सौराहामा सुन्दरी

विमल खतिवडा

सौराहा — ‘मिस नेपाल २०१७’ की प्रतिस्पर्धीमध्ये एक हुन्– विराटनगरकी २२ वर्षीया वर्षा पोखरेल । श्रीराम कलेज अफ कमर्स, दिल्ली युनिभर्सिटीकी ग्रयाजुएट हुन् उनी ।

१९ प्रतिस्पर्धीसँगै सोमबार सौराहामा भेटिएकी उनले पहिलो पटक चितवन आएको सुनाउँदै थिइन् । ‘पहिलादेखि नै यहाँ आउन मन थियो,’ उनले भनिन्, ‘त्यो चाहना मिस नेपालमा सहभागी भएपछि पूरा भयो ।’

उनलाई वरिपरिका दृश्यले लोभ्याए । साथीसँग हात्ती सफारी, जंगल सफारी गरेर रमाइन् । त्यति मात्र होइन, संरक्षणका बारेमा थाहा नपाएको कुरा थाहा पाइन् । ‘दुर्लभ वन्यजन्तुको संरक्षण कसरी गरिन्छ भनेर राम्रोसँग थाहा थिएन,’ उनले भनिन्, ‘जुन कुरा यहाँ आएपछि थाहा पाएँ, त्यो पनि संरक्षणको क्षेत्रमा लागेका विज्ञमार्फत ।’

धादिङकी अनुशा लम्साल भने फरेस्ट्रीमा ब्याचलर गरेकाले चितवन निकुञ्ज घुम्न पाउँदा झन् दंग थिइन् । ‘जे पढेकी थिएँ, त्यहीसँग सम्बन्धित विषयका बारेमा यहाँ आएर बुझ्न पाएँ,’ उनले भनिन्, ‘पहिला पनि आएकी थिएँ तर निकुञ्जको वास्तविक सौन्दर्य बल्ल अहिले देख्न पाएँ । डुंगा सयर गरेर आसपासका दृश्य नियाल्न पाएँ ।’

‘मिस नेपाल भनेको ग्ल्यामर मात्र होइन, रेस्पेक्टेड प्याजेन्ट पनि हो,’ उनले थपिन्, ‘आज मिस नेपालमै सहभागिता जनाएकाले विश्वमै दुर्लभ मानिएको वन्यजन्तुलाई यहाँ आएर हेर्न पाइयो ।’

सहभागी सबैलाई राष्ट्रिय प्रकृति संरक्षण कोष जैविक विविधता संरक्षण केन्द्र सौराहाको हलमा राखेर वन, वन्यजन्तुका बारेमा तालिम दिइयो । यसको महत्त्व र संरक्षणका बारेमा जानकारी गराइयो । बाघमारा मध्यवर्ती सामुदायिक वनमा लगेर सामुदायिक वनको महत्त्व र आवश्यकताबारे बुझाइयो ।

‘पहिला निकुञ्ज घुमे पनि नेचरलाई नजिकबाट बुझ्न सकेकी थिइनँ,’ चितवनकी २२ वर्षीया उरुषा अधिकारीले भनिन्, ‘पहिलो पटक नेचरसँग क्लोज भएर कन्टयाक्ट गर्न पाएँ ।’ कलेज अफ मेडिकल साइन्सेस, भरतपुरबाट बीएससी नर्सिङ सकेकी उनी अहिले मिस नेपालको ताज जित्ने होडमा छिन् ।

‘किताबमा चितवन निकुञ्जबारे पढेको थिएँ,’ काठमाडौंकी २३ वर्षीया रुबिना श्रेष्ठले सोमबार काठमाडौँ फर्किनुअघि भनिन्, ‘किताबमा पढेभन्दा सुन्दर रहेछ । तीन दिन बितेको पत्तै पाइनँ ।’

सहभागीलाई डुंगा सयर गराइयो, हात्ती प्रजनन केन्द्र र थारू संग्रहालय घुमाइयो । सबै रमाए । उनीहरूले गैंडा, हात्ती, मयूर, मृग, चरा, गोही, बँदेललाई प्रत्यक्ष देख्न पाए । संरक्षणमा सुरक्षाका बारेमा श्रीजंग गणका प्रमुखले जानकारी गराए ।

मिस नेपालको आयोजना हिडन ट्रेजरले गर्दै आएको छ । जेठ १९ मा २२ औं संस्करणको रूपमा मिस नेपालको फाइनल प्रतिस्पर्धा हुनेछ । ‘प्रतियोगितामा १९ देखि २४ वर्षसम्मका युवतीहरूको सहभागिता छ,’ हिडन ट्रेजरका अध्यक्ष गोपाल सुन्दरलाल कक्षपतिले भने, ‘प्रतियोगिताका सहभागीले संरक्षणका बारेमा थाहा पाउन जरुरी छ । संरक्षणमा उनीहरूको भूमिका ठूलो रहने भएकाले सौराहा लिएर आएका हौं ।’

चार वर्षयता ‘मिस नेपाल’ विजेतालाई राष्ट्रिय प्रकृति संरक्षण कोषले संरक्षण दूत बनाएर युवामाझ उभ्याउने गरेको छ । मिस नेपालमार्फत संरक्षणमा लाग्न युवाहरूलाई उत्प्रेरित गरिन्छ । ‘प्रकृतिसँग भेट गराउँदा यसप्रति उनीहरूको माया बढ्छ,’ कक्षपतिले भने, ‘संरक्षणमा आफू मात्र नभई सबैलाई लाग्न जनचेतना जगाउँछन् ।’

उनका अनुसार, यो वर्ष प्रतियोगितामा एउटा टाइटल थपिएको छ, मिस एसिया प्यासिफिक । मिस नेपाल, मिस अर्थ, मिस इन्टरनेसनल टाइटल भने यथावत् रहनेछन् । यस पालि प्रतियोगितामा विराटनगर, चितवन, बुटवल, पोखरा, नेपालगन्ज, काठमाडौं लगायतका सुन्दरीहरूको सहभागिता छ ।

प्रकाशित : वैशाख २६, २०७४ ०९:५१
प्रतिक्रिया
पठाउनुहोस्

हजारौं युवतीको प्रस्ताव

प्रभास अब दक्षिण भारतका मात्रै सुपरस्टार रहेनन् । ‘बाहुबली’ ले उनलाई सिंगो भारत र अन्तर्राष्ट्रिय स्तरमै ख्याति दिलाइसकेको छ । एकै दिनमा एक सय करोड कमाएको ‘बाहुबली २ : द कन्क्लुजन’ नेपालमा पनि लोभलाग्दो ढंगले चलिरहेको छ । फिल्म हेर्नेको ओइरो घटेको छैन ।

एसएस राजामौली निर्देशित उक्त फिल्मका मुख्य अभिनेता प्रभास भने यतिखेर अमेरिकामा छन् । फिल्मको सक्सेस पार्टी मनाएर विदेश हिँडेका प्रभास अहिले युवतीहरूमाझ यति लोकप्रिय भएका छन्, उनलाई हजारौंको संख्यामा विवाहको प्रस्ताव आउन थालेको छ । टाइम्स अफ इन्डियाका अनुसार, उनले ६ हजार जनाको प्रस्ताव अस्वीकार गरिसकेका छन् । बाहुबलीका रूपमा उनको प्रस्तुति र रूप(रंग व्यापक रुचाइएको छ ।

‘म सबैप्रति आभारी छु,’ प्रभासले भनेका छन्, ‘तपाईंहरूको माया र समर्थनले यो सबै सम्भव भएको हो ।’

दर्शक र फिल्म समीक्षक दुवैले प्रभासको कामको तारिफ गरेका छन् । अमेरिका जानुअघिसम्म उनलाई बधाई दिनेको लस्कर थियो । फोन, म्यासेज र इमेल सबै व्यस्त रहन्थे । बैंककको म्याडम टुसाड म्युजियममा ‘संरक्षित’ हुने उनी पहिलो दक्षिण भारतीय सुपरस्टार पनि बनेका छन् । त्यहाँ रजनीकान्त र कमल हासनको समेत वाक्स स्टयाचु बनाइएको छैन ।

एक दशकको अभिनय यात्रामै यत्ति ठूलो स्टारडम कमाउन सफल प्रभास अरू ‘हिरो’ हरूभन्दा अलि फरक छन् । उनको कामगराइ र आनीबानी विशेष प्रकारको छ । उनी एक चोटिमा एउटा मात्रै फिल्म खेल्छन् । ‘बाहुबली’ १ र २ का लागि उनले पाँच वर्षको समय छुट्टयाएका थिए भने, ६ सय दिन सुटिङ गरेका थिए । यो अवधिमा उनले अन्य फिल्म साइन गरेनन् । निर्देशक राजामौलीसँगको यो उनको तेस्रो सहकार्य थियो । उनीहरूले सन् २००५ मा ‘छत्रपति’ मा एकसाथ काम गरेका थिए ।

बाहुबलीको रूपमा देखा पर्न प्रभासले कडा प्रशिक्षण पनि गरेका थिए । खानपानमा विशेष ध्यान दिनुका साथै २२ किलो तौल बढाएका थिए । उनी ८२ बाट १ सय ५ किलो पुगेका थिए । हरेक दिन ४० वटा अन्डा खान्थे ।

प्रभास पढन्ते अभिनेताका रूपमा पनि चिनिन्छन् । जतिसुकै व्यस्त भए पनि उनी पुस्तक पढ्न छोडदैनन् । घरमा राम्रो पुस्तकालय बनाएका छन् । उनलाई खेलकुदमा रुचि छ । जिम जानुभन्दा भलिबल खेल्नु र रक क्लाइम्बिङ गर्नु उचित ठान्छन् ।

भारतका कम विवादास्पद अभिनेतामध्येमा पर्ने प्रभास लजालु स्वभावका छन् । उनी आफूलाई लो प्रोफाइलमा राख्न मन पराउँछन् । एक हजार करोड व्यापारको ऐतिहासिक कीर्तिमान राखिसकेको ‘बाहुबली २’ को सफलतापछि पनि उनी आफूलाई महान् वा स्टार कलाकार नभनिदिन आग्रह गर्दै हिँडिरहेका छन् । प्रभासको घरभरि चरा नै चरा देखिन्छन् । उनी प्रकृतिप्रेमी हुन् । अजय देवगणसँगको फिल्म ‘एक्सन ज्याक्सन’ बाट बलिउडमा डेब्यु गरेका उनलाई यतिखेर बलिउडबाट मनग्गे प्रस्ताव आइरहेका छन् ।

चेन्नईमा जन्मिएका उनको असली नाम वेंकटा सत्यनारायणा प्रभास राजु उप्पल्लापती हो । उनका बाबु यु सूर्यनारायण राजु फिल्म निर्माता हुन् भने काका कृष्णम राजु प्रख्यात तेलगु कलाकार हुन् ।

इन्जिनियरिङमा स्नातक प्रभास सन् २००२ देखि फिल्म क्षेत्रमा लागेका थिए । राजकुमार हिरानी र रोबर्ट डे निरोका फिल्म साह्रै मन पराउने उनले ‘मुन्ना भाइ एमबीबीएस’ र ‘थ्री इडियट्स’ २० पटकभन्दा बढी हेरेको बताउने गरेका छन् ।

प्रकाशित : वैशाख २६, २०७४ ०९:५१
पूरा पढ्नुहोस्
प्रतिक्रिया
पठाउनुहोस्