गोर्खा स्मारक बेलायतलाई

कान्तिपुर संवाददाता

लन्डन — गोर्खाहरूको आधुनिक युद्ध इतिहास बोकेको बेलायत फोकस्टनस्थित गोर्खा मेमोरियल स्मारक स्थानीय सरकारलाई हस्तान्तरण गरिएको छ ।

निर्माण सकिएको ३ वर्षपछि गोर्खा मेमोरियल फन्डले शनिबार स्थानीय फोकस्टन टाउन काउन्सिललाई स्मारक हस्तान्तरण गरेको हो ।

फोकस्टन टाउन मेयर आन बेरी र गोर्खा मेमोरियल फन्डका संस्थापक अध्यक्ष पूर्वकाउन्सिलर धन गुरुङबीच सम्झौतापत्रमा हस्ताक्षरपछि स्मारक काउन्सिलको जिम्मामा गएको हो । ‘बेलायत सरकारलाई समस्त गोर्खाहरूका तर्फबाट उपहार हो यो,’ गुरुङले भने, ‘यसबाट बेलायतले गोर्खाहरूप्रति हेर्ने दृष्टिकोण र विश्वास अझ बढ्ने हाम्रो आशा छ ।’

Yamaha

स्मारकको नियमित मर्मतसम्भार र अन्य व्यवस्थापन गर्न फन्डलाई सकस भइरहेको थियो ।

गुरुङले काउन्सिलर छँदै सन् २००९ तिर स्मारक निर्माण प्रोजेक्टको योजना बनाएका थिए । विभिन्न चन्दादाताबाट करिब एक करोड रुपैयाँ सहयोगमा सन् २०१५ मा स्मारक बनाइएको हो । बेलायती सेनामा गोर्खा भर्तीको २ सय वर्षगाँठको अवसर पारेर ब्रिटिस अभिनेत्री जोआना लुम्ली र कांग्रेस नेत्री सुजाता कोइरालाले उक्त स्मारक उद्घाटन गरेका थिए ।

स्मारकमा अफगानिस्तान र अन्य देशका द्वन्द्वमा वीरगति प्राप्त गरेका १५ जना दिवंगत गोर्खाहरूको नाम अंकित छ । यसमा गोर्खा इतिहास पनि समावेश छ । स्मारकले नेपाली नयाँ पुस्ता र बेलायती नागरिकलाई गोर्खा इतिहास र योगदानबारे थप प्रस्ट्याउने विश्वास लिइएको छ ।


गोर्खा मेमोरियल फन्डका संस्थापक गुरुङले आफ्नो संस्थाले बेलायतस्थित गोर्खा समुदाय र मातृभूमिका लागि कल्याणकारी काम गर्दै आएको जनाए । फन्डले हालै झापाको काँकडभिट्टा माविमा ३१ कम्प्युटरसहित आईटी सेन्टर स्थापना गरिदिएको छ भने आगामी वर्षसम्म रोल्पाको खाबाङ गाउँस्थित श्री बलभद्र माविमा त्यस्तै सेन्टर स्थापना गर्ने उद्देश्य राखेको छ ।


संस्थाको प्राकृतिक विपत्ति सचेतना कार्यक्रमअन्तर्गत नेपालमा अग्नि नियन्त्रणसम्बन्धी प्रशिक्षण र सामग्रीसाथै एम्बुलेन्स उपलब्ध गराइएको जानकारी पनि गुरुङले दिए ।

Esewa Pasal

प्रकाशित : जेष्ठ २१, २०७५ ०९:०१
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

इजिप्टको राष्ट्रपतिमा पुन: अल–सीसी

बीबीसी

कायरो — इजिप्टका राष्ट्रपति अब्देल फतेह अल–सीसीले दोस्रो कार्यकालका लागि आइतबार शपथ लिएका छन् । शपथलगत्तै उनले ‘हिंसा, आतंकवाद र अतिवादविरुद्ध’ लड्ने प्रतिबद्धता जनाएका छन् ।

गत मार्चमा भएको निर्वाचनमा अल–सीसी ९७ प्रतिशत मतसहित विजयी भएका थिए । चुनावमा ४१ प्रतिशत मात्र मतदान भएको थियो ।

शपथ ग्रहण समारोहको समयमा इजिप्टको संसदीय भवनमाथि लडाकु विमानहरूले गस्ती गरेका थिए । अल–सीसी शपथका लागि संसद् भवनतर्फ जाँदै गर्दा लडाकु विमानहरूले राष्ट्रिय झन्डाका रंगहरू मिश्रित धूवाँ उडाउँदै प्रदर्शन गरेका थिए ।

शपथलगत्तै सीसीले आफूले जहिले पनि इजिप्टका जनताका लागि ‘समान स्थान कायम गर्न लागिपर्ने’ बताए । इजिप्टको उत्तरी क्षेत्र सिनाईमा विभिन्न जिहादी आक्रमणमा सयौं सैनिक तथा सर्वसाधारणले ज्यान गुमाइसकेका छन् ।

त्यसतर्फ संकेत गर्दै सीसीले ‘सबैजना एकत्रित भए आर्थिक, सामाजिक र राजनीतिक चुनौती तथा त्यसको नकारात्मक प्रभाव अन्त्य गर्न सफल हुने’ बताए । सन् २०१३ मा निर्वाचित राष्ट्रपति मोहम्मद मोर्सीविरुद्ध आन्दोलन सुरु भएपछि सैनिक आडमा सीसीले सत्ता कब्जा गरेका थिए । उनी सेनाका अवकाशप्राप्त फिल्ड मार्सल हुन् ।

मानव अधिकारवादीहरूले सीसीले ठूलो संख्यामा विपक्षीलाई पक्राउ गरी थुनामा राखेको आरोप लगाउँदै आएका छन् । उनीहरूले दर्जनौं व्यक्तिहरू झूटो समाचार सम्प्रेषण गरेको तथा गैरकानुनी समूहसँग आबद्ध भएको आरोपमा पक्राउ गरिएको बताएका छन् ।

प्रकाशित : जेष्ठ २१, २०७५ ०८:५५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT