नेपाल टेलिकमकी प्रबन्ध निर्देशक राजभण्डारी बर्खास्त

विजय तिमल्सिना

काठमाडौँ — सरकारले नेपाल टेलिकमकी प्रबन्ध निर्देशक कामिनी राजभण्डारीलाई बर्खास्त गरेको छ । मंगलबार साँझ बसेको मन्त्रिपरिषद् बैठकले कार्यसम्पादन सन्तोषजनक नभएको भन्दै भण्डारीलाई बर्खास्त गर्ने निर्णय गरेको सरकारका प्रवक्ता गोकुल बाँस्कोटाले जानकारी दिए ।

नेपाल टेलिकमकी प्रबन्ध निर्देशक कामिनी राजभण्डारी । तस्बिर : इलिट जोशी/कान्तिपुर

सरकारले भण्डारीलाई शुक्रबार ३ दिने म्याद दिएर पदबाट किन बर्खास्त नगर्ने भन्दै स्पष्टिकरण सोधेको थियो। साउन २३ गते बसेको मन्त्रिपरिषद्को बैठकले भण्डारीलाई दोस्रो पटक स्पष्टिकरण सोध्ने निर्णय गरेको थियो।

Yamaha

यसअघि वैशाख २४ गतेको मन्त्रिपरिषद्ले भण्डारीलाई स्पष्टिकरण सोधेको थियो। भण्डारीको स्पष्टिकरणपछि जेठ २७ गतेको मन्त्रिपरिषद् बैठकले उनलाई कार्यसम्पादन सुधार्न ११ बुँदे निर्देशन दिएको थियो।

खुला प्रतिस्पर्धाबाट तीन वर्षका लागि प्रबन्ध निर्देशक बनेकी भण्डारीको कार्यकाल अझै एक वर्ष बाँकी थियो।

यो पनि पढ्नुहोस् : टेलिकम प्रबन्धकलाई हटाउने तयारी

प्रकाशित : श्रावण २९, २०७५ २२:३५
ADVERTISEMENT
प्रतिक्रिया
पठाउनुहोस्
ADVERTISEMENT

इटालीमा पुल खस्दा ३० को मृत्यु  

एजेन्सी

रोम — इटालीको उत्तरी सहर जिनोआमा मंगलबार पक्की पुल खस्दा कम्तीमा ३० जनाको मृत्यु भएको छ । अधिकारीहरुका अनुसार पुल खस्दा तीव्र गतिमा गुडिरहेका कारहरु करिब ९० मिटर तल बजारिएका थिए । 

सञ्चारमाध्यमहरुमा सार्वजनिक दृश्यहरुमा भीषण हावाहुरीपछि पुल खसेको देखिन्छ । पुल भत्केपछि केही कार रेलमार्गमा तथा गोदाम रहेको भवनमा खसेका थिए । सुरक्षाकर्मीहरुले कार तथा भग्नावशेषले चेपिएका मानिसलाई उद्धार गरिरहेको जनाएका छन् । अधिकारीले मृतकको संख्या बढ्न सक्ने जनाएका छन् । यातायात राज्यमन्त्री एडोआर्डो रिक्सिले भने, ‘हालसम्म३० जनाको मृत्यु भइसकेको छ । मृतकको संख्या अझै बढ्न सक्छ ।’ उनले कम्तीमा १३ जना घाइते भएको जनाए ।

रेलमन्त्री डानिलो टोनिनेलीले ‘ठूलो विपत्ति’ भएको जनाएका छन् । फ्रान्सले उद्धारका लागि सहयोग गर्न आफू तयार रहेको जनाएको छ । पुल खसेको समाचार सार्वजनिक भएसँगै इटालीको अधिकांश सडक सञ्चालन तथा व्यवस्थापन गर्ने कम्पनी अट्लान्टियाको सेयरमा ६.३ प्रतिशतले गिरावट आएको छ ।

फ्रान्सका राष्ट्रपति इम्यानुएल म्याक्रोंले सामाजिक सञ्जाल ट्वीटरमार्फत इटालीका नागरिकप्रति सहानुभूति प्रकट गरेका छन् । उनले भनेका छन्, ‘आवश्यक सहयोगका लागि फ्रान्स तयार छ ।’

युरोपेली आयोगका अध्यक्ष जाँ क्लाउड यान्करले घटनाप्रति दु:ख व्यक्त गरेका छन् । एक वक्तव्य जारी गर्दै यान्करले मृतकका परिवार तथा आफन्तप्रति समवेदन व्यक्त गरेका छन् ।

प्रहरीका अनुसार पुल स्थानीय समयअुनसार मंगलबार बिहान ११ बजेर ३० मिनेटमा खसेको हो । उक्त समय जिनोआ क्षेत्रमा भारी वर्षा भएको थियो । प्रत्यक्षदर्शी पियट्रो एम अलआसाले इटालीको अन्सा न्युज एजेन्सीलाई भने, ‘११ बजेर ३० मिनेट मात्रै गएको थियो, हामीले चटयाङसँगै पुल खसेको देख्यौं ।’

अर्का एक प्रत्यक्षदर्शीले आफूहरुले निकै ठूलो आवाज आएको सुनेको बताए । उनले भने, ‘सुरुमा त हामीले नजिकै ठूलो चट्याङ परेको होला भन्ने ठान्यौं ।’ उद्धार निकायद्वारा सार्वजनिक एक तस्बिरमा पुलको छेउमा एक ट्रक अडेको देखिएको छ ।

मोरान्डी पुल सन् १९६० को दशकमा निर्माण भएको हो । उक्त पुलले इटालीको रिभेरा र फ्रान्सको दक्षिण तटीय क्षेत्रलाई जोडदै आएको थियो । पुलको सन् २०१६ मा मर्मत गरिएको थियो । त्यसयता पुलको नियमित अनुगमन गरिँदै आएको रोयटर्सले जनाएको छ ।

प्रकाशित : श्रावण २९, २०७५ २१:४४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT