कुम्भ मेला आजदेखि सुरु

वेदराज पौडेल

इटहरी — एक महिना सम्म संचालन हुने १२ बर्षे कुम्भ मेलाको उद्घाटन प्रधानमन्त्री शुशिल कोइरालाले आज चतराधामको कोशी किनारमा गर्दैछन्

। राजधानीबाट हेलिकप्टरमा इटहरी स्थित नेपाली सेनाको पूर्वी पृतनामा अवतरण गरी प्रधानमन्त्री कोइरालाले मध्यान्ह १ :३० बजे कुम्भको उद्घाटन गर्ने कार्यक्रम रहेको छ । कुम्भको सुरक्षाका लागि नेपाल प्रहरी र सशस्त्र प्रहरीका एक हजार ५० जवान परिचालन गरिएको छ ।
चैत शुल्कपक्ष प्रतिपदा तिथिबाट प्राचीन हरिद्वारको रुपमा स्थापित चतराधाममा एक महिनासम्म कुम्भ स्नान जारी रहने छ । २०५९ साल कुम्भको प्रारम्भ गरिएको थियो । त्यसको छ वर्षपछि २०६४ सालमा अर्ध कुम्भ मेला आयोजना गरिएको थियो । प्रत्येक १२ बर्षमा आयोजना गरिने महाकुम्भ स्नान नेपालमा पहिलो पटक आयोजना हुन लागेको क्षेत्रीय प्रशासक शंकर अधिकारीले जानकारी दिए ।
भारतमा मात्रै लाग्दै आएको कुम्भ नेपालमा समेत प्रारम्भ हुनु यो मुलुककै गौरवको विषय भएको पूर्व संस्कृति सचिव मोदराज डोटेलले बताए । नेपालको राष्ट्रीय गरिमा उच्च राख्न मेलाको आयोजना गरिएको मेलामा एक करोड मानिस भित्रयाउन समेत लक्ष्य लिएको डोटेलको भनाइ छ । कुम्भमेलालाई सफल बनाउन ११ हजार १ सय ११ सदस्यीय मूल आयोजक समिति समेत गठन भइसकेको छ ।
राष्ट्रिय एकता, अखण्डता, सहिष्णुता सद्भावको संरक्षण सम्वद्र्धन गर्दै नेपाल र नेपालीको छुट्टै पहिचान कायम गराउन मेला आयोजना गरिएको समेत पीठाधिस बालसन्त महाराजले बताए ।
भक्तजनहरुका लागि बस्ने विषेश व्यवस्था, चतरा सम्म आउन जानका लागि २४ घण्टा सवारीको सुविधा, विभिन्न संघ संस्थाहरुले निशुल्क रुपमा खाना खुवाउने भण्डाराको व्यवस्था समेत मिलाएको मेला सुरक्षा समितिका संयोजक एसएसपी यादवराज खनालले जानकारी दिए ।
 

प्रकाशित : चैत्र १७, २०७० ११:१०
ADVERTISEMENT
प्रतिक्रिया
पठाउनुहोस्

अष्ट्रेलियाको 'हार्मोनी डे' मा नेपाली संस्कृति देखाइयो

नारायण खडका

अष्ट्रेलिया — विविध कला र संस्कृति मनाउने र अष्ट्रेलियामा बसोबास गर्ने सबैको कला र संस्कृतिलाई एक आपसमा चिनाउने उद्देश्यका साथ अष्ट्रेलियाभरी मनाइने 'हार्मोनी डे' मा नेपालीहरुले सहभागिता जनाएका छन् ।


विश्वका बिभिन्न देशबाट आएका व्यक्तिहरुको कला र संस्कृतिलाई सम्मान र महत्व दिइने गरिएको यो उत्सव बर्षमा एकपटक अष्ट्रेलियाभरि मनाउँदै आइएको छ । 'हार्मोनी डे' का दिन बिभिन्न देश र समुदायबाट आएका बालबालिका र युवाहरुले आफ्नो कला संस्कृति अनुरुपको नृत्य, कला, संगीत, खानाका साथै अन्य विविध सांस्कृतिक पक्षहरुलाई सबै सामु प्रस्तुत गर्ने गर्दछन् । सोही दिवस मनाउने क्रममा सिड्नीको उत्तरी भेग हर्नस्बीका नेपाली बालबालिकाहरुले समेत नेपाली कला र संस्कृति झल्क्ने नृत्य र संगीत प्रस्तुत गर्दै सहभागीता जनाएका छन् ।
दर्जनौं नेपालीहरुसहित विश्वभरिका करिब ३ दर्जन बढी देशको सहभागिता रहेको उक्त कार्यक्रममा नेपाली बालबालिकाहरुले परम्परागत भेषभुषामा नृत्य प्रस्तुत गरेका थिए । कार्यक्रममा अन्य देशका कला र संस्कृति झल्कने विभिन्न सांगितिक प्रस्तुतीहरु समेत देखाइएको थियो । उक्त कार्यक्रममा बिभिन्न उमेर समूहका नेपाली बालबालिकाहरुले आधा दर्जन नेपाली नृत्यहरु प्रस्तुत गरेका थिए ।
कार्यक्रमको कोरियोग्राफी गरेकी निता केसीले यस कार्यक्रमले आफ्नो कला र संस्कृतिका बारेमा अन्य समुदायका ब्यक्तिहरुलाई जानकारी दिन मद्दत पुगेको बताइन् । करिब दुई सातादेखि तयारी गरिएको र उक्त तयारी अनुरुप साना नेपाली बालबालिकाहरुले प्रस्तुत गरेको सांगितिक प्रस्तुती सबैले मन पराएको उनले जानकारी दिइन् ।
अष्ट्रेलिया सरकारले प्रत्येक बर्ष मनाउने यो कार्यक्रम सन १९९९ बाट सुरु गरिएको हो । यो कार्यक्रम यहाँका बिद्यालय, सामाजिक संस्था, व्यवसाय र स्थानीय सरकारी निकायहरुमा समेत उल्लासका साथ मनाइन्छ ।


प्रकाशित : चैत्र १७, २०७० ११:०६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT