खाजा कार्यक्रमले नियमित विद्यालय

अनिश तिवारी

सिन्धुपाल्चोक — दिनेश तामाङ हेलम्बु आधारभूत पाठशालामा कक्षा ४ मा अध्ययन गर्छन् । महांकालको ग्याल्थुम निवासी तामाङ विद्यालय जान खुसी हुने गरेको उनका बाआमाले बताए ।

विगतमा प्राय: गयल हुने उनी अहिले नियमित विद्यालय जान थालेका छन् । खाजा पाउने भएपछि उनी अचेल चाँडै विद्यालय पुग्ने गर्छन् । ‘विश्व खाद्य कार्यक्रमले स्थानीय महिला सहकारीसँग सहकार्य गरी विद्यालयमा दिवा खाजाको प्रबन्ध मिलाएको हो । विद्यालय छेउमा लगाएको ताजा तरकारी र स्थानीय स्तरमा उत्पादन गरेको खाद्य सामग्रीलाई दिवा खाजामा समावेश गरिएको छ । बालबालिकालाई आवश्यक शैक्षिक सामग्रीको व्यवस्था पनि सहयोगी हातबाटै प्रबन्ध मिलाइएको छ ।

साथीसँगै बसेर खाजा खान पाइने भएकाले स्कुल आउन खुसी लागेको दिनेशले बताए । ‘खाजा पाएपछि पढ्ने जाँगर चल्यो,’ उनले भने, ‘अहिले कक्षा छाड्न मन लाग्दैन । पढ्न पनि निकै आनन्द लाग्छ ।’ सहकारीका सदस्यले तयार पारेको खाजा विद्यार्थीलाई दिने गरेको महिला सहकारीकी संस्थापक अध्यक्ष निर्मला लामिछानेले बताइन् । विद्यालयका ८४ बालबालिकाले दिवा खाजा र शैक्षिक सामग्री नि:शुल्क पाउने गरेका छन् । ती सबैलाई विद्यालयले छात्रवृत्ति पनि उपलब्ध गराएको छ । अहिले हेलम्बु आधारभूत विद्यालयमा अध्ययनरत विद्यार्थीको शैक्षिक स्तर पनि माथि उठेको छ । 

भूकम्पपछि परिवारमा परेको आर्थिक भारका कारण हिमाली भेगका अभिभावकले आफ्ना छोराछोरीको पढाइमा ध्यान पुर्‍याएका थिएनन् । सहयोगी हातहरूले नयाँ कार्यक्रम ल्याएपछि बालबालिकाप्रति अभिभावक सचेत बनेका छन् । हेलम्बु र महाँकालमा मात्र होइन हिमाली र केही पहाडी बस्तीका २१ विद्यालयमा दिवा खाजा कार्यक्रम लागू गरिएको छ । 

हेलम्बु आधारभूत विद्यालयका प्रधानाध्यापक चन्द्रकुमार लामिछानेका अनुसार बालबालिकालाई चाउचाउ र बिस्कुटजस्ता जंकफुड खाजामाथि प्रतिबन्ध नै लगाएर स्थानीय स्तरमा उत्पादित पौष्टिक खाजा जाउलो, रोटी, तरकारी, अण्डा, फलफूल दिन थालिएको छ । उनले भने, ‘बालबालिका र अभिभावकले पनि जंकफुड खान नहुने बुझ्दै आएका छन् ।’

प्रकाशित : फाल्गुन ६, २०७३ १८:२४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

धावन मार्गमै बटुवा र चौपाया

कान्तिपुर संवाददाता

मुगु — एक साताअघि रारा विमानस्थलबाट उडान भर्न लागेको नेपाल एयरलाइन्सको विमानमा कुकुर ठोक्कियो । चालकको सावधानीले दुर्घटना भएन । गत बिहीबार पनि चालकले कुकुरबाट जहाजलाई जोगाएका थिए ।

जिल्लाको एकमात्र रारा विमानस्थलमा तारजाली नलगाउँदा विमान उडान भर्ने र अवतरण गर्ने समयमा सुरक्षाकर्मीले निकै सास्ती खेप्नुपर्छ । विमान कम्पनीको प्रतिस्पर्धाले हवाई उडानमा वृद्धि भए पनि तारबार नहुँदा सुरक्षामा चुनौती थपिएको हो ।

तारबार र पर्खाल नहुँदा धावनमार्गबाटै बटुवा, विद्यार्थी र चौपाया ओहोरदोहोर गर्छन् । उडान र अवतरणको समयमा चौपाया र बटुवालाई रोक्न प्रहरीलाई धौ–धौ पर्ने गरेको छ । 

विद्यार्थी पनि विमानस्थलकै बाटो हुँदै आवत–जावत गर्छन् । जहाजले अवतरण र उडान गर्ने बेला विद्यार्थीलाई बीच बाटामै रोक्नुपर्ने बाध्यता छ । यसले विद्यार्थीको पठनपाठनमा समेत अवरोध पुर्‍याएको छ । स्थानीयले प्रयोग गर्दै आएको मुख्य बाटोले विमानस्थल वारपार गर्छ । वन/जंगलबाट घाँस, दाउरा लिएर आउने स्थानीय पनि त्यहींबाट आउजाउ गर्छन् । 

विमानस्थल कालोपत्रे भए पनि वरिपरि अझै घेराबार भएको छैन । तारजाली नहुँदा चौपाया पनि पस्ने गरेको प्रहरीले जनाएको छ । मुगुमा तारा, गोमा, सीता, मकालु र नेपाल एयरलाइन्सले उडान भर्ने गरेका छन् । सुर्खेत र नेपालगन्जबाट दैनिक पाँचदेखि सात वटासम्म उडान हुने गरेको विमानस्थल कार्यालयले जनाएको छ । 

सुरक्षा चेकजाँच गर्ने भवनसमेत निर्माण नहुँदा थप समस्या भएको कर्मचारी बताउँछन् । काठको टहरामै सुरक्षा चेकजाँच पोस्ट बनाइएको छ । रारा नागरिक उड्डयन कार्यालयका प्रमुख विशाल पाण्डेयले खुला विमानस्थलमा जहाज अवतरण गर्दा समस्या हुने गरेको जनाए ।

प्रकाशित : फाल्गुन ६, २०७३ १८:२४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT