संयुक्त सैनिक अभ्यास सम्पन्न
काठमाडौं — राष्ट्रसंघको शान्ति मिसनमा खटिँदा शान्ति स्थापना सहज होस् भन्ने लक्ष्यसहित चैत ७ देखि काभ्रेमा सुरु भएको २८ मुलुकका १ हजार १ सय ३५ सैनिक सम्मिलित अभ्यास ‘शान्ति प्रयास–३’ सोमबार सकिएको छ ।
सैनिक अभ्यास नेपाली र अमेरिकी सेनाको प्यासिफिक कमान्डको सहआयोजनामा काभ्रेको पाँचखालस्थित वीरेन्द्र शान्ति कार्य तालिम केन्द्रमा भएको थियो ।
रक्षामन्त्री बालकृष्ण खाँणले संयुक्त सैनिक अभ्यासले शान्ति स्थापना कार्यमा संयुक्त राष्ट्रसंघबाट तोकिएको जिम्मेवारी सफलतापूर्वक कार्यान्वयन गर्न शान्ति सैनिकहरूको पेसागत ज्ञान तथा मनोबलमा थप अभिवृद्धि गराउने बताए । उनले संयुक्त अभ्यासबाट शान्ति स्थापना कार्यमा खटिने विभिन्न मुलुकका सैनिकबीच आपसी सद्भाव, सहयोग र समन्वयमा वृद्धि भई शान्ति स्थापना कार्यमा अझै निखार आउने विश्वास व्यक्त गरे ।
समापन कार्यक्रममा ब्यान्ड डिस्प्ले, सांस्कृतिक कार्यक्रम, हेलिकप्टरबाट फ्लाइपासको साथै ब्यानर डिस्प्लेलगायत अनआर्म कम्ब्याटको समेत प्रस्तुत गरिएको थियो । अभ्यासका क्रममा स्टाफ ट्रेनिङ इभेट, फिल्ड ट्रेनिङ इभेन्ट, क्रिटिकल इनाब्लेर एन्ड क्यापाविलिटी इनहेन्स गरी ३ किसिमको तालिमका साथै क्षेत्रीय सेमिनार ‘क्यापाविलिटी डेभलपमेन्ट एन्ड इम्प्रुभिङ पर्फरमेन्ट इन पिस किपिङ’ सञ्चालन गरिएको सैनिक जनसम्पर्क निर्देशनालयले जनाएको छ ।
प्रकाशित : चैत्र २२, २०७३ ०८:०१
