‘जोर्नी दुखाइ चिकनगुनियाले पनि हुन सक्छ’

अतुल मिश्र

काठमाडौं — अत्यधिक जोर्नी दुखाइबाट पीडित व्यक्तिको उपचार गर्दा चिकनगुनियालाई समेत सम्भावित रोगको सूचीमा राख्नुपर्ने विशेषज्ञले औंल्याएका छन् । मुलुकमा ‘चिकनगुनिया’ को संक्रमण देखिन थालेकाले विशेषज्ञले त्यस्तो सुझाव दिएका हुन् । ती विशेषज्ञका अनुसार जोर्नी दुखेर अस्पताल पुगेका ‘चिकनगुनिया’ प्रभावित धेरैजसोमाथि बाथ रोग, युरिक एसिड वृद्घिजस्ता आशंकामा उपचार थालिन्छ ।

‘जोर्नी दुखाइको लक्षण महसुस गरेर अस्पताल आउनेहरूसँग पूर्वइतिहास सोधेर चिकित्सकले डिफरेन्सियल डायग्नोसिस (सम्भावित रोगको सूची) मा चिकनगुनियालाई समेत राख्निुपर्छ,’ शुक्रराज ट्रपिकल तथा सरुवा रोग अस्पताल, टेकुका डा. शेरबहादुर पुनले कान्तिपुरसँग भने, ‘चिकनगुनियाकै कारण कडा जोर्नी दुखाइ, ज्वरो, बिमिरा आउनेलगायत समस्यासहित उपचारमा आएकाको पनि रोगको सही पहिचान हुन सकेको छैन ।’

डा. पुनका अनुसार टेकु अस्पतालमा शंकास्पद चिकनगुनिया परीक्षणका लागि आएकामध्ये करिब २२ प्रतिशतमा यो रोगको संक्रमण देखिएको छ । अहिले पनि यसको संक्रमण देखिँदै आएको छ । मुलुकमा फाट्टफुट्ट रूपमा हरेक महिनाजसो चिकनगुनिया संक्रमण देखिए पनि वर्षायामपछि भने अझ बढी देखिन्छ । इपिडिमियोलजी तथा रोग नियन्त्रण महाशाखाका डा. गुणनिधि शर्माका अनुसार सन् २०१३ मा डा. वासुदेव पाण्डेले गरेको अध्ययनबाट मुलुकमा सबभन्दा पहिले चिकनगुनियासमेत रहेको प्रमाणित भएको हो । 

अमेरिकन जर्नल अफ ट्रपिकल मेडिसिन एन्ड हाइजिनमा डा. वासुदेव पाण्डे, डा. विश्वास न्यौपाने, डा. किशोर पाँडे, डा. नियात र प्रा.डा. मोरिताले सन् २०१३ मा गरेको अध्ययन रिपोर्टअनुसार ज्वरो, टाउको–मांसपेसी–जोर्नी दुखाइ, थकाइलगायत समस्या देखिएका करिब ५ प्रतिशत चिकनगुनिया प्रभावित छन् । उक्त अध्ययन कञ्चनपुर, पर्सा र चितवन जिल्लामा १ सय ६९ जनाको रगतको नमुना लिएर गरिएको थियो । सोही अध्ययनको थप प्रक्रियाअन्तर्गत गत वर्ष चितवनबाट ज्वरो, जीउ, मांसपेसी, जोर्नी दुखाइलगायत समस्या भएकामध्ये ६९ जनाबाट संकलन गरिएको रगत नमुनामा समेत ७ प्रतिशतमा चिकनगुनिया देखिएको डा. पाण्डे बताउँछन् । उनका अनुसार मुलुकमा हुने गरेको परीक्षणमा यो रोगको सटीक पहिचान भइरहेको छैन । 

इपिडिमियोलजीका अनुसार भारतमा यही संक्रमणले ११ जनाको मृत्यु भएको देखिए पनि नेपालमा हालसम्म मृत्युको तथ्यांक रेकर्ड गरिएको छैन । डा. शर्माका अनुसार भाइरसबाट हुने संक्रमण चिकनगुनिया सार्ने लामुखुट्टे काठमाडौंलगायत धेरैजसो पहाडी र तराईका जिल्लामा पाइन्छ । सामान्यतया यो रोग आफैं नियन्त्रित हुन्छ । संक्रमितमा जोर्नी दुखाइसँगै ज्वरो सामान्यतया तीन दिनसम्म रहन्छ । तर ज्वरो निको भएपछि पनि जोर्नी सुन्निने र दुखाइ कायम रहन सक्छ । यस्तो लक्षण रोगीको उमेरको आधारमा एक, दुई वा तीन सातादेखि महिनौंसम्म रहन सक्ने डा. पुन औंल्याउँछन् । चिकनगुनियाको ज्वरो निको हुनुमा बिरामीको उमेर र रोग प्रतिरोधक क्षमतामा निर्भर गर्छ ।

प्रकाशित : वैशाख ५, २०७४ ०८:०७
ADVERTISEMENT
प्रतिक्रिया
पठाउनुहोस्
ADVERTISEMENT

क्यान्सर अस्पतालमा ४० शय्या थप

कान्तिपुर संवाददाता

भक्तपुर — भक्तपुर क्यान्सर अस्पतालले ४० शय्या विस्तार गरेको छ । ११० शय्यामा सञ्चालित अस्पतालमा बिरामीको बढदो चापका कारण सबै बिरामीलाई भर्ना गरी उपचार गर्ने अवस्था नभएपछि विभिन्न दाताको सहयोगमा अस्पतालले शय्या थप गरी सेवा विस्तार गरेको हो ।

दाताको सहयोगमा अत्याधुनिक स्मृति भवन निर्माण गरीे १० डिलक्स, एनेक्स तथा भीआईपी वार्डसहित ४० शय्या र अत्याधुनिक उपकरण थप गरिएको अस्पतालका मेडिकल डाइरेक्टर डा. प्रकाशराज न्यौपानले बताए । उनका अनुसार सोमबार काठमाडौं बागबजारका ८८ वर्षीय चिनिकाजी श्रेष्ठ र पत्नी शान्तादेवीको सहयोगमा निर्मित स्मृति भवनको साँचो हस्तान्तरणसँगै शय्या थप गरिएको हो । न्यौपानेका अनुसार श्रेष्ठ दम्पतीको सहयोगमा नवनिर्मित भवनको पहिलो तलामा २ अप्रेसन कक्ष, दोस्रो तलामा जनरल वार्ड र सुपर डिलक्स वार्ड निर्माण गरिएको हो । श्रेष्ठ दम्पतीले नवनिर्मित भवनको भुईं तलाको फल्स, सिलिङ, बिजुली जडान तथा अस्पतालका अधिकांश भवनमा रङरोगनका लागि सहयोग गरेका हुन् ।

स्वास्थ्यमन्त्री गगन थापाले सोमबार आयोजित कार्यक्रममा श्रेष्ठ दम्पतीको ४ करोड सहयोग र अन्य दाताबाट संकलित ९० लाखमा निर्माण भएको स्मृति भवन उद्घाटन गरे । थापाले क्यान्सरका बिरामीको उपचारका लागि सरकारले ५ लाख रुपैयाँ सहयोग गर्ने तयारी गरेको बताए । सरकार सबै नागरिकको स्वास्थ्य बिमा गरी क्यान्सर, मिर्गौला, मुटुलगायत जटिल प्रकृतिका रोगको नि:शुल्क उपचार गर्ने विधेयक तयार गरी संसदबाट पारित गर्ने अवस्थामा रहेको मन्त्री थापाले बताए ।

देशभरका क्यान्सरका बिरामीलाई गुणस्तरीय सेवा पुर्‍याउँदै आएको अस्पताललाई दाता र सरकारी सहयोग वृद्धि गराउँदै अझै सेवा विस्तार र विकास गर्नुपर्नेले बताए । अस्पतालले सोमबार उपचाररत बिरामीलाई फलफूल वितरण गरेको छ । कार्यक्रमम मन्त्री थापाले दाता श्रेष्ठ दम्पतीलाई कदरपत्रले सम्मानसमेत गरे । 

प्रकाशित : वैशाख ५, २०७४ ०८:०७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT