‘सम्बन्ध सुधार्ने राम्रो सुरुवात’

ट्रम्प–पुटिन शिखर बैठक
बीबीसी

हेलसिन्की — अमेरिकी राष्ट्रपति डोनाल्ड ट्रम्पले आफ्ना रूसी समकक्षी भ्लादिमिर पुटिनसँगको ‘प्रत्यक्ष वार्ता’ दुई देशको सम्बन्ध सुधारका लागि राम्रो सुरुवात भएको बताएका छन् ।

अमेरिकी राष्ट्रपति डोनाल्ड ट्रम्प र उनका रूसी समकक्षी भ्लादिमिर पुटिन द्विपक्षीय शिखर वार्ताका क्रममा सोमबार फिनल्यान्डको राजधानी हेलसिन्कीमा । तस्बिर : रोयटर्स

फिनल्यान्डको राजधानी हेलसिन्कीमा सोमबार रूसी राष्ट्रपति पुटिनसँगको शिखर वार्तापछि ट्रम्पले आफू रूससँग ‘असाधारण’ सम्बन्ध स्थापित गर्न तयार रहेको जनाए । उनले रूससँग सुमधुर सम्बन्ध कायम गर्नु ‘खराब नभई राम्रो कुरा भएको’ दाबी गरे ।

बन्द ढोकाभित्र करिब २ घण्टा कुराकानी गरेपछि दुवै राष्ट्रपतिहरू आ–आफ्ना वरिष्ठ सल्लाहकारसहित दिवाभोजनमा सरिक भएका थिए । रूसी राष्ट्रपति पुटिनले वार्ताअघि ‘द्विदेशीय जटिल मुद्दामा छलफल गर्ने समय आएको’ जनाएका थिए । तर वार्तापछि भने उनले कुनै प्रतिक्रिया दिएका छैनन् ।

Citizen

आइतबार राष्ट्रपति ट्रम्पले अमेरिका–रूस सम्बन्ध बिग्रिनुमा पूर्वअमेरिकी प्रशासनलाई दोष लगाएका थिए । पूर्वअमेरिकी राष्ट्रपति बाराक ओबामाको नामै तोकेर अमेरिका–रूस सम्बन्ध बिग्रनुमा मुख्य जिम्मेवार रहेको भन्दै कडा आलोचना गरेका थिए । सामाजिक सञ्जाल ट्वीटरमा ट्रम्पले ‘रूस–अमेरिका सम्बन्ध बिग्रँदै जानुमा वर्षांैदेखिको अमेरिकी नीति जिम्मेवार रहेको’ दाबी गरेका थिए ।

बीबीसीका अनुसार हालैका वर्षहरूमा अमेरिका–रूस सम्बन्ध इतिहासकै सबैभन्दा नराम्रो भएको मानिन्छ । सन् २०१४ मा रूसले क्रिमियालाई आफ्नो देशमा गाभेपछि दुई देशबीच बढेको तनाव सन् २०१६ मा भएको अमेरिकी राष्ट्रपतीय निर्वाचनमा रूसले हस्तक्षेप गरेको आरोपपछि उत्कर्षमा पुगेको हो । यसअघि ट्रम्पले शिखर बैठकबाट आफूले केही राम्रै हुने अपेक्षा गरेको बताएका थिए । ट्रम्पका राष्ट्रिय सुरक्षा सल्लाहकार जोन बोल्टनले दुवै पक्षले छलफलमा कुनै औपचारिक मुद्दा नहुनेमा सहमति जनाएको बताए ।

गत शनिबार अमेरिकाले १२ रूसी गुप्तचरविरुद्ध अभियोग लगाएपछि अमेरिकी राजनीतिज्ञहरूले ट्रम्पलाई शिखर वार्ता स्थगित गर्न आग्रह गरेका थिए ।

ट्रम्पले त्यसबारे आफूले कुरा उठाउने बताएका थिए । तर शिखर बैठकका बेला उक्त मुद्दामा छलफल भए/नभएकोबारे केही उल्लेख गरिएको छैन । रूसले अमेरिकी अभियोगहरू अस्वीकार गर्दै आएको छ । यसैबीच, अमेरिकी राष्ट्रपति डोनाल्ड ट्रम्पले उत्तर एट्लान्टिक सन्धि संगठन (नेटो) कहिल्यै बलियो संगठनका रूपमा स्थापित नहुने बताएका छन् । उनले भने, ‘यो नेटो संगठन कहिल्यै बलियो पनि हुँदैन र एकीकृत संगठनको रूपमा पनि काम गर्न सक्दैन ।’

सोमबार बिहान फिनल्यान्डका राष्ट्रपति सउली निनिस्टोसँग भएको संक्षिप्त कुराकानीमा उनले उक्त टिप्पणी गरेका हुन् ।

प्रकाशित : श्रावण १, २०७५ ०८:१६
ADVERTISEMENT
प्रतिक्रिया
पठाउनुहोस्
ADVERTISEMENT

व्यापार विवाद अन्त्य गर्न आग्रह

एएफपी

बेइजिङ — युरोपेली युनियनले विश्वका शक्ति राष्ट्रबीच पछिल्लो समय जारी व्यापार विवाद हटाउन आग्रह गरेको छ ।

युरोपेली युनियनका अध्यक्ष डोनाल्ड टस्क सोमबार चीनको राजधानी बेइजिङमा बोल्दै । तस्बिर : रोयटर्स

अमेरिका, रूस र चीनतर्फ संकेत गर्दै युरोपेली युनियनका अध्यक्ष डोनाल्ड टस्कले सोमबार उक्त आग्रह गरेका हुन् । उनले भने, ‘विगतमा पनि यस्तो व्यापारका क्षेत्रमा युद्ध देखा परेकै हो तर त्यसको परिणाम राम्रो निस्किएको छैन, त्यसैले यस्तो द्वन्द्व तुरुन्तै हटाउनु जरुरी छ ।’

उनले ‘शक्तिशाली राष्ट्रले व्यापारजस्तो संवेदनशील विषयमा विवाद बढाउन नहुने जनाए । उनले भने, ‘बरु विवाद उत्पन्न भयो भने त्यसको समाधान गर्नेतर्फ क्रियाशील हुनुपर्छ ।’

अमेरिका, रूस र चीनबीच पछिल्ला दिनमा व्यापार विवाद जारी छ । यी देशबीच देशमा आयात या निर्यात हुने सामानमा बढी मात्रामा कर लगाउने गरिएको छ भने कतिपय देशले यस्ता सामानको आयात–निर्यात नै बन्द गरेका छन् ।

टस्कले व्यापार क्षेत्रको विश्वव्यापी प्रचलन एवं मान्यताको पालना गर्नु युरोपेली युनियन तथा शक्तिशाली देशको पनि कर्तव्य भएको जनाए ।

बेइजिङ भ्रमणमा रहेका टस्कले सोमबार आयोजित कार्यक्रममा भने, ‘अझै पनि द्वन्द्व समाधानका लागि समय छ, केही बिग्रिसकेको छैन ।’ अध्यक्ष टस्कले सोमबार बिहानै बेइजिङमा चिनियाँ प्रधानमन्त्री ली खछ्याङसँगको भेटवार्ता उक्त प्रतिक्रिया दिएका हुन् ।

भेटका क्रममा दुई नेताबीच हालैका दिनमा देखिएको व्यापार क्षेत्रको विवाद समाधानका लागि आवश्यक उपायहरूबारे कुराकानी भएको बताइएको छ ।

अमेरिका र चीनबीच पछिल्लो समय व्यापारका विषयमा विवाद उत्पन्न भएको छ । उक्त विवादका कारण दुई देशबीच वाक्युद्धसमेत चलिरहेको छ । सुरुमा अमेरिका आयात हुने चिनियाँ केही सामानमा अमेरिकाले पहिलेको तुलनामा करको मात्रामा भारी वृद्धि गरेको थियो भने पछि चीनले पनि अमेरिकी सामानमा त्यसै गरेको छ ।

दुई देशबीचको विवाद पछिल्लो समय रूसतर्फ पनि सरेको छ । अमेरिकाले रूसी सामानमा पनि कर लगाउने घोषणा गरिसकेको छ ।

दुई देशको जारी विवादबारे प्रतिक्रिया दिँदै युरोपेली युनियनका अध्यक्ष टस्कले भने, ‘अन्तर्राष्ट्रिय समुदायले अहिले व्यापारका क्षेत्रमा विवाद होइन, सुधार खोजेको छ, सुमधुर सम्बन्ध चाहेको छ । त्यसैले समाधानतर्फ जाऔँ ।’

प्रकाशित : श्रावण १, २०७५ ०८:१५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT