स्कट मरिसन अष्ट्रेलियाका नयाँ प्रधानमन्त्री

नारायण खड्का

अष्ट्रेलिया — अष्ट्रेलियाको नयाँ प्रधानमन्त्रीमा स्कट मरिसन चयन भएका छन् । ५० वर्षीय मरिसनले आज शुक्रबार साँझ अष्ट्रेलियाका गर्भनर जनरल पिटर कोसग्रोभ समक्ष सपथ लिएसँगै अष्ट्रेलियाका ३० औं प्रधानमन्त्री बनेका हुन् । 

सत्तारुढ दलमा देखिएको नेतृत्व विवाद चर्कंदै गएपछि शुक्रबार भएको आपसी निर्वाचनबाट काेषाध्यक्ष समेत रहेका मरिसन दलका नेता तथा प्रधानमन्त्रीमा चयन हुन सफल भएका हुन् । यसैगरी अहिलेका उर्जामन्त्री जोस फयाडनबर्ग पार्टीका उपनेता तथाकाेषाध्यक्षनियुक्त भएका छन् । उनले पूर्ण मन्त्रिपरिषद एक साताभित्रैमा घोषणा गर्ने बताइएको छ ।

Yamaha


लिवरल दलमा देखिएको नेतृत्व विवादले ३ दिनभित्रैमा रोचक मोड लिएपछि पार्टीभित्रै भएको निर्वाचनबाट मरिसन अर्का प्रतिष्पर्धी पिटर डट्टन तथा जुलि विसपलाई पराजित गर्दै प्रधानमन्त्री बन्न सफल भए । नेतृत्वको निर्वाचनमा तत्कालिन प्रधानमन्त्री माल्कम टर्नबुलले सहभागिता नजनाउने बताएपछि मरिसन उनको समर्थनमा नेतृत्वका लागि अघि सरेका थिए ।

सत्तामा रहेको लिबरल पार्टीमा तत्कालिन प्रधानमन्त्री माल्कम टर्नबुललाई समर्थन नरहेको भन्दै ३ दिनअघि नेतृत्वका लागि पार्टीका अर्का प्रभावशाली नेता पिटर डट्टनले चुनौती दिएपछि विवाद सतहमा आएको थियो । दुईदिन पहिले भएको यस्तै निर्वाचनमा टर्नबुल विजयी भएपनि लगत्तै भोलिपल्ट डट्टनले पुन नेतृत्वका लागि चुनौती दिएपछि शुक्रबार निर्वाचन भएको हो । तर शुक्रबार भएको निर्वाचनमा भने टर्नबुलले प्रतिष्पर्धाबाट अलग हुने जनाएपछि मरिसन र विदेशमन्त्री जुलि विसपले नेतृत्वका लागि प्रतिष्पर्धामा उत्रने जनाएका थिए । शुक्रबार दिउँसो भएको निर्वाचनमा मरिसनले डट्टनलाई ५ मतले पराजित गर्दै पार्टीका नेता तथा प्रधानमन्त्री बन्ने अवसर पाएका हुन् ।
सोसल कन्जरभेटिभ लिवरल नेताका रुपमा चिनिने मरिसन यसपहिले टोनी अबटको सरकारमा अध्यागमन मन्त्री भएका थिए । डुङ्गाबाट अवैध रुपमा भित्रने आप्रवासीलाई रोक्न महत्वपुर्ण भुमिका निभाएर चर्चामा आएका उनी अष्ट्रेलियाको राजनीतिमा महत्वकांछी नेताका रुपमा चिनिन्छन् । टर्नबुलको प्रधानमन्त्रीकालमा ट्रेजरर रहेर चर्चा कमाएका उनी राजनीतिमा आउनुपहिले टुरिज्म अष्ट्रेलियाको निर्देशकको रुपमा समेत कार्यरत थिए । सन २००७ देखि केन्द्रीय राजनीतिमा पाईला राखेका उनले त्यसपछि सरकारको बिभिन्न मन्त्रालयको जिम्मेवारी सम्हालिसकेका अनुभवी राजनीतिज्ञ मानिन्छन् ।

अष्ट्रेलियामा अहिले भएको नेतृत्व परिवर्तनको खेललाई यहाँका स्थानीयहरुले भने सकारात्मक रुपमा लिएका छैनन् । १० वर्षको अवधिमा ७ प्रधानमन्त्री पाइसकेको अष्ट्रेलियामा ११ वर्ष सत्ता सञ्चालन गरेका पूर्व प्रधानमन्त्री जोन हवार्डको पालादेखि अहिलेसम्म कुनैपनि प्रधानमन्त्रीले आफ्नो पूर्ण कार्यकाल पुरा गर्न पाएका छैनन् । अष्ट्रेलियाको राजनीतिलाई नजिकबाट बुझेका डा. भरतराज पौडेल विगत केही हप्तादेखि सर्वेक्षणमा विपक्षी दल लेबर अघि देखिएको र लिबरलको आपसी विवाद सतहमा आएका कारण अब ८ महिनापछि हुने निर्वाचनमा विपक्षी दलले सरकार बनाउने सम्भावना बढेको सुनाउँछन् ।

प्रकाशित : भाद्र ८, २०७५ १४:१८
प्रतिक्रिया
पठाउनुहोस्
ADVERTISEMENT
ADVERTISEMENT

अस्ट्रेलियामा ब्लाइन्ड रक्स

समाजले अपांगहरुप्रति ओभररियाक्ट गर्न छोडेर उनीहरु पनि सामान्य व्यक्तिसरह नै संघर्ष गर्न, जीवन बिताउन सक्छन् भन्ने बुझिदिनुपर्छ । - सृष्टि केसी
नारायण खड्का

अस्ट्रेलिया — जिन्दगीको सपना देख्ने उमेरमै उनले आँखा गुमाइन् । चिकित्सकको गलत सल्लाहले संसार हेर्नबाट वञ्चित भए पनि उनले आफ्नो हौसला भने जारी राखिन् ।

अहिले तिनै युवती नेपालमा रहेका दृष्टिविहीन तन्नेरीहरूको प्रेरणा मात्र बनेकी छैनन्, विदेशका विभिन्न मञ्चमा पुगेर एउटै सन्देश दिने प्रयास गरिरहेकी छन्— ‘ब्लाइन्ड रक्स’ ।

यो सृष्टि केसीको अभियानको नाम हो । अन्धोपन भएका युवायुवतीका लागि कलात्मक तालिमहरू दिँदै उनी उत्प्रेरणामूलक अभियानहरू गर्छिन् । यही शीर्षकमा मिलन चाम्सले फिल्म समेत बनाएका छन् । यही अभियान लिएर उनी २० भन्दा बढी देशमा पुगिसकेकी छन् ।

काठमाडौंमा जन्मिएकी सृष्टिले आँखा चिलाउने भएपछि चिकित्सकको सल्लाहमा औषधि प्रयोग गरिन् । तर छोटो समयसम्म मात्र प्रयोग गर्न हुने औषधि लामो समय चलाइएपछि उनले बिस्तारै आँखाको ज्योति गुमाइन् ।

‘केही दिनअघिसम्म आँखा देखिरहेकी एउटी युवतीलाई आँखा गुमाउँदा कस्तो महसुस हुन्छ, कल्पना गर्नुस् त ?’ सप्तपरी कार्यक्रममा सहभागी हुन अस्ट्रेलिया आइपुगेकी उनले कान्तिपुरसँग भनिन् ।

अचानक आँखा गुमाएपछि केही समय हताश र निराश भइन् उनी । तर, अर्कै माध्यमबाट संसार नियाल्ने अठोट गरिन् र भिन्न ढंगले अघि बढिन् । ‘मलाई जीवन नयाँ तरिकाले बुझ्ने अवसर पाएको अनुभव भयो,’ उनले भनिन् ।

यो क्रममा उनले सबैभन्दा धेरै सुनेको र भोगेको भनेकै ‘बिचरा’ शब्द हो रे । ‘के आँखा गुमेर कुनै व्यक्ति अन्धो हुनेबित्तिकै बिचरा हुन्छ ?’ उनले भनिन् । उनको अनुभवमा शारीरिक रूपले कमजोर भएकालाई यो समाजले त्योभन्दा बढी अपांग बनाउँछ । उनको आग्रह छ, ‘समाजले ओभररियाक्ट गर्न छोडेर अपांगहरू पनि सामान्य व्यक्तिसरह नै संघर्ष गर्न, जीवन बिताउन सक्छन् भनेर बुझिदिनुपर्छ ।’

देशविदेशबाट लिएको ज्ञान र अनुभव नेपालका दृष्टिविहीनहरूको आत्मविश्वास बढाउन खर्च गरिरहेकी उनी कुराकानी क्रममा प्रेमबारे पनि खुलिन्, ‘म आँखा मात्र देख्न नसक्ने हो, ममा पनि अरू जस्तै फिलिङ छ, अरूसँग नजिक हुन मन लाग्छ र माया गर्न मन लाग्छ ।’ कोही व्यक्ति आफ्नो मनमा रहेको बताए पनि नाम भने खुलाउन चाहिनन् । ‘अहिले त मायाप्रेमभन्दा पनि दृष्टिविहीनहरूको आत्मविश्वास र सहयोगका लागि केन्द्रित हुन चाहन्छु,’ उनले भनिन् ।

उनले अस्ट्रेलियाका विभिन्न शहरमा दृष्टिविहिनहरूका कार्यक्रम र गोष्ठीमा समेत सहभागिता जनाइन् ।

प्रकाशित : भाद्र ४, २०७५ ०९:२१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT