गौतमलाई फिल्मकर्मीको सहयोग

कान्तिपुर संवाददाता

काठमाडौं — हालै भारतीय सीमा–सुरक्षा बल गोलीबाट कञ्चनपुरको आनन्दबजारमा मारिएका गोविन्द गौतमको परिवारलाई चलचित्र निर्माता संघ नेपालले सघाएको छ । संघका तर्फबाट २५ हजार ६ सय रुपैयाँ आकस्मिक सहयोग गरिएको अध्यक्ष नवल खड्काले जनाए ।

परिवारको हाल बुझ्न संघका तर्फबाट शनिबार महासचिव बिमल पौडेल, सचिव मनोज श्रेष्ठ, सदस्य वीरेन्द्र सिंह, फिल्मकर्मीहरू डा. अमित विश्वास, श्रीराम पुडासैनी, राजकुमार जोशीलगायत आनन्दबजार पुगेका थिए । 

‘आजसम्म सरकारी निकाय र उच्च स्तरीय नेताहरू कोही पनि नआएकोप्रति सहिद गौतमकी आमाले दु:ख व्यक्त गर्नुभयो,’ अध्यक्ष खड्काले भने, ‘छोराको सालिक बनाइदिनुपर्ने, गाउँको नाम गोविन्दनगर राख्नुपर्ने, सहिदकी श्रीमतीलाई जागिर दिनुपर्ने, बच्चाहरूलाई पढाइदिनुपर्नेजस्ता कार्यहरू राज्यले गरिदिए हुन्थ्यो भन्नुभयो ।’ परिवारका घर बच्चाहरूको शिक्षाको सवालमा राज्यले जिम्मा नलिए आफूहरूले सघाउने खड्काले बताए ।

नेपाली सीमामा भारतीय सुरक्षा बलले दिने पीडामाथि ‘दसगजा’ फिल्म बनाएका खड्काले यतिबेला राष्ट्रियताको सवालमा सबै जागरुक हुनुपर्ने र सिमानामा पर्खाल लगाउनुपर्ने संघको माग रहेको पनि बताए ।

 

प्रकाशित : चैत्र ६, २०७३ ०८:५२
प्रतिक्रिया
पठाउनुहोस्
ADVERTISEMENT
ADVERTISEMENT

कलाश्री घोषणा

कान्तिपुर संवाददाता

काठमाडौं — नेपाली कला साहित्य डट कम प्रतिष्ठानले हरेक वर्ष दिँदै आएको कलाश्री सम्मान तथा पुरस्कार शनिबार घोषणा गरिएको छ । वरिष्ठ साहित्यकार दुर्गालाल श्रेष्ठलाई यस वर्षको ‘राष्ट्रिय कलाश्री सम्मान’ प्रदान गरिने प्रतिष्ठानले जनाएको छ ।

पुरस्कार भने वरिष्ठ रंगकर्मी हरिहर शर्मा र शकुन्तला शर्मालाई दिने निर्णय गरिएको बताइएको छ । नेपाली रंगकर्ममा पुर्‍याएको योगदानबापत् १ लाख रुपैयाँ र ताम्रपत्र रहेको यो पुरस्कार शर्मा दम्पतीलाई दिन लागिएको हो । 

त्यसैगरी, ५० हजार रुपैयाँ र सम्मानपत्रसहितको ‘ससिद्धि राष्ट्रिय कलाश्री युवा पुरस्कार’ भने कवि मनु मञ्जिललाई दिइने बताइएको छ । २५ हजार रुपैयाँ र सम्मानपत्रसहितको ‘बद्री राष्ट्रिय कलाश्री पत्रकारिता पुरस्कार’ कवि तथा साहित्यिक पत्रकार शशी लुमुम्बुलाई प्रदान गरिने भएको छ । 

आधुनिक नेपाली कविता साहित्यमा योगदान पुर्‍याएबापत् मञ्जिललाई र साहित्यिक पत्रकारिताको प्रवद्र्धनमा योगदान पुर्‍याएबापत् लुमुम्बुलाई पुरस्कृत गर्न लागेको प्रतिष्ठानले जनाएको छ । सम्मान र पुरस्कार चैत १७ मा वितरण गर्ने जनाइएको छ । प्रतिष्ठानका अध्यक्ष मोमिला जोशीको अध्यक्षमा हालै बसेको बैठकले पुरस्कार र सम्मानसम्बन्धी निर्णय लिएको हो । 

प्रकाशित : चैत्र ६, २०७३ ०८:५२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT