सिधा यातायातले उपभोग्य वस्तु भाउ घट्यो, काममा सहज

डम्बरसिं राई

खोटाङ — सहरसँग सिधा यातायात सुरु भएपछि जिल्लामा उपभोग्य वस्तु तथा निर्माण सामग्रीको भाउ घटेको छ ।मध्यपहाडी लोकमार्गअन्तर्गत पर्ने जयरामघाटस्थित दूधकोसी नदीमा पुल सञ्चालनमा आएपछि सिधा यातायातले उपभोग्य वस्तुको मूल्य घटेको हो ।

सहरसँग सिधा यातायात सुरु भएपछि जिल्लामा उपभोग्य वस्तु तथा निर्माण सामग्रीको भाउ घटेको छ ।

मध्यपहाडी लोकमार्गअन्तर्गत पर्ने जयरामघाटस्थित दूधकोसी नदीमा पुल सञ्चालनमा आएपछि सिधा यातायातले उपभोग्य वस्तुको मूल्य घटेको हो । खोटाङ उद्योग वाणिज्य संघका अध्यक्ष राजु लयालुका अनुसार जयरामघाटस्थित दूधकोसी पुल नहुँदा त्यहाँको झोलङ्गे पुलमा सामान लोडअनलोड र भरिया खर्च गर्न नपर्ने हुँदा उपभोग्य वस्तुमा प्रतिकिलो करिब पाँचदेखि दस रुपैयाँसम्म मूल्य घटेको छ । लयालुले थपे–‘यसले गाउँ–गाउँमा समेत उपभोग्य वस्तुको भाउ घटेको छ ।’

व्यवसायी राजन आचार्यका अनुसार पहिलेकै सामान स्टक रहे पनि सिधा यातायातको प्रभावले मूल्य घटेको सुनाए । उनका अनुसार चिनी प्रतिकिलो ९५ रुपैयाँबाट ९०, नुन ३० बाट २५, तोरीको तेल प्रतिलिटर एक सय ४० बाट एक सय ३५, चामल प्रतिबोरा दुई सय, ग्यास प्रतिसिलिन्डर दुई सय ५० रुपैयाँ घटेको छ । यसबाहेक डिलरसिपबाट वितरण हुने ड्युलगायत सामग्रीमा समेत मूल्य घटेको छ । सिधा यातायात हुँदा कम्पनीहरुले नै ढुवानी गर्ने भएकाले मूल्य घटेको आचार्यले जनाए । यद्यपि (एमआरपी) अधिकतम खुद्रा मूल्यमा भने बिक्री हुन सकेको छैन । यसलाई मध्यनजर गरेर उपभोक्ताले सामान खरिद नगरेकाले उपभोक्ता थप मारमा परेको खोटाङ उद्योग वाणिज्य संघका पूर्वअध्यक्ष खुसनारायण सैंजूले बताए ।

त्यसो त, निर्माण सामग्रीमा समेत मूल्य घटेको छ । निर्माण सामग्री बिक्रेता नवराज जोशीका अनुसार सिमेन्टमा प्रतिबोरा दुई सय, रड प्रतिक्वीन्टल पाँच सय रुपैयाँले घटेको छ । सिधा यातायात सञ्चालनले निर्माणका काममा समेत सहज भएको छ । निर्माणमा करिब २५ प्रतिशतले मूल्यमा सहज आउने निर्माण व्यवसायी संघका सचिव कृष्ण घिमिरेले बताए । घिमिरेले थपे–‘यसले सम्पूर्ण निर्माणसम्बन्धी कामले द्रूतगति लिने छ ।’

सिधा यातायातपछि जिल्लामा उत्पादित अलैंची, सुन्तला, अदुवालगायत कृषिजन्य सामग्री समेत सहर जान सहज भएको छ । यद्यपि कति निकासी भयो भन्ने विवरण भने आउन बाँकी रहेको जिल्ला कृषि विकास कार्यालयका प्रमुख श्यामप्रसाद घिमिरेले बताए । यातायातमा भने भाडा निर्धारण नहुँदा यात्रुले मार खेपिरहेका छन् । यसबारेमा तत्काल भाडा निर्धारण गर्ने सहायक प्रमुख जिल्ला अधिकारी सन्तोष सुवेदीले बताए ।

प्रकाशित : मंसिर २०, २०७४ १५:३६
प्रतिक्रिया
पठाउनुहोस्

दैलेखमा मनदानस्थल सजाइँदै

कान्तिपुर संवाददाता

दैलेख — प्रतिनिधि र प्रदेशसभा निर्वाचनका लागि दुईवटै क्षेत्रका मतदानस्थलहरु चेतनामूलक सन्देश लेखिएको रङ्गीविरङ्गी पोस्टरले सजाइँदै छ । नारायण नगरपालिका वडा नं ७ किमुगाउँस्थित बसन्तमाला माविमा रहेको मतदानस्थलमा बुधबार बिहान ७ बजेदेखि नै काम भइरहेको मतदान अधिकृत सावित्रा सुवेदीले बताइन् । उनका अनुसार भोलि बिहीबार हुने निर्वाचनका लागि कर्मचारी व्यवस्थापन र परिचय पत्र वितरणको काम पनि भइरहेको छ ।

मतदाताले समयमै भोट हाल्न पाउन् भन्ने उद्देश्यले तयारी भइरहेको उनको भनाइ छ । 

यस्तै त्रिभुवन माध्यमिक मतदान केन्द्रमा मतदान अधिकृतसहित सबै कर्मचारी र सुरक्षाकर्मी महिला छन् । उक्त मतदानस्थलमा भने नयाँ मतदाता परिचयपत्र लिनेहरुको घुइँचो लागेको अधिकृत अनिता ज्ञवालीले बताइन् । उनले भनिन्, 'सबै महिला भएकाले काम गर्न निकै सहज भएको छ । चुनाव पनि शान्तिपूर्ण हुने विश्वासमा छौं ।' दैलेखबाट प्रतिनिधिसभा सदस्य दुई र प्रदेशसभा चार सदस्य गरी ६ जना सांसद् चुनिनेछन् । जिल्लामा ४ नगरपालिका र ७ गाउँपालिकामा १ लाख ३९ हजार ९ सय ४४ जना मतदाता छन् । क्षेत्र नम्बर १ मा पर्ने गुराँस गाउँपालिका, डुंगेश्वर गाउँपालिका र भगवतीमाई गाउँपालिकामा, नारायण नगरपालिका, महाबु गाउँपालिका र नौमूले गाउँपालिका पर्दछन् । निर्वाचन क्षेत्र २ मा दुल्लू नगरपालिका, भैरबी गाउँपालिकामा, आठबीस नगरपालिका, ठाँटीकाँध गाउँपालिका र चामुण्डा बिन्द्रसैनी नगरपालिका छन् ।

जिल्ला निर्वाचन समन्वय समितिको निर्णयबाट दैलेखका १ सय ३६ मतदानस्थलमा १ सय ९६ मतदान केन्द्र निर्धारण गरेको छ । अघिल्ला चुनावको अनुभव र आवश्यक सूचनाको आधारमा दैलेखका ५ स्थललाई अति सम्वेदनशील, ४५ स्थललाई सम्वेदनशील र अन्य ८६ स्थल सामान्य रहेको प्रमुख जिल्ला अधिकारी विश्राज न्यौपानेले जानकारी दिए । उनका अनुसार नेपाली सेना, सशस्त्र प्रहरी, नेपाल प्रहरी र राष्ट्रिय अनुसन्धान समेत ४ वटै सुरक्षा अंगका पर्याप्त जनशक्ति परिचालित छन् । 

प्रकाशित : मंसिर २०, २०७४ १५:०३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT