जापानमा बाढीले मृत्यु हुने २०४ पुगे

बीबीसी/एएफपी

कुरासिकी — जापानको पश्चिमी क्षेत्रमा एक साता अघिदेखिको वर्षासँगै आएको बाढीले मृत्यु हुनेको संख्या २ सय ४ पुगेको छ । दर्जनाैं बेपत्ता छन् । जापान सरकारका प्रवक्ताका अनुसार वर्षाका कारण उद्धारमा समेत कठिनाइ भएको छ ।

जापानी राष्ट्रिय टेलिभिजन एनएचकेले उद्धारका लागि हजारौं सेना तथा प्रहरीहरू खटाइए पनि प्रभावकारी हुन नसकेको जनाएको छ ।

मौसमविद्हरूले वर्षा अझै केही दिन ननरोकिने जनाएका छन् । कतिपय स्थानमा पहिरोको जोखिम रहेको बताइएको छ । क्योडो समाचार संस्थाले मृत्यु हुनेमध्ये केही पहिरोमा पुरिएका हुन् । राजधानी टोकियोदेखि ६ सय किलोमिटर पश्चिममा अवस्थित मोतोयामा नगरमा वर्षा र बाढीको प्रकोप बढेको छ । हिरोसिमामा पनि पानीको तह बढेको छ । अधिकारीहरूले उक्त बाढी ३ दशकयताकै विनाशकारी भएको जनाएका छन् ।

अधिकारीहरूले हजारौं मानिसको उद्धार गरिएको तथा लाखौं मानिसलाई सुरक्षित स्थानमा सर्न चेतावनी दिएको जनाएका छन् । उद्धार गरिएकालाई विद्यालय भवन, जिमखाना तथा सार्वजनिक स्थानमा राखिएको छ ।

करिब ५ लाख जनसंख्या रहेको कुरासिकी क्षेत्रमा यसअघि सन् २०१४ मा भीषण बाढी आएको थियो । उक्त बाढीका कारण ७७ जनाको ज्यान गएको थियो ।

प्रकाशित : असार ३१, २०७५ ०९:००
प्रतिक्रिया
पठाउनुहोस्

नेटोको सुरक्षा बजेट बढाउने सहमति

बीबीसी/एएफपी

ब्रसेल्स — अमेरिकी राष्ट्रपति डोनाल्ड ट्रम्पले उत्तर एटलान्टिक सन्धि संगठन (नेटो) का गठबन्धन राष्ट्रहरू सुरक्षा खर्च बढाउन सहमत भएको जनाएका छन् ।

अमेरिकी राष्ट्रपति डोनाल्ड ट्रम्प क्रोएसियाली समकक्षी कोलिन्दा ग्राबर किटारोभिचका साथ नेटो सम्मेलनमा । तस्बिर : रोयटर्स

ब्रेल्जियमको राजधानी ब्रसेल्समा भएको दुई दिने नेटो सम्मेलनपछि बोल्दै ट्रम्पले गठबन्धन राष्ट्रहरू रक्षा खर्च बढाउन सहमत भएको दाबी गरे । उनका अनुसार नेटो आवद्ध राष्ट्रहरू आफ्नो वार्षिक कुल गार्हस्थ उत्पादनको २ प्रतिशतभन्दा बढी बजेट थप गर्न सहमत भएका हुन् ।

राष्ट्रपति ट्रम्पले नेटोको कुल खर्चमा अमेरिकाको तुलनामा अन्य सदस्य राष्ट्रले निकै कम बेहोरेको भन्दै आलोचना गर्दै आएका थिए । ‘हामी आज निकै ठूलो उपलब्धि हासिल गर्‍यौं,’ बैठकपछि संवाददातासँग बोल्दै ट्रम्पले भने, ‘बैठक कक्षभित्र त्यो निकै गजबको क्षण थियो ।’ यसअघि ट्रम्पले नेटो साझेदार राष्ट्रले कुल गार्हस्थ उत्पादनको कम्तीमा ४ प्रतिशतसम्म सुरक्षा खर्चमा वृद्धि गर्न आग्रह गरेका थिए ।

जर्मन चान्सलर एन्जेला मर्केलले ‘नेटो आवद्ध राष्ट्रबाट बजेट थप गर्ने विषयमा प्रस्ट प्रतिबद्धता’ रहेको जनाइन् । ट्रम्पले नेटोको बजेटमा अरू देशको तुलनामा जर्मनीले कम खर्च बेहोर्ने गरेको भन्दै जर्मनीको तीव्र आलोचना गर्दै आएका थिए ।

ट्रम्पले आफ्नो कारणले बजेट वृद्धि भएको भन्दै नेटो प्रमुख जेन्स स्टोल्टेनवर्गले प्रशंसा गरेको दाबी गरे । यद्यपि, स्टोल्टेनवर्गले भने यसबारे केही उल्लेख गरेका छैनन् । उनले लक्षित २ प्रतिशतको लक्ष्यलाई प्राथमिकता दिनुपर्नेमा जोड दिएको जनाइएको छ ।

रक्षा बजेट रकम वृद्धिसम्बन्धी पत्रकारको प्रश्नको जवाफमा स्टोल्टेनवर्गले भने, ‘२ प्रतिशतको लक्ष्य नै भेट्न नसकिएको अवस्थामा हालका लागि त्यसतर्फ केन्द्रित हुनु राम्रो हो ।’

अफगानिस्तान र सिरियाबारे छफफल

बेल्जियमको राजधानी ब्रसेल्समा मंगलबार र बिहीबार भएको नेटो सम्मेलनमा अफगानिस्तान तथा सिरियाको सुरक्षाका विषयमा समेत छलफल भएको छ । सम्मेलनमा अफगानिस्तानमा नेटो सैनिक भए पनि हिंसा अन्त्य हुन नसकेको भन्दै नेटो साझेदार राष्ट्रबीच कुराकानी भएको हो । त्यसैगरी सम्मेलनका क्रममा साझेदार राष्ट्रबीच सिरियामा जारी गृहयुद्धबारे पनि कुराकानी भएको छ । उक्त छलफलमा लिबियामा जस्तै सिरियामा पनि नेटो सेनाको तैनाथ गर्नुपर्ने विषय उठेको थियो ।

प्रकाशित : असार २९, २०७५ ०८:२१
पूरा पढ्नुहोस्
प्रतिक्रिया
पठाउनुहोस्