गुरूङ कवितामा गायिका पहिलो

गुरुङ फिल्म प्ह्रेंस्यो (दुलही) मा समावेश गरिएको र गुरुङ समुदायमा सर्वाधिक रुचाइएको ‘माया पिरती थेंनो शिरमाथि’ बोलको गीत गाएर श्रोता मनमा बसेकी कुसुमले कविता प्रतियोगितामा पहिलो स्थान पाएकी हुन् । बेंसीसहर नगरपालिका ७, मनाङे चौताराकी उनले मनाङेचौतारा तमु आमा समूहका तर्फबाट प्रतियोगितामा भाग लिएकी थिइन् ।

प्रतियोगितामा तमु प्ये ल्हु संघ लमजुङको युवा संघका अध्यक्ष शेषबहादुर गुरुङ दोस्रो भए । प्रगति टोलका जनकबहादुर गुरुङ तेस्रो भए । आयोजक तमु प्ये ल्हु संघका जिल्ला अध्यक्ष मिलबहादुर गुरुङले पुस १५ गते आयोजना गरिने औपचारिक कार्यक्रममा उनीहरूलाई पुरस्कार वितरण गरिने बताए ।

यस्तै, बिहीबारै आयोजित बेंसीसहरस्थित टोल–टोलका गुरुङ आमाबीचको हाजिरीजवाफ प्रतियोगितामा मनाङेचौतारा आमा समूह पहिलो भएका छन् । प्रगतिटोल आमा समूह दोस्रो, शान्तिटोल आमा समूह तेस्रो र तमु प्ये ल्हु संघको आमा समूह सान्त्वना भएको संघकी सचिव मनमाया गुरुङले बताइन् । गुरुङ समुदायमा भाषा र संस्कृतिप्रतिको घटदो प्रयोगले संकटमा परेको भन्दै यसलाई संरक्षण र सम्वद्र्धन गर्न कविता र हाजिरीजवाफ प्रतियोगिता आयोजना गरिएको प्ये ल्हु संघका अध्यक्ष गुरुङले बताए ।