करोड ठग्ने पक्राउ
लमजुङ — काठमाडौंमा एक करोड रुपैयाँभन्दा बढी ठगेर फरार एक युवकलाई प्रहरीले लमजुङमा पक्रेको छ । सिन्धुली घर भएका विजय ढकाललाई शनिबार बेंसीसहरमा पक्राउ गरी काठमाडौं पठाइएको डीएसपी समीरचन्द्र खरेलले बताए । उनका अनुसार ढकाल २ महिनादेखि फरार थिए ।
चीनबाट फलफूल ल्याएर नेपालमा विक्री गर्दै आएका ढकालले सँगै व्यवसाय गर्ने साथीको रकम ठगी गरेको प्रहरीले जनाएको छ । करोड रुपैयाँभन्दा बढी रकम लिएर ढकाल फरार भएपछि साझेदार राजीव श्रेष्ठले अपराध महाशाखा काठमाडौंमा उजुरी दिएका थिए ।
ढकालले प्रयोग गर्ने मोबाइल नम्बरको लोकसेनका आधारमा लमजुङ आएको पत्ता लागेको प्रहरी स्रोतले बतायो । ढकालका पार्टनर श्रेष्ठ बेंसीसहर आएर सोधपुछ गरेपछि सेरास्थित एक होटलमा कोठा लिएर बसेको अवस्थामा फेला परेका हुन् ।
प्रकाशित : असार ४, २०७४ ०९:४९प्रतिक्रिया
