एकल वाचनमा हेमन्त

कान्तिपुर संवाददाता

काठमाडौं — डोट्याली कवि हेमन्त विवश शनिबार धनगढीमा सुनिएका छन् । एकल वाचनमा उनले छन्द र गद्यका दुई दर्जन कविता सुनाए ।

‘भगवानको खोजी’ शीर्षक कविताबाट वाचन थालेका उनले आफ्ना रचनामा भुइँ मान्छेका दु:खका कथा प्रस्तुत गरेको विज्ञप्तिमा उल्लेख छ । बेलाबेलामा उनले डेउडा गीत पनि गाए ।

रोट्रयाक्ट क्लब अफ धनगढी, नेपाली साहित्य तथा संस्कृति प्रतिष्ठान गोदावरी र सुदूरपश्चिमाञ्चल गजल मञ्चद्वारा आयोजित कार्यक्रममा श्रोताहरू सय रुपैयाँको टिकट काटेर आएका थिए । रुबस होटलको हलमा खचाखच भरिएका श्रोताहरू बेलाबेलै ताली बजाएर कविलाई हौस्याइरहे । कार्यक्रममा गायक शिशिर साधकको समूहले विवशका केही गीत गाएको थियो ।

कार्यक्रमको सुरुआतमा महाकाव्यकार मनिराज जोशीले कवि विवश र गायकको समूहलाई फूलमालाले स्वागत गरेका थिए । विवशको यो दोस्रो एकल वाचन हो । यसअघि अली मियाँ लोक वाङ्मय प्रतिष्ठानको निम्तोमा असोज ५ गते पोखरामा कविता वाचन गरेका थिए ।

कार्यक्रममा कविहरू पदमराज जोशी, टोपेन्द्र शाह रसिक, अभि अजनवी र जनक रसिकले कवि विवशको कविताबारे टिप्पणी गरेका थिए ।

विवशका ‘विवशका स्रमाई,’ ‘असौजको जून’ र ‘यादै जनमभरि’ गरी तीन एल्बम, ‘आफ्नै मनसँग’ र ‘सैपालको आँगन’ कवितासंग्रह तथा ‘कथा एउटै तिम्रो मेरो’ प्रकाशित छन् । रेडियो नेपालबाट २०६८ का लागि उनले उत्कृष्ट गीतकार पुरस्कार पाएका थिए । उनका तीन दर्जन गीत रेकर्ड भइसकेका छन् ।

प्रकाशित : मंसिर ४, २०७४ ०८:५६
प्रतिक्रिया
पठाउनुहोस्
ADVERTISEMENT

आरोप–प्रत्यारोप मात्रै नगरौं

नौ–नौ महिनामा फेरिइरहने सरकारदेखि आजित भइरहेका हामी नेपालीलाई राजनीतिक पार्टीबीच भएको गठबन्धन र एकताले अबको चुनावपछि सरकारमा दीर्घकालीन स्थायित्व पाइने आशा पलाएको छ । फुट्नुभन्दा जुट्नु पक्कै पनि सकारात्मक हो ।

नेपाली राजनीतिमा सधैं आरोप–प्रत्यारोप हावी रहेको पाइन्छ । चुनाव नजिकिँदै गर्दा पछिल्ला केही दिनदेखि यता विशेषगरी वाम गठबन्धन र लोकतान्त्रिक गठबन्धनबीच त एकअर्कामा घोचपेच, आरोप, प्रत्यारोपको शृंखला झन्–झन् चुलिँदै गइरहेको छ । त्यसो त यता वाम गठबन्धन देखेर अत्तालिएका हाम्रा प्रधानमन्त्रीको पछिल्लो समयको चर्चित अभिव्यक्ति ‘कम्युनिस्टले जिते रुन पाइँदैन’ आफैंमा हाँसो उठ्दो छ । रुन पाइंँदैन भन्नुको भाव अर्को अर्थमा वाम गठबन्धनले जितेमा जनतामा सुख, समृद्धि, खुसी, उल्लास छाउनेछ । त्यसैले रुन पाइँदैन, अर्थात रुन पर्दैन भन्नेजस्तो पनि देखिन्छ । उता वाम गठबन्धनले पनि अरू पार्टी या गठबन्धनलाई यस्तो र उस्तो नभनी जिम्मेवारपूर्ण र सकारात्मक सन्देश प्रवाह हुनेगरी प्रचार–प्रसारका कार्यक्रम सञ्चालन गर्दा राम्रो हुने थियो । अरू पार्टीका विचार, सिद्धान्त, नेता र कार्यकर्तालाई गाली गरेर उनीहरूको उछित्तो काढेर मात्रै चुनावमा भोट तान्न खोज्नु कदापि उचित नहोला । 
– युवराज अधिकारी 
भरतपुर–१०, सप्तगण्डकी चोक, चितवन

 

प्रकाशित : मंसिर ४, २०७४ ०८:५२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT