नारीप्रधान लोग्नेमान्छे

काठमाडौ — नाम फिल्मको खास अनुहार हो, जसमार्फत फिल्मभित्रको कथावस्तु झल्किन्छ । नेपाली फिल्मका नामसँग कथाको कस्तो सम्बन्ध रहँदै आएको छ ? यो भिन्नै बहसको विषय हो ।


तर, माघ २३ देखि देशभर प्रदर्शनमा आउन लागेको 'लाग्नेमान्छे' भने नारीप्रधान भएको निर्देशक लय संग्रौलाले बताएका छन् । राजधानीमा आइतबार फिल्मको गीति एल्बम सार्वजनिक कार्यक्रममा उनले भने, 'लोग्ने मान्छे नाम भए पनि यो फिल्मले नारी संवेदनालाई समातेको छ । विवाहले निम्त्याउने स्वाभाविक- अस्वाभाविक घटनाक्रमलाई यो फिल्मको मुख्य कथावस्तु बनाइएको छ ।'
गीति एल्बमको लोकार्पण चलचित्र विकास बोर्डका सदस्य सुरेशदर्पण पोखरेल, चलचित्र निर्माता संघका अध्यक्ष राजकुमार राई, चलचित्र पत्रकार संघका अध्यक्ष शान्तिपि्रय, चलचित्र निर्देशक समाजका अध्यक्ष दिनेश डीसी, कलाकार संघका अध्यक्ष रामकेशर बोगटीले गरेका थिए । बन्धु फिल्म्सको ब्यानरमा प्रदीप मित्तलले फिल्म निर्माण गरेको फिल्ममा दिलीप रायमाझी, नन्दिता केसी, निक शर्मा, केशव भट्टराई, बालदीप राई, अनिशा गुरुङ, ध्रुव कोइराला लगायतको अभिनय देख्न सकिन्छ ।
'यो फिल्म अहिलेको निर्माण प्रवृत्तिभन्दा अलग धारमा बनाइएको छ,' निर्देशक लयले दाबी गरे, 'फिल्ममार्फत हाम्रो सामाजिक धरातलभित्रको अमुक समस्यालाई प्रस्ट्याउन खोजेका छौं ।'
फिल्ममा संगीत चेतन सापकोटाले दिएका छन् । गीतहरू स्वरूपराज आचार्य, दीपक लिम्बू, माण्डवी त्रिपाठी, इन्दिरा जोशी र अञ्जु पन्तले गाएका छन् ।
उक्त फिल्मलाई कृष्ण श्रेष्ठले खिचेका हुन् । यसमा कविराज गहतराजको कोरियोग्राफी हेर्न सकिन्छ ।

प्रकाशित : पुस १४, २०७१ ११:३२
प्रतिक्रिया
पठाउनुहोस्

डबलीमा मुन्धुम कथा

काठमाडौ — डबलीमा नाटक मञ्चन गर्ने परम्परालाई ब्युँझाउन संगीत-नाट्य प्रज्ञा प्रतिष्ठानले गत महिनादेखि थालेको अभियानलाई दर्शकको लोभलाग्दो साथ मिलिरहेको छ । नेपाल प्रज्ञा प्रतिष्ठानको कमलादीस्थित डबलीबाट सुरु गरिएको अभियानको दोस्रो शृंखला आइतबार वसन्तपुरको डबलीमा प्रस्तुत गरियो ।


यसपटक राजन मुकारुङको लेखन र दयाहाङ राईको निर्देशन रहेको नाटक 'घुमि्रएको कपाल' देखाइयो । केही वर्षअघि फ्यामिली थिएटरको अवधारणाअनुरूप मुलुकका विभिन्न भागमा मञ्चन भइसकेको र मण्डला थिएटरमा समेत देखाइसकिएको यो नाटक डबलीमा हेर्न आउनेको घुइँचो थियो ।
लिम्बू समुदायमा प्रचलित र मुन्धुम लोककथामा आधारित नाटकले पारिवारिक प्रेमलाई प्रस्तुत गरेको छ । बाँसको सानो झुप्रोमा एक भाइ र दुई दिदी रमाइलोसँग जीवनयापन गरिरहेका दृश्यबाट सुरु हुने नाटकमा दिदी-भाइबीच होङग्रायो नामक चरा पात्रले अनेक समस्या सिर्जना गरिदिन्छ । जति खाए पनि नअघाउने होङग्रायोविरुद्ध यी तीनजनाले गर्ने संघर्षकै वरिपरि नाटक घुम्छ । अन्त्यमा भाइले चलाखीपूर्वक आफ्नै घुमि्रएको कपाल काटेर रक्सीमा मिसाई होङग्रायोलाई खुवाएर आफ्ना दिदीहरूलाई बचाउँछ ।
प्रकृति र माटोसँग धेरै सम्बन्ध राख्ने पात्रहरू भेटिने अन्य मुन्धुमी लोककथाझैं यसमा पनि मूल पात्र प्रकृति, चराचुरुंगी, पुतली हुन्छन् ।
प्रकृति र मान्छेको जीवनबीचको अन्योन्याश्रति सम्बन्धलाई समेत केलाउन खोजिएको एक घन्टा लामो नाटकको परिवेशलाई वास्तविकता प्रदान गर्न बाँसका घर, तान, भाँडा, बोतल, फूल, लट्ठीजस्ता सामग्री प्रयोग गरिएका थिए । घुमि्रएको कपालवाला भाइको भूमिका राजन खतिवडाले, दिदीको भूमिका सिर्जना अधिकारी र सिर्जना सुब्बा तथा होङग्रायोको भूमिकामा बुद्धि तामाङले अभिनय गरेका थिए ।
व्यवस्थित प्रकाश, थिएटर साउन्ड र स्टेजमा यो नाटक हेरिसकेका दर्शकका लागि भने डबलीको प्रस्तुति फितलै थियो । शनिबारको प्रस्तुतिमा दर्शक धेरै भएकाले पनि संवाद स्पष्टतामा समस्या देखिएको थियो ।
'तर यस्तो नाटक डबलीमा हेर्न पाउँदा खुसी नै लाग्यो,' इन्द्रचोकका निमेष श्रेष्ठले भने, 'पहिला-पहिला डबलीमा नाटक देखाइन्थ्यो भन्ने सुनेको थिएँ, आज हेर्न पाएँ ।'
प्रतिष्ठानले डबली नाट्य परम्परा लोप हुने अवस्थामा पुगेकै कारण अभियानका रूपमा डबली यात्रा थालेको हो । हरेक महिना विभिन्न डबलीमा पुगेर नाटकसँगै गीत र नृत्यसमेत प्रस्तुत गर्ने योजना बनाएको प्रतिष्ठानले यस अभियानलाई देशैभर लैजाने तयारीसमेत गरिरहेको नाट्य विभाग प्रमुख तथा प्राज्ञ रमेशरञ्जन झाले बताए ।
'सधैं नाटक मात्रै हुँदैन,' उनले भने, 'पालैपालो लोकनृत्य र संगीतका प्रस्तुतिहरू पनि हुनेछन् ।'
शनिबारको डबली यात्रामा प्रतिष्ठानका उपकुलपति शम्भुजित बास्कोटा, सदस्यसचिव गणेश रसिकदेखि प्राज्ञ पुष्कर गुरुङसम्मको उपस्थिति थियो । नेपाली लोकनाटक परम्परामा ठूलो स्थान राख्ने डबलीलाई ब्युँझाउने अभियानमा दर्शकको राम्रो साथ मिलेकाले आफूहरू हौसिएको गुरुङले बताए ।

प्रकाशित : पुस १४, २०७१ ११:३०
पूरा पढ्नुहोस्
प्रतिक्रिया
पठाउनुहोस्