नेटोको सुरक्षा बजेट बढाउने सहमति

बीबीसी/एएफपी

ब्रसेल्स — अमेरिकी राष्ट्रपति डोनाल्ड ट्रम्पले उत्तर एटलान्टिक सन्धि संगठन (नेटो) का गठबन्धन राष्ट्रहरू सुरक्षा खर्च बढाउन सहमत भएको जनाएका छन् ।

अमेरिकी राष्ट्रपति डोनाल्ड ट्रम्प क्रोएसियाली समकक्षी कोलिन्दा ग्राबर किटारोभिचका साथ नेटो सम्मेलनमा । तस्बिर : रोयटर्स

ब्रेल्जियमको राजधानी ब्रसेल्समा भएको दुई दिने नेटो सम्मेलनपछि बोल्दै ट्रम्पले गठबन्धन राष्ट्रहरू रक्षा खर्च बढाउन सहमत भएको दाबी गरे । उनका अनुसार नेटो आवद्ध राष्ट्रहरू आफ्नो वार्षिक कुल गार्हस्थ उत्पादनको २ प्रतिशतभन्दा बढी बजेट थप गर्न सहमत भएका हुन् ।

राष्ट्रपति ट्रम्पले नेटोको कुल खर्चमा अमेरिकाको तुलनामा अन्य सदस्य राष्ट्रले निकै कम बेहोरेको भन्दै आलोचना गर्दै आएका थिए । ‘हामी आज निकै ठूलो उपलब्धि हासिल गर्‍यौं,’ बैठकपछि संवाददातासँग बोल्दै ट्रम्पले भने, ‘बैठक कक्षभित्र त्यो निकै गजबको क्षण थियो ।’ यसअघि ट्रम्पले नेटो साझेदार राष्ट्रले कुल गार्हस्थ उत्पादनको कम्तीमा ४ प्रतिशतसम्म सुरक्षा खर्चमा वृद्धि गर्न आग्रह गरेका थिए ।

जर्मन चान्सलर एन्जेला मर्केलले ‘नेटो आवद्ध राष्ट्रबाट बजेट थप गर्ने विषयमा प्रस्ट प्रतिबद्धता’ रहेको जनाइन् । ट्रम्पले नेटोको बजेटमा अरू देशको तुलनामा जर्मनीले कम खर्च बेहोर्ने गरेको भन्दै जर्मनीको तीव्र आलोचना गर्दै आएका थिए ।

ट्रम्पले आफ्नो कारणले बजेट वृद्धि भएको भन्दै नेटो प्रमुख जेन्स स्टोल्टेनवर्गले प्रशंसा गरेको दाबी गरे । यद्यपि, स्टोल्टेनवर्गले भने यसबारे केही उल्लेख गरेका छैनन् । उनले लक्षित २ प्रतिशतको लक्ष्यलाई प्राथमिकता दिनुपर्नेमा जोड दिएको जनाइएको छ ।

रक्षा बजेट रकम वृद्धिसम्बन्धी पत्रकारको प्रश्नको जवाफमा स्टोल्टेनवर्गले भने, ‘२ प्रतिशतको लक्ष्य नै भेट्न नसकिएको अवस्थामा हालका लागि त्यसतर्फ केन्द्रित हुनु राम्रो हो ।’

अफगानिस्तान र सिरियाबारे छफफल

बेल्जियमको राजधानी ब्रसेल्समा मंगलबार र बिहीबार भएको नेटो सम्मेलनमा अफगानिस्तान तथा सिरियाको सुरक्षाका विषयमा समेत छलफल भएको छ । सम्मेलनमा अफगानिस्तानमा नेटो सैनिक भए पनि हिंसा अन्त्य हुन नसकेको भन्दै नेटो साझेदार राष्ट्रबीच कुराकानी भएको हो । त्यसैगरी सम्मेलनका क्रममा साझेदार राष्ट्रबीच सिरियामा जारी गृहयुद्धबारे पनि कुराकानी भएको छ । उक्त छलफलमा लिबियामा जस्तै सिरियामा पनि नेटो सेनाको तैनाथ गर्नुपर्ने विषय उठेको थियो ।

प्रकाशित : असार २९, २०७५ ०८:२१
प्रतिक्रिया
पठाउनुहोस्

जेरुसेलममा अमेरिकी दूतावास खुलेसँगै प्रदर्शन, भिडन्तमा ५५ मारिए, २७ सय घाइते

बीबीसी/एएफपी

गाजा — जेरुसेलममा अमेरिकाले दूतावास खोलेको विरोधमा गाजा क्षेत्रमा सोमबार भएका प्रदर्शनका क्रममा भएका भिडन्तमा ५५ प्यालेस्टाइनीको मृत्यु भएको छ ।

प्यालेस्टाइनी अधिकारीका अनुसार इजरायली सुरक्षा फौजसँगको भिडन्तमा २ हजार ७ सयभन्दा बढी घाइते भएका छन् । प्यालेस्टाइनी स्वास्थ्य मन्त्रीका अनुसार मृत्यु हुनेमध्ये केही बालबालिका छन् ।

इजरायली प्रधानमन्त्री बेन्जेमिन नेतान्याहू ले आफ्नो सुरक्षाकर्मीको बचाव गर्दै आत्मरक्षाका लागि गोली चलाइएकाे दाबी गरेका छन्।

प्यालेस्टाइनीहरूले जेरुसेलमलाई इजरायलको राजधानीको रूपमा मान्यता दिएयता विरोध प्रदर्शन गर्दै आइरहेका छन् । नयाँ दूतावासको उद्घाटन समारोहमा अमेरिकी वरिष्ठ अमेरिकी अधिकारीहरू, राष्ट्रपति डोनाल्ड ट्रम्पकी छोरी र ज्वाइँ सहभागी भएका थिए ।

ट्रम्पका ज्वाइँ जरेद कुस्नरले उद्घाटन कार्यक्रममा बोल्दै ‘अमेरिकी राष्ट्रपतिले कुनै पनि वाचा गरे भने पूरा गरेरै छाड्ने’ बताए । यसैबीच, अमेरिकी विदेशमन्त्री मायक पोम्पियोले एक विज्ञप्तिमार्फत अमेरिका अझै पनि इजरायल र प्यालेस्टाइनबीच शान्ति स्थापनका लागि प्रतिबद्ध रहेको बताएका छन् ।

इजरायलले प्रदशर्नकारीहरूले ढुंगा प्रहार गरेपछि कारबाही गरेको जनाएको छ । यसअघि अमेरिकी राष्ट्रपति डोनाल्ड ट्रम्पले गत डिसेम्बर ३० मा जेरुसेलमलाई इजरायलको राजधानीको मान्यता दिएका थिए ।

जेरुसेलममा दूतावास खोल्ने अमेरिकी निर्णय अस्वीकार गर्ने बताएको छ । सोमबार फ्रान्सको विदेश मन्त्रालयले जारी गरेको विज्ञप्तिमा ‘अमेरिकी कदमले अन्तर्राष्ट्रिय कानुनको गम्भीर उल्लंघन गरेको’ उल्लेख छ ।

प्रकाशित : जेष्ठ १, २०७५ ०८:११
पूरा पढ्नुहोस्
प्रतिक्रिया
पठाउनुहोस्