संस्थानले धान किन्न सकेन

कान्तिपुर संवाददाता

पर्सा — निजी क्षेत्रसँग प्रतिस्पर्धा गर्न नसक्दा खाद्य संस्थान वीरगन्ज शाखाले यो वर्ष लक्ष्यअनुसार धान खरिद गर्न सकेको छैन । शाखाले गत पुस १२ देखि हालसम्म १० हजार ८४ क्विन्टल ९५ किलो सोना मन्सुली खरिद गरे पनि जिरा मसिनो धान किन्न सकेको छैन ।

यस वर्ष चैत मसान्तसम्ममा सोना मन्सुली १० हजार र जिरा मसिनो २५ हजार क्विन्टल खरिदको लक्ष्य राखेको थियो । शाखा प्रमुख पवित्र गौतम यस अवधिमा लक्ष्यअनुरूपको जिरा मसिनो धान खरिद हुन नसकेको बताउँछन् । ‘हामीले सोना मन्सुली खरिद गर्न सफल भएका छौं,’ उनले भने, ‘किसानले जिरा मसिनो धान एक गेडा पनि बिक्री गर्न ल्याएका छैनन् ।’ यस वर्ष जिरा मसिनो खरिद हुन नसक्ने देखिएपछि संस्थान केन्द्रीय कार्यालयले बाँकी रहेको खरिदको लक्ष्य भेट्टाउन जिरा मसिनोको सट्टामा सोना मन्सुली खरिद गर्न निर्देशन दिएको उनले बताए ।

शाखाले सुरुमा सोनाको खरिद मूल्य प्रतिक्विन्टल २ हजार १ सय २५ र जिराको २ हजार ७ सय रुपैयाँ तोकेको थियो । त्यसलगत्तै तराईमा धानको मूल्य बढेकाले जिल्लास्तरीय प्राथमिक खरिद समितिको निर्णयले मूल्य बढाएर सोनाको प्रतिक्विन्टल २ हजार ३ सय र जिरा मसिनोको २ हजार ८ सय ७५ रुपैयाँ बनाएको थियो । त्यसपछि खाद्यले किसानको सोना मसिनो धान किन्न पाएको हो । यस भेगका किसानले जिरा मसिनोको खेती कम गर्न थालेकाले लक्ष्यअनुसारको धान खरिद हुन नसकेको शाखा प्रमुख गौतमले बताए ।

हाल बजारमा सोनाको खरिद मूल्य प्रतिक्विन्टल २ हजार ४ सय रुपैयाँ पुगेको छ । समितिबाट पटकपटक धानको खरिद मूल्य बढाउन गाह्रो हुने भएकाले शाखाले तत्काललाई एकपटक बढाएको सोनाको मूल्यमा खरिद गरिरहेको गौतम बताउँछन् । शाखाले गत वर्ष १० हजार क्विन्टल सोना मन्सुली र ५ हजार क्विन्टल जिरा मसिनो धान खरिद गरेको थियो ।

प्रकाशित : चैत्र ७, २०७३ ०९:२७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

माछापालनमा आकर्षण

कान्तिपुर संवाददाता

दमक — झापामा व्यावसायिक माछापालक किसान बढेका छन् । जिल्लामा १ हजार २ सयभन्दा बढी किसान माछापालन व्यवसायमा लागेका छन् । जिल्लामा हाल ३ सय १० हेक्टर क्षेत्रफलमा माछापालन गरिँदै आएकोमा प्रधानमन्त्री कृषि आधुनिकीकरण परियोजनाअन्तर्गत जिल्लामा दुईवटा ब्लकमा माछापालन गरिने भएको छ ।

यसअन्तर्गत बैगुनधुरा र तोपगाछी गाविसलाई माछा ब्लक तोकिएको छ । यी दुई गाविसको ६० हेक्टरभन्दा बढी क्षेत्रफलमा व्यावसायिक माछापालन गरिने कृषि विकास कार्यालयका प्राविधिक सहायक शालिकराम भट्टराईले बताए । परियोजनाअन्तर्गत ब्लकमा रहेर माछापालनका लागि कृषक उद्यमी, कृषक समूह र कृषि सहकारीका तर्फबाट कार्यालयमा ३० वटा निवेदन परेको भट्टराइले जानकारी दिए । ‘निवेदनहरूमाथि अध्ययन गर्ने काम भइरहेको छ ।

चाँडै फिल्ड भिजिट सकेर चैतभित्रै कृषकहरूसँग सम्झौता गर्ने तयारी छ,’ भट्टराईले भने, ‘वैशाखदेखि हामी पोखरी खन्ने काममा लाग्नेछौं ।’ कृषि विकास कार्यालयका अनुसार जिल्लामा १ हजार ७२ टन माछा उत्पादन हुन्छ ।

प्रकाशित : चैत्र ७, २०७३ ०९:२७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT