भारतको उत्तराखण्डमा बस दुर्घटना, कम्तीमा ४७ को मृत्यु
नयाँदिल्ली — भारतको उत्तराखण्डमा आइतबार भएको बस दुर्घटनामा कम्तीमा ४७ जनाको ज्यान गएको छ । दुर्घटनामा परी ११ जना घाइते भएको अधिकारीहरूले जनाएका छन् । प्रहरीका अनुसार दुर्घटना उत्तराखण्ड राज्यको पाउरी जिल्लामा भएको हो ।
प्रहरी अधिकारीका अनुसार क्षमताभन्दा बढी यात्रु बोकेर रामनगरतर्फ जाँदै गरेको बस सडकबाट करिब २ सय मिटर तल गल्छीमा खसेको हो ।
पाउरी प्रहरीका सुपरिटेन्डेन्ट जगत् राम जोशीले दुर्घटनामा परी ४५ जनाको घटनास्थलमै ज्यान गएको बताए । उनका अनुसार घाइतेमध्ये दुईको उपचारका लागि लैजाने क्रममा मृत्यु भएको हो । जोशीले घाइतेहरूको धुमाकोटस्थित अस्पतालमा उपचार भइरहेको जनाए । उनले घाइतेमध्ये २ जनाको अवस्था गम्भीर रहेको पनि जनाए ।
जोशीले घटनाको कारणबारे हालसम्म जानकारी नभएको बताए । यद्यपि, उनले बढी यात्रु बोकेका कारण बसले नियन्त्रण गुमाएको हुनसक्ने आशंका गरे । अधिकारीहरूका अनुसार दुर्घटनालगत्तै विपत् उद्धार फौजका अधिकारीहरू घटनास्थल पुगेका थिए ।
उत्तराखण्डका मुख्यमन्त्री त्रिभेन्द्र सिंह रावतले घटनाप्रति दु:ख व्यक्त गर्दै मृतकका लागि क्षतिपूर्ति तथा घाइतेको उपचारका लागि सरकारले सहयोग गर्ने जनाए । उनले भने, ‘सरकारले मृतकका परिवारजनलाई २ लाख दिने तथा घाइतेको उपचारका लागि ५० हजार रुपैयाँ उपलब्ध गराउने निर्णय गरेको छ ।’
