यसरी ठगिन्छन् दिल्लीमा नेपाली

कमलदेव भट्टराई

नयाँ दिल्ली — वैदेशिक रोजगारी तथा विद्यार्थी भिसामा पढ्न पठाउने आश्वासन दिँदै नेपाली युवायुवतीलाई ठगी गर्ने घटना पछिल्ला दिनमा बढ्दै गएका छन् । केही महिनायता आफूहरू ठगिएको भन्दै दिल्लीस्थित नेपाली दूतावासमा उजुरी गर्नेको संख्या बढेको छ । दिनहुँजसो दूतावासमा ठगिएका उजुरी आइरहेका छन् ।

दिल्लीबाट तेस्रो मुलुक जाने विषयमा बुझ्न या पैसा बुझाउनुअघि परामर्श लिन दूतावास आउनेको संख्या भने शून्यप्राय: छ । अधिकारीहरूका अनुसार पहिल्यै परामर्श गर्न आए ठगिने सम्भावना कम हुन्छ । दिल्लीबाट भिसा लगाई तेस्रो मुलुक पठाउने प्रलोभन देखाएर ल्याउने र पैसा असुलेपछि फरार हुने घटना बढिरहेका छन् । यस्ता ठगीका घटनामा भने प्राय: नेपाली नै संलग्न हुने गरेका छन् । विशेषत: नेपाल र भारतमा ठगी गर्ने गिरोहको सञ्जाल नै सक्रिय छ । पहिले नेपालमा रहेका दलालले दिल्लीबाट अन्य मुलुक लैजाने भन्दै दिल्ली पठाउने र यहाँ अर्काे दलाल संलग्न हुने गरेको पाइएको छ ।

यस्ता घटनामा धेरैजसो १५ देखि ५० वर्षका व्यक्ति फसिरहेका छन् । दलालले नेपाली युवतीलाई रोजगारीका लागि मध्यपूर्वी देश पठाउने भन्दै दिल्ली ल्याउने गरेको पाइएको छ भने युवाहरूलाई अस्ट्रेलियालगायत देश पठाउने आश्वासन दिएर ठग्ने गरिएको छ । यसबाहेक दिल्लीमै बेच्न नेपालबाट चेलीबेटी ल्याउने अर्काे विकराल समस्या आफ्नो ठाउँमा छँदै छ । नेपालमा दुई वर्षअघि गएको महाभूकम्पपछि मानव बेचबिखन बढेको सरकारी तथ्यांकले देखाइरहेका छन् । 

Yamaha

यस्ता घटनाबारे आम सञ्चारमाध्यममा बारम्बार समाचार प्रकाशित भए पनि घटनामा कमी नआएको, उल्टै बढेको अधिकारीहरूले बताउने गरेका छन् । ‘ठगीका घटना बारम्बार आउने गर्छन् र हामीले सकेसम्म उनीहरूलाई सहयोग गरिरहेका छौं,’ दिल्लीस्थित नेपाली दूतावासमा काउन्सिलर ओम जोशीले भने ।

करिब तीन साताअघि जोशी नेतृत्वको टोलीले दिल्लीको एक घरमा बन्धक बनाएर राखिएका करिब दुई दर्जन युवतीको उद्धार गरेको थियो । उनीहरूलाई कतार, कुवेतलगायत मुलुक पठाउने भनी केही समयदेखि एउटा घरमा राखिएको थियो । यस्तै, तीन दिनअघि मात्रै ४ युवाले आफुहरूलाई बेल्जियम पठाउने भन्दै २० लाखभन्दा बढी रकम लिएको र त्यो मान्छे बेपत्ता भएको भनी दूतावासमा उजुरी दिएका छन् । घर तथा समाजमा आलोचना हुने डरले उनीहरू आफ्नो नाम भने सार्वजनिक गर्न चाहँदैनन् । 

४–४ लाख भारु बुझाएका ती युवालाई आफूले पैसा बुझाएको मान्छेको बारेमा राम्रो जानकारी छैन । उनीहरूका अनुसार भाइबरका माध्यमले मात्र ती व्यक्तिसँग विरलै सम्पर्क भइरहेको छ । केही महिनाअघि मात्र नाम बताउन नचाहने दुई युवती अस्ट्रेलिया पठाउने बहानामा आफूहरू ठगिएको भन्दै दूतावासमा आएका थिए । उनीहरूले झन्डै २० लाखभन्दा बढी भारु दलाललाई बुझाइसकेका थिए । पैसा असुल्न नक्कली भिसा लगाइएका घटनासमेत देखिएको दिल्लीस्थित नेपाली दूतावासका अधिकारीले बताए ।

केही महिनायता फेसबुकमा नक्कली आईडी बनाएर युवतीहरूलाई माया तथा बिहे गर्ने प्रलोभन देखाएर ठगी गर्ने क्रमसमेत निकै बढेको छ । फेसबुकमा साथी बनाएर गिफ्ट पठाएको र गिफ्ट भन्सारमा रोकिएकाले त्यसलाई छुटाउन पैसा पठाउनू भनी ठगी गर्ने गिरोहसमेत सक्रिय थियो ।

केही महिनायता दूतावासले दिल्लीबाट भिजिट भिसामा तेस्रो मुलुकमा जानेका लागि दिने ‘नो अब्जेक्सन’ सर्टिफिकेटमा निकै कडाइ गर्न थालेको छ । तर पनि दिल्लीबाट उडाइदिने बहानामा रोकिने क्रम घटेको छैन । यद्यपि, यो नियमबाट तेस्रो मुलुक जान पाउने केही सही व्यक्तिसमेत पीडित हुन थालेका छन् ।

 दिल्लीमा दलालले अलपत्र पारेपछि कतिपयले खाने तथा बस्ने समस्यासमेत भोग्नुपरेको छ । विशेषत: मानव बेचबिखनको प्रलोभनले दिल्लीमा ल्याएर अलपत्र परेकाहरूलाई उद्धार गरी नेपाल पठाउने जिम्मेवारी दूतावासको भए पनि दूतावासले स्रोत र साधनको अभाव देखाउँदै आएको छ ।

सोही प्रयोजनका लागि महिला, बालबालिका तथा समाज कल्याण मन्त्रालयले केही रकम दिन तयार रहेका बताउँदै आएको छ । तर दूतावास आफैंले यसमा पहल लिएको छैन । 

केही वर्षअगाडि दूतावासलाई उपलब्ध गराइएको रकम खर्च गर्न नसक्दा अघिल्लो वर्ष रोकिएको केही समय अगाडि मन्त्रालयकै अधिकारीहरूले बताएका थिए । एकातिर मन्त्रालयमा यस प्रयोजनका लागि बजेट छ भने अर्काेतर्फ दूतावासले त्यो खर्च गर्न सकेको छैन ।

प्रकाशित : जेष्ठ २९, २०७४ ११:०५
प्रतिक्रिया
पठाउनुहोस्
ADVERTISEMENT

इरानले पठायो कतारलाई खाद्यान्न

एएफपी

तेहरान — इरानले कतारलाई पाँच वटा कार्गो विमानमा खाद्यान्न पठाएको छ । इरानी अधिकारीले आइतबार जनाएअनुासर अरबी देशबाट नाकाबन्दी गरिएकाले कतारमा संकट हुन सक्ने भएकाले खाद्यान्न पठाइएको हो ।

‘पाँच वटा कार्गो जहाजमा फलफूल, तरकारीलगायतका ताजा खानेकुरा कतार पठाइएको छ, हरेक विमानले झन्डै ९० टन बोकेका थिए, अरू जहाजमा पनि पठाइनेछ,’ इरानका हवाई प्रवक्ता शाक्रोख नौशाबाडीले भने, ‘त्यहाँको मागअनुसार हामी निरन्तर निर्यात गर्नेछौं ।’ झन्डै ३ सय ५० टन खाद्यान्न पानी जहाजमा राखेर कतारको दायेर बन्दरगाहमा पुर्‍याइएको उनले जनाए । दायेर इरानबाट कतारको सबैभन्दा नजिकको बन्दरगाह हो ।

अरब क्षेत्रमा यस वर्ष निकै ठूलो कूटनीतिक समस्या देखिएको छ । साउदी अरब, बहराइन, युनाइटेड अरब इमिरेट्स, इजिप्ट र यमनले गत सोमबार कतारमा नाकाबन्दी गरिएको घोषणा गरेका थिए । कतारले अतिवादीलाई सहयोग गरेकाले नाकाबन्दी गर्नुपरेको उनीहरूको भनाइ छ ।

आईएसका सशस्त्र लडाकु समूहलाई भित्रभित्रै सहयोग गरेको, अमेरिका, युरोपेली संघलगायत पश्चिमी मुलुकद्वारा कडा प्रतिबन्ध लगाइएको इरानसँग साँठगाँठ राखेको र मध्यपूर्वका राष्ट्रबीच आपसी मतभेदकारी नीति अवलम्बन गरेको लगायतका आरोपमा ६ अरबी राष्ट्रहरू इजिप्ट, लिबिया, साउदी अरब, युनाइटेड अरब इमिरेट्स, बहराइन र यमनका साथै दक्षिण एसियाली राष्ट्र माल्दिभ्ससमेत ७ वटा मुलुकले कतारसँग दौत्य सम्बन्ध विच्छेद गरेका हुन् । ती मुलुकले कतारस्थित आ–आफ्ना कूटनीतिक नियोग वा राजदूतावासबाट राजदूतलगायत सबै कर्मचारी फिर्ता बोलाउनुका साथै आफ्नो मुलुकमा रहेका कतारका सबै कूटनीतिक कर्मचारी एवं नागरिकलाई देश छाड्न आदेश दिएका थिए ।

त्यति मात्र नभई ती राष्ट्रले आफ्नो जलमार्ग, स्थलमार्ग तथा हवाईमार्गका नाका प्रयोग गर्नबाट कतारका पानीजहाज, गाडी तथा विमानलाई प्रतिबन्ध लगाउने तथा आफ्नो देशका सबै विमान सेवाले कतारका कुनै पनि गन्तव्यतर्फ उडान नगर्ने निर्णय लिएका थिए । अझ कतारसँग स्थल सीमा जोडिएको मुलुक युनाइटेड अरब इमिरेट्सले आफ्नो सीमासमेत बन्द गरेको थियो ।

प्रकाशित : जेष्ठ २९, २०७४ ११:०४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT