महाअभियोग लगाए अर्थतन्त्र धराशायी : ट्रम्प

एएफपी

वासिङ्टन — अमेरिकी राष्ट्रपति डोनाल्ड ट्रम्पले आफूविरुद्ध महाअभियोग लगाइए अमेरिकी अर्थतन्त्र धराशायी हुने दाबी गरेका छन् ।

अमेरिकी राष्ट्रपति डोनाल्ड ट्रम्प बिहीबार फक्स एन्ड फ्रेन्डस् कार्यक्रममा अन्तर्वार्ता दिँदै । तस्बिर : एजेन्सी

चुनावी अभियानका क्रममा दुई महिलालाई गरिएको गैरकानुनी भुक्तानीपछि राष्ट्रपतिमाथि महाअभियोग लगाइने हल्लाबीच ट्रम्पले बिहीबार फक्स एन्ड फ्रेन्डस् कार्यक्रममा अन्तर्वार्तामा दिएका हुन् ।

अन्तर्वार्ताका क्रममा उनले महाअभियोगपछि बजार ध्वस्त हुने दाबी गर्दै सबै जना गरिब हुने बताए । ‘म तपाईंलाई भन्छु, यदि मलाई महाअभियोग लगाइयो भने बजार ध्वस्त हुन्छ ।’ ट्रम्पले भने, ‘मलाई लाग्छ, सबै गरिब हुनेछन् ।’ उनले आफूले निकै महान् कार्य गरेको दाबी गर्दै भने, ‘मलाई थाहा छैन, यस्तो व्यक्तिलाई तपाईं कसरी महाअभियोग लगाउन सक्नुहुन्छ ।’

Yamaha

आफूसँग सम्बध रहेका दुई महिलालाई तिरेको रकमले चुनावी अभियानसम्बन्धी नियमविपरीत नरहेको पनि ट्रम्पको दाबी छ । उनका पूर्व वकिल माइकल कोहेनले सन् २०१६ मा भएको राष्ट्रपतीय निर्वाचन अभियानका क्रममा गैरकानुनी रूपमा रकम भुक्तानी दिएको बुधबार स्वीकार गरेका थिए ।

चुनावी अभियानका क्रममा पोर्नस्टार स्टोर्मी डयानियल्स र प्लेब्वाई मोडेल कारेन म्याकडगलाई रकम भुक्तानी दिइएको कोहेनले अदालतसमक्ष स्विकारेका हुन् ।

अन्तर्वार्तामा ट्रम्पले ‘उक्त रकम चुनावी अभियानबाट नभई व्यक्तिगत रूपमा भुक्तानी गरिएको×’ जनाए । उनले कम जरिवानका लागि कोहेनले बनावटी कुरा गरेको दाबी गरेका छन् । ‘त्यो रकम मेरो व्यक्तिगत हो,’ अन्तर्वार्ताका क्रममा ट्रम्पले भने, ‘मैले पहिले नै टीट गरिसकेको छु । उक्त रकम मेरो चुनावी अभियानको होइन् ।’ तर यसअघि ट्रम्पले त्यस्तो भुक्तानी एकपटक मात्र गरिएको थाहा भएको बताएका थिए ।

कोहेनले राष्ट्रपति ट्रम्पको आदेश र संयोजनमा रकम भुक्तानी दिएको बताएका थिए । कोहेनको स्विकारोक्तिसँगै ट्रम्पमाथि कानुनी जोखिम बढाएपछि ट्रम्पले चुनावी अभियान नियम उल्लंघन नगरेको दाबी गरेका छन् । गत जुलाईमा सार्वजनिक भएको एक श्रव्य टेपमा ट्रम्प र कोहेनले राष्ट्रपतीय चुनावअघि रकम भुक्तानी दिने सम्बन्धमा छलफल गरेका थिए । तर उक्त भुक्तानीबारे भने संघीय चुनावी आयोगमा जानकारी गराइएको थिएन् ।

अमेरिकी चुनावी कानुनअनुसार चुनावलाई प्रभावित पार्ने उद्देश्यका साथ गरिने कुनै पनि आर्थिक कारोबारबारे जानकारी गराउनुपर्छ । कोहेन एक दशकभन्दा लामो समयसम्म ट्रम्पको व्यक्तिगत वकिल रहेका थिए ।

यसअघि भर्जिनियाको जुरीले ट्रम्पका चुनावी अभियान प्रमुख पल म्यानाफोर्टलाई विभिन्न मुद्दामा दोषी ठहर गर्दै सजाय गर्ने आदेश दिएको थियो । उनीमाथि धोखाधडी, कर छली तथा विदेशी बैंकमा गोप्य खाता सञ्चालनमा दोषी ठहर गरिएको हो । ट्रम्पले भने उक्त घटनाप्रति दु:ख व्यक्त गर्दै म्यानाफोर्ट ‘असल मानिस’ रहेको प्रतिक्रिया दिएका थिए ।

प्रकाशित : भाद्र ८, २०७५ ०७:५२
प्रतिक्रिया
पठाउनुहोस्

‘नेपालको संविधान विश्वकै उत्कृष्ट’

कान्तिपुर संवाददाता

लन्डन — आयरल्यान्डका राष्ट्रपति माइकल डी हिगिन्सले सन् २०१५ मा संविधानसभाबाट जारी नेपालको संविधान लोकतान्त्रिक, समावेशी र विधिको शासनका मूल्य र मान्यता समाहित विश्वकै उत्कृष्ट संविधान भएको बताएका छन् ।

नेपाल–आयरल्यान्डबीच दौत्य सम्बन्ध स्थापनाको बीस वर्ष पुगेको अवसरमा नेपाली दूतावासद्वारा आयरल्यान्डको राजधानी डब्लिनमा आयोजित कार्यक्रममा बोल्दै राष्ट्रपतिले गत वर्ष सम्पन्न आमनिर्वाचनले नेपालमा राजनीतिक स्थायित्व हासिल भई आर्थिक विकासको निम्ति मार्ग प्रशस्त भएको बताए ।

उनले नेपाल र आयरल्यान्डबीचको सरकारी सम्बन्धलाई अब जनस्तरमा समेत विस्तार गर्नुपर्नेमा जोड दिएका छन् । ‘साहित्य, संगीत, कला र संस्कृतिको आदानप्रदानका माध्यमबाट जनस्तरमा सम्बन्ध विस्तार गर्न सकिन्छ’, आयरल्यान्डको राजधानी डब्लिनमा आयोजित कार्यक्रममा हिगिन्सले भने, ‘भौगोलिक रूपमा आयरल्यान्ड र नेपाल टाढा रहे पनि दुई मुलुक कला, साहित्य, संगीत, संस्कृति र प्रकृतिको समृद्धि एवं शान्ति, मैत्री, भ्रातृत्व र विश्व बन्धुत्वप्रतिको समान आस्थाका कारण धेरै नजिक छन् ।’

डब्लिनस्थित कूटनैतिक नियोगहरूले आयोजना गर्ने कार्यक्रममा आयरल्यान्डका राष्ट्रपतिको उपस्थिति विरलै हुने गरेकामा नेपाली दूतावासद्वारा आयोजित कार्यक्रममा सहभागी भई हिगिन्सले आयरल्यान्ड र नेपालले एकै दिन संयुक्त राष्ट्रसंघको सदस्यता हासिल गरेको समेत स्मरण गरे । उनले विभिन्न अन्तर्राष्ट्रिय मुद्दामा नेपाल र आयरल्यान्डको साझा धारणा रहेको र संयुक्त राष्ट्रसंघको तत्वावधानमा यी दुई मुलुकले विश्वमा शान्ति स्थापना गर्न आआफ्ना सैनिक परिचालन गरिरहेको समेत बताए ।

उनले नेपाल प्राकृतिक सौन्दर्य र सांस्कृतिक विविधताले भरिपूर्ण समृद्व राष्ट्र भएको उल्लेख गर्दै विविधताबीचको एकतालाई सदियौंदेखि जोगाएर राखेका नेपाली जनता धन्य रहेको पनि उल्लेख गरे ।

आफ्ना चार काव्यकृति र तीनवटा राजनैतिक ग्रन्थ प्रकाशित भएको उल्लेख गर्दै हिगिन्सले बेलायत र आयरल्यान्डका लागि नेपाली राजदूत सुवेदीले आफ्ना प्रतिनिधि कविताहरू नेपाली भाषामा अनुवाद र सम्पादन गरी ‘माइकल डी हिगिन्सका प्रतिनिधि कविता’ का रूपमा प्रकाशन गरेकामा कृतज्ञता व्यक्त गरे ।

प्रकाशित : भाद्र ८, २०७५ ०७:५१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT