लोकगायक सोमबहादुरलाई ह्विलचेयर

कान्तिपुर संवाददाता

हेटौंडा — पाँच वर्षदेखि थलिएका लोकगायक सोमबहादुर लामा घलानले बुधबार ह्विलचेयर पाएका छन् । उनलाई चितवनका चिकित्सक दम्पतीले घरमै पुगेर यस्तो सहयोग गरेका हुन् ।

ह्विलचेयर पाएपछि ७४ वर्षीय गायक भावुक भए, रोए । उच्च रक्तचापका कारण पक्षाघात भएका उनी हिँडडुल गर्न सक्दैनन् । एक ठाउँबाट अर्को ठाउँ जानुपरे घस्रिनुपथ्र्यो । घलानको यस्तो अवस्थाबारे समाचार प्रकाशित भएपछि नारायणगढस्थित साइराम डेन्टल केयरका सञ्चालक चिकित्सक दम्पती अजय न्यौपाने र सरु थापाले निवासमै पुगेर ह्विलचियर, खानेकुरा र कपडा सहयोग गरेका हुन् । ‘उहाँको कठिनाइबारे समाचार पढेपछि मनै थाम्न सकेनौँ,’ भरतपुर अस्पतालको दन्तरोग विभागका प्रमुखसमेत रहेका चिकित्सक न्यौपानेले भने ।

घलानका पत्नी रत्नमायाले ठूलो सहयोग प्राप्त भएको बताइन् ।

प्रकाशित : वैशाख ७, २०७४ ०८:२५
प्रतिक्रिया
पठाउनुहोस्

अभिनेता क्षेत्रीलाई ३ लाख

कान्तिपुर संवाददाता

अस्ट्रेलिया — अस्वस्थ रहेका अभिनेता दीपक क्षेत्रीको सहयोगार्थ अस्ट्रेलियामा करिब ३ लाख रुपैयाँ सहयोग संकलन गरिएको छ । संकलित रकम अहिले सांगीतिक यात्रामा रहेका गायकद्वय सत्यराज र स्वरूपराज आचार्यमार्फत कलाकार क्षेत्रीलाई हस्तान्तरण गरिने भएको छ ।

अन्तर्राष्ट्रिय नेपाली कलाकार समाज अस्ट्रेलियाले कलाकार क्षेत्रीको उपचारमा सहयोग पुर्‍याउने उद्देश्यले केही दिनअघिदेखि सहयोग संकलन सुरु गरेको थियो । चार दिनसम्म मात्र सहयोग संकलन गरेको समाजले ३ हजार २ सय ५८ डलर संकलन गरेको थियो । 

कलाकारहरू अस्वस्थ हुँदा थोरै मात्रामा भए पनि सहयोग पुर्‍याऔं भन्ने उद्देश्यले आफूहरूले सहयोग संकलन गरेको महासचिव मिलन दाहालले बताए । समाजले सहयोग संकलन बन्द गरिसकेको र आवश्यक परे पछि फेरि सहयोग संकलन गर्नेसमेत उनले बताए । समाजले नेपालबाट कलाकारहरू अस्ट्रेलियामा ल्याएर विभिन्न कार्यक्रमहरू आयोजना गर्नुका साथै कलाकारहरूको सहयोगका लागि समेत विभिन्न कार्यक्रमहरू आयोजना गर्दै आएको छ । समाज अध्यक्ष ईश्वर पोखरेलले नेपालबाट आएका कलाकारद्वय सत्य–स्वरूपको माध्यमबाट उक्त सहयोग रकम कलाकार क्षेत्रीलाई हस्तान्तरण गरिने जानकारी दिए । 

प्रकाशित : वैशाख ७, २०७४ ०८:२५
पूरा पढ्नुहोस्
प्रतिक्रिया
पठाउनुहोस्