‘राष्ट्रसंघसँग हस्तक्षेप गर्ने अधिकार छैन’
यांगुन — म्यान्मारका सेना प्रमुख मिन आङ हलिङले संयुक्त राष्ट्रसंलाई आफ्नो देशको सार्वभौमिकतामाथि हस्तक्षेप गर्ने कुनै अधिकार नभएको बताएका छन् ।
राष्ट्रसंघका अनुसन्धानकर्ताले म्यान्मारको सेनाले अल्पसंख्यक रोहिंग्या मुसलमान समुदायको जातीय सफायाको उद्देश्यले हिंसा मच्चाएको आरोप लगाएको एक सातापछि हलिङको प्रतिक्रिया आएको हो ।
उनले ‘कुनै देश, संगठन र समूहलाई देशको सार्वभौमिकतामाथि निर्णय र हस्तक्षेप गर्ने अधिकार नभएको’ हलिङको भनाइ उद्धृत गर्दै सेनाद्वारा सञ्चालित अखबार म्यावाडीले जनाएको छ ।
राष्ट्रसंघले गत वर्षको अगस्टदेखि रोहिंग्या मुसलमानमाथि म्यान्मारको सेनाले गरेको दमनबारे ४ सय ४४ पृष्ठको अनुसन्धानात्मक प्रतिवेदन सार्वजनिक गरेको थियो । राखिने राज्यमा रोहिंग्या मुसलमानविरुद्ध भएका हत्या, बलात्कार अत्यन्त अन्यायपूर्ण हिंसाले मानव जीवनको अपमान गरेको अनुसन्धानकर्ताको निष्कर्ष छ ।
हिंसाका कारण ७ लाखभन्दा बढी रोहिंग्या मुसलमान बंगलादेशमा शरण लिइरहेका छन् । तर सेनाले भने आफूहरूले आक्रमणकारीमाथि कारबाही गरेको दाबी गर्दै आएको छ ।
