टेलिकमका तत्कालीन प्रबन्ध निर्देशक पौडेल पुर्पक्षका लागि कारागार चलान

पौडेलविरुद्ध अख्तियारले वैशाख ९ मा २३ करोड ७५ लाख ४६ हजार ३२४ रुपैयाँ विगो कायम गरी भ्रष्टाचार मुद्दा दायर गरेको थियो । सो मुद्दामा बुधबार भएको थुनछेक बहसपछि विशेष अदालतले पौडेललाई मुद्दाको किनारा नलागेसम्मका लागि कारागारमा राख्न आदेश दिएको अख्तियारका सूचना अधिकारी यज्ञराज रेग्मीले जानकारी दिए ।

अदालतको आदेशपछि पौडेललाई बुधबारै डिल्लीबजारस्थित कारागार चलान गरिएको छ । उनलाई विशेष अदालतले पेमेण्ट गेट वेको उपकरण र परामर्श सेवा खरिद प्रकरणमा गत शुक्रबार नै दोषी ठहर गरिसकेको छ । उनीविरुद्ध सरकारको अनुमति बिनानै सिंगापुरमा डलर खाता खोलेको र घुसवापत्‌को आर्जित सम्पत्ति उतै व्यवस्थापन गरेको अख्तियारको अनुसन्धानबाट खुलेको थियो ।

अख्तियारका सूचना अधिकारी रेग्मीले अदालतबाट प्रतिवादीका हकमा उपलब्ध तथ्य र प्रमाणलाई आधार मानी मुद्दाको किनारा नलागेसम्म कारागार चलान गर्न आदेश भएको बताए । उनलाई हिरासतमुक्त गर्दा विदेशी बैंकमा रहेको मुद्रा चलखेल गरी थप दुरुपयोग गर्न सक्ने समेतलाई आधार मानेर अदालतले थुनामा पठाएको हो ।