दैनिक ६ को मुटुको शल्यक्रिया

कान्तिपुर संवाददाता

काठमाडौं — सरकारले फागुन १ गतेदेखि बाथ मुटु रोगका लागि भल्ब फेर्न, मर्मत गर्ने या शल्यक्रियासहितको उपचार नि:शुल्क गर्ने व्यवस्था गरेकोमा यसको प्रभावकारिता देखिएको छ ।

मुटुको नि:शुल्क भल्ब फेर्ने व्यवस्था विपन्नका लागि ठूलो राहत साबित भएको सहिद गंगालाल राष्ट्रिय हृदय केन्द्रका निर्देशक डा. जोतिन्द्र शर्माले बताए । गत आर्थिक वर्षमा बाँसबारीस्थित गंगालाल राष्ट्रिय हृदय केन्द्रबाट २२ सय २४ जना विपन्नले नि:शुल्क रूपमा मुटुको शल्यक्रिया गरे । यसका लागि सरकारले २१ करोड ६८ लाख सात हजार खर्च गरेको केन्द्रले जनाएको छ ।

त्यस्तै, केन्द्रबाट चार सय ६५ जनाको भने मुटुको साँघुरिएको भल्ब खुलाइएको केन्द्रका आर्थिक प्रशासक विमल उप्रेतीले बताए । सात सय ८७ जना १५ वर्षमुनिका बालबालिकाका भने नि:शुल्क रूपमा मुटुको भल्ब फेरिएको केन्द्रको तथ्यांक छ ।

त्यस्तै, नि:शुल्क रूपमा मुटुको शल्यक्रिया गर्ने ७५ वर्षमाथिका नागरिक भने चार सय ६५ जना पुगेको प्रशासक उप्रेतीले बताए । मुटुको शल्यक्रिया गर्ने, भल्ब फेर्ने र बन्द भएका भल्बमा जाली राख्ने गरी गत आर्थिक वर्षमा सात हजार ७ सय १५ जनाले नि:शुल्क उपचार लिएको केन्द्रको तथ्यांक छ । दैनिक ६ जनाको मुटुको शल्यक्रिया हुने केन्द्रको तथ्यांक छ ।

‘बिरामीको चाप यति धेरै छ, आगामी फागुन महिनासम्मका लागि शल्यक्रिया गर्ने बिरामीको नाम दर्ता भइसकेको छ,’ उप्रेतीले भने । नेपालमा बाथ मुटु रोगकै कारण युवाहरूले पनि उपचार खर्चको अभावमा ज्यान गुमाउनुपर्ने अवस्था थियो, धेरैलाई रोगकै कारण रोजगारी गुमाउनुपर्ने उपचारका लागि घरखेत नै बेच्नुपर्ने बाध्यता थियो । ‘ती सबैले सहजै उपचार पाएका छन्, अस्पतालमा बसुन्जेल नि:शुल्क औषधि सेवन गर्न पाएका छन् ।

प्रकाशित : कार्तिक १, २०७४ ०७:३२
ADVERTISEMENT
प्रतिक्रिया
पठाउनुहोस्

ठमेललाई सहज बनाइँदै

दीपेन्द्र विष्ट

काठमाडौं — प्रहरीले पर्यटकीय क्षेत्र ठमेललाई सवारी साधनमुक्त क्षेत्र (भेइकल फ्री जोन) बनाउने तयारी गरेको छ । पर्यटक चापलाई मध्यनजर गर्दै ठमेललाई सुन्दर र ध्वनिरहित बनाउन महानगरीय ट्राफिक महाशाखाको पहलमा कात्तिक ५ देखि सवारी साधनमुक्त क्षेत्र बनाउने तयारी गरेको हो ।

पर्यटन व्यवसायी, स्थानीय जनप्रतिनिधि, स्थानीय क्लब, नागरिक समाज र काठमाडौं महानगरपालिकासँगको समन्वयमा उक्त क्षेत्रमा अति आवश्यक सवारी साधनबाहेक अन्यलाई चलाउन पूर्ण बन्देज लगाउने निर्णय गरेको महानगरी ट्राफिक प्रहरी महाशाखाका प्रमुख सर्वेन्द्र खनालले बताए । ‘सुन्दर, सफा र ट्राफिक चापमुक्त क्षेत्र बनाउन यस्तो अभियानको घोषणा गर्ने तयारी गरेका हौं,’ उनले भने, ‘पर्यटकले निर्धक्क किसिमले हिँडडुल गर्न सकून् भनेर सवारी साधनमुक्त क्षेत्र बनाउन लागेको छौंं ।’

नागरिक समाजकका प्रतिनिधि विश्वभर प्रधानले पाइलट प्रोजेक्टका रूपमा ठमेललाई सवारी साधनमुक्त क्षेत्र बनाउन लागिएको बताए । ‘पर्यटकले स्वतन्त्र रूपमा हिँडडुल गर्न सकून् भन्ने उद्देश्यका साथ चाक्सबारी, सातघुम्ती मार्गमा सवारी साधन सञ्चालन गर्न दिन्नौं,’ उनले भने, ‘कसैलाई दु:ख दिने नियत होइन, खानेपानी, पर्यटक बोकेका गाडीलाई पासको व्यवस्था गर्छौं, पासकै आधारमा ती गाडीलाई भित्र प्रवेश गर्न दिन्छौं ।’

अत्यधिक सवारी चापले पछिल्लो केही समयदेखि ठमेल क्षेत्र धूलो–धूवाँले बस्न नसक्ने अवस्था भएको भन्दै उनले सवारी साधनलाई पूर्ण रूपमा बन्देज लगाइने बताए । ‘ठमेल क्षेत्रका होटल, रेस्टुरेन्टमा राति होस् वा दिउँसो निर्धक्क किसिमले पर्यटक आउजाउ गर्न सकून् भनेर यो निर्णय गरेका हौं,’ उनले भने, ‘सवारी साधनको अत्यधिक चापले हिँडेका बटुवालाई पछाडिबाट गाडीले हिर्काउँछ कि भन्ने डर छ ।’ ठमेल पर्यटन विकास परिषद्का समिक गुरुङले ठमेललाई सवारी साधनमुक्त क्षेत्र घोषणा गर्ने तयारी गरिएको बताए ।

गाडीका लागि निर्धारित सडक

  • सम्पूर्ण सवारी साधन त्रिदेवीमार्गबाट मात्र ठमेलभित्र प्रवेश पाउने

  • ठमेल प्रवेश हुन नपाउने त्रिदेवी मार्ग दुईतर्फी हुने । ज्याठा जाने मार्ग पनि दुईतर्फी हुने ।

  • बाहिर निस्कने सवारी साधनहरू सातघुम्ती, सोह्रखुट्टे ओरालो, क्षेत्रपाटी, भगवती बहाल, अमृतमार्ग, ठहिटीबाट दाहिने र बायाँ जान पाउने

  • क्षेत्रपाटीबाट जेपी मोड हुँदै ठहिटी चोकसम्म दुईपांग्रे सवारी साधनहरू दुईतर्फी नै चल्न दिने

  • ठमेलभित्रको एकतर्फी व्यवस्था कडाइका साथ लागू गर्ने

  • ठमेलभित्रका सडकमा कुनै किसिमका सवारी साधनहरू पार्किङ गर्न नदिने

  • ट्राफिक संकेत ठाउँ–ठाउँमा राखिने

  • वैशाली होटलबाट दक्षिणको दायातर्फ मोड्न नपाइने

  • नर्सिङ चोकबाट केजीएच चोक हुँदै सातघुम्ती र जेपी मार्गबाट केजीएच चोक हुँदै सातघुम्तीसम्मको क्षेत्र सवारी साधनमुुक्त बनाउने

प्रकाशित : कार्तिक १, २०७४ ०७:३२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT