जापानमा फेरि नेपाल फेस्टवल हुने

प्रकाश पन्थी

(टोकियो) जापान — स्थानीयस्तरमा उत्पादित वस्तुको प्रचारप्रसार गरी नेपालमा जापानी पर्यटक बढाउने उद्देश्यले भदौ १० र ११ मा टोकियोको उएनोपार्कमा १०औं नेपाल फेस्टवलको हुने भएको छ ।

गैरआवासी नेपाली सघं (एनआरएनए)जापानको आयोजनामा फेस्टवल हुन लागेको हो ।  एनआरएनए जापानलाई  चार दर्जनभन्दा बढी संघ संस्था र जापानस्थित नेपाली राजदूतावासले साथ दिँदैछन् । आयोजकले टोकियो आसपासका विभिन्न सहरमा जाने पोस्टर पम्पलेटमार्फत जापानी नागरिकलाई नेपाली वस्तुको पहिचान र पर्यटकीय क्षेत्रबारे जानकारी दिने कामलाई तीव्रता दिएका छन् । प्रचारप्रसारमा जापानी नागरिकले पनि सहयोग पुर्‍याइरहेका एनआरएन जापानले बताएको छ । 

सघंका अध्यक्ष सुदन थापाले 'अतिथि देवो भव:' भन्ने मुल नाराका साथ सुरु गरिएको फेस्टवललाई पहिलो प्राथमिकता दिएको बताए । थापाका अनुसार मौलिक भाषा, कला, सस्ंकृति, पहिचान र स्थानीयस्तरमा उत्पादित वस्तुको प्रचारप्रसार गरी व्यावसायिक पहिचानको सम्भाव्यतालाई जापानी पर्यटकमार्फत प्रवर्द्धनका लागि गतवर्ष भन्दा फरक सैली अपनाइएको हो । फेस्टवलमा कला सस्ंकृति झल्कने, पर्यटकीय स्थलको जानकारीमूलक, नेपाल चिनाउने पथ प्रदर्शनमूलक, नेपाली खानाका रेस्टुरेन्टलगायत ४६ स्टल रहने मूलआयोजक समिति संयोजक देवीलाल भण्डारीले जानकारी दिए । अघिल्ला वर्ष भन्दा यो पटक नेपाली खानाका परिकार, नेपाली कला सस्ंकृति झल्कने लोकगीतले फेस्टिवलमा आकर्षण बढ्ने आयोजकको भनाइ छ । 

आयोजकले आर्थिक भार कम पार्ने प्रयासस्वरुप स्टल निर्माण र सहयोग अभियान चलाएका छन् । १ करोड ७० लाख जापानीयान खर्चमध्ये १ करोड बराबरको स्रोत व्यवस्थापन भइसकेको छ । 

फेस्टवल व्यवस्थित गर्न भन्दै देवीलाल भण्डारी, टासीवांदी लामा उपसंयोजक लेलिन भट्टचन, सरोजकुमार खत्री, बुद्धिराज घिमिरे,परशुराम बस्नेत, शिवप्रसाद पौडेल, संगीता अधिकारी, सुनिल शाक्य, जनकविक्रम शाहीलगायत २१ जनाको टोली बनाइएको छ । त्यस्तै दीपक थापाको संयोजकत्वमा आर्थिक, एनआरएनए कान्तोक्षेत्रको संयोजकत्वमा फोहोरमैला व्यवस्थापन, इन्दिरा सुजुकीको संयोजकत्वमा अतिथि सत्कार समिति र प्रचारप्रसारको काम पत्रकार महासघं जापान शाखाले गर्नेछ भने सांस्कृतिक कार्यक्रमका लागि अमर गुरुङ, अतिथि व्यवस्थापन संयोजक ओम गुरुङले सम्हालेका छन् ।

प्रकाशित : श्रावण २६, २०७४ ११:२९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

शुक्रबारदेखि राजधानीमा रोजगार मेला

कान्तिपुर संवाददाता

काठमाडौं — तीन वर्षीय डिप्लोमादेखि स्नातकोत्तर पढेका विद्यार्थीलाई रोजगारी दिन शुक्रबारदेखि राजधानीमा रोजगार मेला लाग्ने भएको छ ।

आसाम डाउनटाउन युनिभर्सिटीको संयोजनमा हुने पहिलो अन्तर्राष्ट्रिय रोजगार र करिअर फेयरमा नेपाल र भारतका विभिन्न प्रख्यात कम्पनीले सिधै रोजगारीका अवसर दिने आयोजकले जनाएको छ । मुलुकमा ब्याप्त बेरोजगार न्यूनिकरण गर्न रोजगारीको खोजीमा रहेका शिक्षित युवालाई लक्षित गरेर मेला गर्न लागिएको लक्ष्मी एजुकेशनल कन्सल्टेन्सीका सिइओ एवं कार्यक्रम संयोजक शंकर भट्टराइले बताए । शनिबारसम्म चल्ने मेला भृकुटीमण्डपस्थित महेन्द्र पुलिस क्लबमा हुनेछ ।
 
भारतका प्रतिष्ठित कम्पनी रिलाइन्स जिओ र र्‍याडिसन होटल मेलामा सहभागी हुने आयोजकले जनाएको छ । मोबाइल कम्पनी रिलायन्सले एक सय ५० जना इलेक्ट्रोनिक्स इन्जिनियरलाई रोजगारीको अवसर दिने भट्टराईले बताए । भारतको चेन होटल सञ्चालन गरेको र्‍याडिसनले आफूलाई आवश्यक पर्ने जनशक्ति मेलामै छनौट गर्ने उनले बताए । त्यस्तै मेलामा सहभागी नेपालका कर्पोरेट हाउसहरुले पनि आफूलाई आवश्यक पर्ने जनशक्ति मेलाबाटै छनौट गर्न सक्ने उनले बताए । नेपालका सिप्रदी, टोयटा, सद्धा, क्लाकि टेक, बिरला टायर, सुबिसु, डिसहोम, यामाहालगायत १८ वटा स्वदेशी कम्पनीहरु सहभागी हुनेछन् । ‘मेलामा आउने विद्यार्थीले आफ्नो बायोडाटा भने अनिवार्य ल्याउनु पर्ने हुन्छ,’ भट्टराईले भने, ‘विद्यार्थीको योग्यता के छ ? रोजगारदाता कम्पनीले कस्ता कामदार माग गरेका छन् ? दुवैलाई भेटाउन मेला आयोजना गरिएको हो ।’ क्याम्पस टु कर्पोरेटको अवधारणा अनुसार मेला आयोजना गर्न लागिएको उनले बताए । 

प्रकाशित : श्रावण २६, २०७४ ११:२९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT