बेलायत मेरो दोश्रो घर : प्रियंका

कान्तिपुर संवाददाता

लन्डन — व्यस्त नायिका प्रियंका कार्की यसपटक दुई दिनका लागिमात्र बेलायत टेकिन् । आफ्नो ‘लिड रोल’ रहेको चलचित्र ‘हयाप्पी डेज’ को रेड कार्पेट प्रिमियर शो भ्याउन उनी हतार हतार बेलायत आएकी थिइन् ।

‘बेलायत अहिले मेरो दोश्रो घर जस्तै भएको छ,' प्रियंकाले भनिन्, ‘फिल्म छायांकन र बेलायतका दर्शक एवं आम नेपालीको माया सद्भावले यूके आवतजावत गर्न प्रेरित गर्दो रहेछ ।’

नेपालका केही प्रोजेक्ट सकेर उनी फेरि छिट्टै यूके आउंदैछिन् ‘लिली बिली’ चलचित्रका लागि । हयाप्पी डेजकै निर्देशक मिलन चाम्सले निर्देशन गर्ने ‘लिली बिली’ छायांकनका लागि फिल्म युनिट अहिले स्कटल्याण्डमा छ ।

आइतबार अल्डरसटस्थित प्रिन्सेस हलमा आयोजित हयाप्पी डेजको रेड कार्पेट प्रिमियर शोमा प्रियंकाले दर्शकप्रति आभार व्यक्त गरिन् । नेपाल बाहिर फिल्म निर्माण आफैंमा चुनौतिपूर्ण भएको बताउंदै उनले सबैको साथ भए नेपाली चलचित्र विश्वव्यापी पुग्ने विश्वास व्यक्त गरिन् । प्रियंकाले फिल्म छायांकनका क्रममा करिब डेढ महिना भोग्नुपरेको बेलायतको चिसो, लोकेशनको बिकटता, यातायात र अन्य व्यवस्थापनका अप्ठेरो स्मरण गर्दै अन्तत: फिल्म रिलिज भएकामा खुशी व्यक्त गरेकी थिइन् ।

बेलायतका नेपाली व्यवसायीले निर्माण गरेकोचलचित्र हयाप्पी डेज को शो शुरु हुनु अघि कलाकारहरु प्रियंका कार्की, धिरेन शाक्य, प्रदीप खड्का र दीया पुन लिमोजिनबाट उत्रंदा दर्शकहरुले न्यानो स्वागत गरेका थिए । उक्त अवसरमा पाइपर धुन बजाइएको थियो ।

कार्यक्रमका प्रमुख अतिथी राजदूत डा. दुर्गाबहादुर सुवेदीले चलचित्र युनिटलाई बधाइ तथा शुभकामना दिए । उनले हयाप्पी डेजबाट मनोरन्जन र सन्देश लिन आग्रह गर्दै नेपाली चलचित्र र कलाकारहरुलाई माया र सम्मान गर्न अनुरोध गरे । नेपाली कलालाई इज्जत र स्नेह, नेपाली संस्कृति, सभ्यता र परम्परा अनि नेपाल र नेपालीलाई माया गरौं भन्दै राजदूतले शो शुभारम्भ गरेका थिए ।

एनआरएनए केन्द्रिय उपाध्यक्ष कुल आचार्यले बेलायतका नेपाली व्यवसायले निर्माण गरेको फिल्मको सफलताको शुभकामना दिंदै गैर आवासीय नेपाली संघ (एनआरएनए) ले नेपाली चलचित्रको विकास तथा प्रवर्धनमा सधैं साथ दिने प्रतिवद्धता व्यक्त गरे ।

उक्त फिल्मका निर्देशक मिलन चाम्सले सहयोगी सबैप्रति आभार व्यक्त गरे ।

प्रस्तुतकर्ता वी पी खनालले स्कटल्याण्ड, वेल्स र इंग्ल्याण्डका रमणीय दृश्यहरु समेटेर ९५ प्रतिशत छायांकन बेलायतमै गरिएको जनाए । उक्त चलचित्रको लगानी अढाइ करोड रुपैयां पुगेको दावी निर्माण पक्षको छ ।

प्रियंका, दयाहाङ राई, सन्जय गुप्ता, विक्की जोशी, मोनिका गुरुङ आदि कलाकारले अभिनय गरेको उक्त चलचित्रले आम नेपालीको बेलायत टेक्ने सपना, यहां आइसकेपछि रातो पासपोर्टको महत्वकांक्षा, आप्रवासीले भोग्नुपर्ने अप्ठेरो जस्ता सामाजिक विषयवस्तुलाई उजागर गरेको छ ।

प्रिमियरमा फिल्मका प्रस्तोता तथा निर्माता वी पी खनाल र अन्य निर्माताहरु हिरल जोशी, भवानी शर्मा, मिलन चाम्स, डा. अशोक बन्साल लगायत सयौं दर्शक सहभागी थिए ।

‘हयाप्पी डेज’ नेपालमा आगामी माघ १२ देखि प्रदर्शन हुनेछ ।

तस्बिरहरु : मिलन तमु

प्रकाशित : कार्तिक २८, २०७४ १२:४४
प्रतिक्रिया
पठाउनुहोस्

[अपडेट] निर्माण व्यवसायी गौचनको हत्या आरोपी ५ जना सार्वजनिक, मुख्य अभियुक्त अझै फरार

जनकराज सापकोटा

काठमाडौं — प्रहरीले नेपाल निर्माण व्यवसायी महासंघका अध्यक्ष शरदकुमार गौचनको हत्यामा संलग्न पाँचजना अभियुक्तहरुलाई सार्वजनिक गरेको छ । मंगलबार पत्रकार सम्मेलन गर्दै गोली हान्ने नुवाकोट पञ्चकन्या गाउँपालिकाका राजीव स्याङ्तान, हतियार व्यवस्था गर्ने पर्साका शिवजी महतो, बिहारका मुकेशकुमार पाण्डेलाई सार्वजनिक गरिएको हो । त्यस्तै मोटरसाइकल व्यवस्थापन गर्ने पर्सा ठोरीका सन्तोष गुरुङ, सहयोगी प्रकाश बूढाथोकी रहेको प्रहरीले जानकारी दिएको छ ।

प्रहरीले नेपाल निर्माण व्यवसायी महासंघका अध्यक्ष शरदकुमार गौचनको हत्यामा संलग्न पाँचजना अभियुक्तहरुलाई सार्वजनिक गरेको छ ।

मंगलबार पत्रकार सम्मेलन आयोजना गरी गोली हान्ने नुवाकोट पञ्चकन्या गाउँपालिकाका राजीव स्याङ्तान, हतियार व्यवस्था गर्ने पर्साका शिवजी महतो, बिहारका मुकेशकुमार पाण्डेलगायतलाई सार्वजनिक गरिएको हो । त्यस्तै मोटरसाइकल व्यवस्थापन गर्ने पर्सा ठोरीका सन्तोष गुरुङ, सहयोगी प्रकाश बूढाथोकीलाई पक्राउ गरी सार्वजनिक गरिएको छ ।

प्रहरीका अनुसार घटनाको मुख्य योजनाकार समिरमानसिंह बस्नेतसहित मनोज पुन, लोप्साङ लामा, ग‌ंगा लिङ्देन, श्यामबहादुर गुम्बे, अम्मरबहादुर लामा, रोशन बुढाथोकी र अजय थापा अझै फरार छन् । पुनले घटनाको नेतृत्व लिएका थिए भने गुम्बे र लामा नेपाली सेनाका भगौडा सिपाही हुन् । बुढाथोकीले घटना सम्पन्न गराउन भूमिका खेलेको प्रहरी अनुसन्धानबाट खुलेको छ । उनी घटनाका कमाण्ड समिरका नातेदार रहेको खुलेको छ ।

पक्राउ परेकाहरुमाथि स‌ंगठित अपराध ऐनअन्तर्गत अनुसन्धान गर्न काठमाडौं जिल्ला अदालतले प्रहरीलाई ६० दिनको म्याद दिएको छ । उनीहरुलाई अहिले महानगरीय नगर प्रहरी कार्यालय प्रदर्शनीमार्गमा राखिएको छ ।

असोज २३ गते भएको हत्याबारे अनुसन्धान गर्न प्रहरी प्रधान कार्यालयले डीआईजी गणेश केसीको नेतृत्वमा विशेष टोली गठन गरेको छ । टोलीमा केन्द्रीय अनुसन्धान ब्युरोका एसएसपी शेरबहादुर बस्नेत, महानगरीय अपराध महाशाखाका एसएसपी दिवेश लोहनी, तीन डिएसपी र एक ईन्स्पेक्टर छन् ।

यस्तो छ, घटनाबारे प्रहरी अनुसन्धानबाट खुलेको तथ्य

प्रकाशित : कार्तिक २८, २०७४ १२:४४
पूरा पढ्नुहोस्
प्रतिक्रिया
पठाउनुहोस्