै अलआउट भयो । हङकङलाई लक्ष्य पछ्याउन सजिलो रहेन । टोलीले ३३ औं ओभरमा लक्ष्य पूरा गर्‍यो ।

Yamaha

हङकङको विजयले फाइनल निश्चित जस्तै थियो । र, भयो पनि त्यस्तै । दिनको अर्को खेलमा यूएईले अपराजित रहेको ओमानलाई १३ रनले पराजित गर्‍यो । पहिला ब्याटिङ गरेको यूएईले ८ विकेट गुमाई २ सय ८ रन बनायो । जवाफमा ओमान ४७.२ ओभरमा १ सय ९५ रनमै खुम्चियो । यूएईको ८ तथा हङकङ र ओमानको ७, ७ अंक भयो । तर हङकङले रन रेटमा ओमानलाई पछाडि पार्‍यो ।

राउन्ड रोबिनमा ६ टोली प्रतिस्पर्धा गरेपछि शीर्ष दुई टोली फाइनलमा खेल्ने प्रावधानअनुरूप बिहीबार हुने फाइनलमा यूएई र हङकङबीच प्रतिस्पर्धा हुनेछ । एसिया कप छनोटको विजेताले एसिया कपमा भारत र पाकिस्तानको समूहमा रहेर प्रतिस्पर्धा गर्नेछ । मलेसियामा भइरहेको एसिया कप छनोटमा नेपालको ४ तथा मलेसिया र सिंगापुरको २–२ अंक रह्यो ।

खेलको पहिलो बलमा वाइड फालेका अफजल तान्विरले त्यसपछिको बलमा सुवास खकुरेललाई बोल्ड गरे । कप्तान पारस खड्का १५, अनिलकुमार शाह १४, ज्ञानेन्द्र मल्ल १२, दीपेन्द्रसिंह ऐरी २, सागर पुन ७, सोमपाल कामी शून्यमा आउट भएपछि नेपालको ब्याटिङ धराशायी हुन पुग्यो । आरिफ शेख र वसन्त रेग्मीले नेपालको ५८–७ को स्कोरलाई ९२ रनसम्म पुर्‍याए ।

त्यही नेपालले ३ रनमा अन्तिम ३ विकेट गुमायो ।

आरिफले नेपालबाट सर्वाधिक १८ र वसन्तले १५ रन बनाए । आरिफसहित सन्दीप र ललित नारायण राजवंशी गरी नेपालको अन्तिम ३ विकेट एहसान खानले लिए । उनले ७.५ ओभर बलिङ गर्दै १ मेडन राखेर १५ रन खर्चेर कुल ४ विकेट लिए । अफजल र एइजाज खानले २–२ तथा एहसान नवाज र नदिम अहमदले १–१ विकेट लिए ।

हङकङको सुरुआत राम्रो थिएन । सन्दीपले तेस्रो ओभरमा जेम्स कार्टरलाई ८ रनमा बोल्ड गरे । बाबर हायतलाई पनि सन्दीपले २ रनमै बोल्ड गरे । निजाकत खान २, किञ्चित शाह ११, एहसान २, एजाज शून्यमा आउट भए पनि ओपनर अंशुमन रथले अर्धशतक बनाउँदै नेपाललाई जिताए । म्यान अफ द म्याच उनले ८२ बलमा ५२ रन बनाउने क्रममा ३ चौका र १ छक्का प्रहार गरे । सन्दीपले १० ओभरमा २ मेडन राख्दै २७ रन खर्चेर ५ विकेट लिए । वसन्त र सागरले १–१ विकेट लिए ।

Esewa Pasal

प्रकाशित : भाद्र २०, २०७५ ०७:४०
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

प्याराग्लाइडिङ टोलीलाई गृहनगरमा स्वागत

बिना थापा

कास्की — १८ औं एसियाली खेलकुद प्रतियोगितामा नेपाललाई पदकविहीन हुनबाट जोगाउने प्याराग्लाइडिङ टोलीलाई मंगलबार पोखरामा भव्य स्वागत गरिएको छ ।

रजत पदक विजेता टिमलाई पोखरा विमानस्थलबाट गाडीमा चढाएर बाजागाजाका साथ नगर परिक्रमा गराइएको हो ।

विमानस्थलबाट मुस्ताङचोक, राष्ट्रबैंकचोक, लेकसाइड, चिप्लेढुंगा, नयाँ बजार र पृथ्वीचोक हुँदै र्‍याली रंगशाला पुगेको थियो । क्षेत्रीय तथा जिल्ला खेलकुद विकास समिति र नेपाल हवाई खेलकुद संस्था (ना) ले आयोजना गरेको कार्यक्रम सफल पार्न पोखरावासीले साथ दिए ।

पोखराका नगर प्रमुख मानबहादुर जिसी र पोखरा उद्योग वाणिज्य संघ अध्यक्ष विश्वशंकर पालिखेसँगै पर्यटक र खेलकुद सम्बद्ध संघसंस्थाका अगुवा खेलाडीको स्वागतका लागि विमानस्थल पुगेका थिए । रंगशालामा आयोजित भव्य समारोहमा खेलकुदमन्त्री जगत विश्वकर्मासँगै विभिन्न संघसंस्थाले टिमका खेलाडी र प्रशिक्षकहरूलाई सम्मान गरे ।

प्याराग्लाइडिङको पुरुष टिम इभेन्टमा विमल अधिकारी, सुशील गुरुङ, युकेश गुरुङ, विजय गौतम र विशाल थापा थिए भने महिलातर्फ त्रिशा श्रेष्ठ, प्रतिभा भुजेल र सविता तामाङ सहभागी थिए । प्रशिक्षक योगेश भट्टराई, सानोबाबु सुनुवार र व्यवस्थापकमा शैलेन्द्र रावत पनि इन्डोनेसिया गएका थिए । ६ वटा इभेन्टमा प्रतिस्पर्धा गरेको नेपाली टोलीले पदक भने पुरुष टिम क्रसकन्ट्रीमा जितेको हो ।

पोखरामा उडान सुरु भएको दुई दशकसम्म पर्यटक रिझाउने साहसिक हवाई खेलमात्रै मानिएको प्याराग्लाइडिङले मुलुकलाई खुसी हुने मौका दिएको भन्दै खेलाडीको स्वागतमा पर्यटन व्यवसायीको उल्लेख्य सहभागिता थियो । गृहनगरको सम्मान समारोहमा खेलाडीहरू केही भावुक पनि देखिए ।

पदकका लागि धेरै मेहनत र आफ्नै खर्च गरेको कान्छा खेलाडी युकेश गुरुङले बताए । ‘थप मेहनत र राज्यको सहयोग पाए स्वर्ण पदक जित्न सफल हुने विश्वास छ,’ उनले भने । इन्डोनेसियाको मौसम फरक रहेकाले थोरै अप्ठ्यारो भए पनि सबैको साथ सहयोग र विश्वासले पदक जित्न सफल भएको टिम क्यप्टेन विमल अधिकारीले बताए । ‘खेललाई राम्रो गर्न निरन्तर सहयोग चाहिन्छ,’ उनले भने ।

प्रकाशित : भाद्र २०, २०७५ ०७:४०
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT