तेस्रो जेस्ट ब्याडमिन्टन हुने
काठमाडौँ — जेस्ट खुला ब्याडमिन्टन प्रतियोगिताको तेस्रो संस्करण बुधबारदेखि राजधानीमा हुने भएको छ ।जेस्ट ब्याडमिन्टन एकेडेमीमा हुने चारदिने प्रतियोगितामा कुल ३ सय ५ खेलाडीले प्रतिस्पर्धा गर्नेछन् ।
उनीहरूले नौ स्पर्धामा चुनौती पेस गर्नेछन् । पुरुष सिंगल्समा ३५ खेलाडी, डबल्समा १५, शीर्ष २० वरीयताभन्दा तलको डबल्स स्पर्धामा २३ जोडी सहभागी हुने छन् । महिला सिंगल्समा १७, ब्वाइज यू–१५ मा ५२ र गल्र्स यू–१५ मा १५ खेलाडी सहभागी हुनेछन् ।
त्यस्तै, मिक्स्ड डबल्समा १३, मास्टर्सको ३५ वर्षमाथि १९ र ४५ वर्षमाथि ३० जोडीले प्रतिस्पर्धा गर्ने आयोजक जेस्ट ब्याडमिन्टन एकेडेमीका अध्यक्ष मधुसुदन पाठकले बताए । कुल तीन लाख ८० हजार रुपैयाँ पुरस्कारको प्रतियोगितामा पुरुष सिंगल्स विजेताले ३० हजार तथा महिला सिंगल्स विजेताले २५ हजार रुपैयाँ पाउने छन् ।