घर फर्किनै सकस

भरतपुर ब्युरो

भरतपुर — अविरल वर्षाका कारण सयौं कच्ची घर भत्किएका छन् । हजारौं घरमा पानी जमेकाले बस्न सक्ने अवस्था छैन । पीडितहरू नजिकका विद्यालयमा आश्रित छन् । सर्लाही, रौतहट र बारा जिल्लामा पानी घट्ने क्रम जारी छ । पर्सा, मकवानपुर र चितवनमा पनि पानीको सतह घटेको छ ।

नारायणीको बाढीले नवलपरासीस्थित त्रिवेणी आसपासका बस्ती डुबानमै छन् । त्यसैले क्षतिको विवरण संकलन बाँकी छ । मध्य तराईका जिल्लामा एउटाबाट अर्को बस्तीमा पुग्नका लागि अहिले पनि डुंगाको आवश्यकता छ । ६ देखि ८ फिटसम्म पानी जमेकाले सरकारी अधिकारी र सुरक्षाकर्मीलाई राहत सामग्री पुर्‍याउन र उद्धारमा कठिनाइ छ ।

Yamaha

चितवनका विस्थापित सोमबारदेखि घर फर्किन थालेका छन् । स्थानीय प्रशासनले डुबानस्थलबाट उद्धार गरी नजिकका विद्यालयमा राखेको थियो । डुबानमा परेका १५ सय ३४ परिवार सोमबार घर फर्केका छन् । तर, घर बस्नलायक छैनन् । वर्षा हुन छाडेपछि उनीहरू घर फर्किन थालेको एसपी दीपक थापाले बताए । ‘पीडित सबैका घर डुबानमा परेकाले मानवीय क्षति हुन नदिन उद्धार गरेका थियौं,’ उनले भने ।

उनीहरूलाई जगतपुर र मेघौली निमाविमा राखिएको थियो । भरतपुर महानगरका १३, २३, २७ र २८ नम्बर वडा सबैभन्दा धेरै प्रभावित छन् । माडीको १, २, ३ वडाका २१ भत्किएका छन् । सोमबार प्रभावित क्षेत्रमा पुगेर महानगर प्रमुख रेणु दाहालले खाद्यान्नलगायत राहत वितरण गरेकी छन् । ‘हामीले बाढीपीडितलाई सहयोगका लागि विपद व्यवस्थापन कोष खडा गरेका छांै,’ दाहालले भनिन्, ‘त्यसरी संकलन भएको राहत महानगरभित्र एकद्वार प्रणालीबाट वितरण गर्ने योजना छ ।’

५ सय घर भत्किए
लगातारको झरीले सर्लाहीका ५ सय घर भत्केका छन् । हजारौं घर जलमग्न छन् । वाग्मतीले बाँध फुटाएर बस्ती प्रवेश गरेकाले क्षति बढेको हो । प्रजिअ प्रदीपराज कँडेलले कम्तीमा ५ सय घर भत्केको प्रारम्भिक अनुमान रहेको बताए । ‘तथ्यांक संकलन गर्न बाँकी छ,’ उनले भने, ‘घर भत्केका ५ सय परिवार विस्थापित छन् । एक हजारभन्दा बढी घर जलमग्न छन् ।’

सेनाले वाग्मती र मनुषमाराले दुवैतिर घेरा हालेर टापु बनाएको बस्तीसम्म पुगेर उद्धार जारी राखेको छ । सेनाको हेलिकप्टरले सोमबार राहत सामग्री मलंगवामा झारेको छ । पानी पर्न रोकिएको ३२ घण्टा भएकाले डुबानमा परेका बस्तीमा सतह घट्ने क्रम जारी छ । सोमबार मन्त्री प्रभु साह र ३ जना सांसद बाढीको अवस्था बुझ्न हेलिकप्टरमा मलंगवा आएका थिए ।

हजार विस्थापित
बाराका विभिन्न खोलामा आएको बाढी बस्ती पसेपछि एक हजार घरबारविहीन बनेका छन् । उनीहरूले स्थानीय विद्यालयमा आश्रय लिइरहेका छन् । ४ दिनदेखिको भीषण वर्षा थामिएपछि यहाँ जनजीवन भने क्रमश: सामान्य बन्दै गएको छ । विस्थापित भई विद्यालयलगायतका ठाउँमा शरण लिई बसिरहेका बाढीपीडितलाई विभिन्न संघसंस्था, रेडक्रस, उद्योग वाणिज्य संघ र दलहरू सुख्खा खानेकुरा वितरण गर्न सुरु गरेपछि उनीहरूले थप राहत महसुस गरेका छन् । जमुनी, तियर, बंगरी, अडुवा, दुधौरा, पसाहा, लालबकैया, थलहीलगायतका खोलाहरूमा पानीको बहाव घटेको छ । पानी घटेपछि तीन दिनदेखि बाढीले थुनिएका सयौं परिवारलाई राहत मिलेको बाढी प्रभावित भौराका गाविस सचिव पुनित जयसवालले बताए । ‘तीन दिनदेखि चुल्हो बाल्न नसकेका पीडितहरूले चौथो दिन चुलो बालेका छन्,’ कलैया–१४ का रामप्रवेश यादवले भने, ‘भौराका सय दलित समुदाय विद्यालयमा बास बसिरहेका छन् ।’

प्रजिअ विजयनारायण मानन्धरका अनुसार प्रारम्भिक अनुगमनपछि झन्डै हजार घरपरिवार विस्थापित भएको अनुमान गरिएको छ । तीमध्ये अधिकांश दलित तथा पिछडिएका समुदायका छन् । कच्ची घर भएकाले अधिकांश भत्केका हुन् । ‘संघसंस्था तथा सहयोगीहरूको समन्वयमा सबै ठाउँमा राहत सामग्री वितरण भइरहेको छ,’ दैवी प्रकोप उद्धार समितिका संयोजकसमेत रहेका प्रजिअ मानन्धरले भने, ‘क्षतिको विवरणसँगै पीडित परिवारहरूको पहिचान गरी नामावली संकलन गर्दै छौं ।’

घर भत्किएर मृत्यु
आइतबारदेखिको वर्षाले माटोको कच्ची घर भत्किँदा एक किशोरको मृत्यु भएको छ । विभिन्न स्थानमा गरी माटोका कच्ची ६ वटा घर भत्केका छन् । प्रहरीका अनुसार कोटइमाई गाँउपालिका–१ सिपुवामा सोमबार बिहान घर भत्केर १५ वर्षीय रोशन हरिजनको मृत्यु भएको हो ।

उनका बुबा ५२ वर्षीय फागु हरिजन र आमा ४८ वर्षीया शिला हरिजन घाइते भएका छन् । रूपन्देहीका डीएसपी बेलबहादुर पाण्डेले घटनाको जानकारी पाउनासाथ घटनास्थलमा प्रहरी पठाएर उद्धार गरिएको बताए ।

यस्तै कांग्रेस जिल्ला कार्यसमिति पदाधिकारी लगायत क्रियाशील सदस्यबाट रकम संकलन गरी रूपन्देहीलगायत प्रभावित जिल्लाका बाढी–पहिरोबाट पीडित र कठिन अवस्थामा रहेका परिवारलाई सहयोग गर्ने भएको छ । कांग्रेस रूपन्देहीका सभापति तथा सांसद अब्दुल रज्जाकको सभापतित्वमा सोमबार भैरहवामा बसेको बैठकले राहतका लागि जिल्लामा रहेका महाधिवेशन प्रतिनिधि, महासमिति सदस्य, जिल्ला कार्यसमिति, क्षेत्रीय पदाधिकारी, नगर पदाधिकारीबाट न्यूनतम अनिवार्य हजार र सबै क्रियाशीलबाट न्यूनतम अनिवार्य सय रुपैयाँ संकलन गर्ने निर्णय गरेको छ ।

सुस्तामा डुबान
नवलपरासीको सीमावर्ती बस्ती सुस्ताका सबै २ सय ६५ घरमा सोमबार पानी पसेको छ । नारायणीको बाढी पसेको हो । त्यहाँका सबै घरमा २ देखि ६ फिटसम्म पानी जमेको प्रशासनले जनाएको छ ।

सर्वसाधारणलाई त्यहाँस्थित दलित प्राथामिक विद्यालय र अन्य २ आश्रय स्थलमा अस्थायी बसोबास गराइएको छ । केही संघसंस्थाले विस्थापितको खाने र अस्थायी बासको व्यवस्था मिलाएको छ । स्वयंसेवक र सशस्त्र प्रहरीले आपतकालीन उद्धार गरेर आश्रयको व्यवस्था मिलाएका हुन् । बाढी पसेपछि घरमा बस्न नमिल्ने अवस्था आएको सहमति संस्थाका कर्मचारी सुरेश पौडेलले जानकारी दिए । पक्लिहवा, गुठी सूर्यपुरा, नरसही, कुडियाका ३ सय ९१ सय घर डुबानमा परेका छन् । उनीहरूलाई नजिकको विद्यालयमा बासोबास गराइएको प्रतापपुर गाउँपालिका अध्यक्ष राजकुमार शर्माले जानकारी दिए ।

घर र चौपाया बगे
नारायणीको बाढीले मध्यविन्दु नगरपालिका २, नारायणी किनारका ११ वटा घर र १३ वटा चौपाया बगाएको छ । त्यहाँ मानवीय क्षति छैन । सेहरीका अन्य ३ सय घरमा नारायणीको बाढी पसेको छ ।

ठोरीमा क्षति
शनिबार र आइतबारको वर्षाले जिल्लाको विकट ठोरी गाउँपालिकामा पनि व्यापक क्षति पुगेको छ । त्यहाँ खहरेखोलामा आएको बाढीले ५ दर्जनभन्दा बढी परिवार विस्थापित भएका छन् ।

प्रकाशित : श्रावण ३१, २०७४ ०८:४१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

अस्पताल अघिल्तिरै जिप डुब्यो

प्रसव बेथा लागेकीसहित परिवारका सबै ६ जनाको मृत्यु
भरतपुर ब्युरो

रौतहटको परोहा गाउँपालिका–३ की गर्भवती शर्मिला यादवलाई प्रसव बेथाले च्यापेपछि आइतबार बिहान सुत्केरी गराउन अस्पताल लैजाने क्रममा जिप डुबेपछि उनीसहित परिवारका ६ जनाको मृत्यु भएको छ ।

जिप चालक र अर्का एक व्यक्ति भने पौडिएर बच्न सफल भएका छन् । शर्मिला, उनका पति चन्दनकिशोर, ३ वर्षीया छोरी छोटीकुमार, शर्मिलाकी आमा ५४ वर्षीया सुमित्रादेवी, काकी ३८ वर्षीया ललिता र भाइ २५ वर्षीय सरोज यादवको मृत्यु भएको हो ।
चालक शम्भु यादवले बाढीमा अनुमानका आधारमा सडक ठानेर जिप चलाइरहँदा नहरमा खस्न पुगेको बताएका छन् । जिल्ला प्रहरी प्रमुख एसपी यज्ञविनोद पोख्रेलका अनुसार अस्पताल पुग्न सय मिटर मात्रै बाँकी छँदा उनीहरू चढेको बीएच२६एवाई १९३९ नम्बरको भारतीय जिप नहरमा खसेको थियो । स्थानीय र प्रहरीले उनीहरूको शव घटनास्थलबाट बाहिर निकालेका थिए । बाढीले जिल्लाभर ६ देखि ८ फिटसम्म पानी जमेको छ । डुबानकै कारण प्रमुख जिल्ला अधिकारीलगायत सुरक्षा निकायका प्रमुख आइतबार पनि घटनास्थल पुग्न सकेनन् ।
पीडितले शव बुझेर घरमा लगेका छन् । परिवारमा रुवाबासी चलेको छ । परिवारका सबैको मृत्यु भएपछि बस्तीमा शोक छाएको छ । एकातिर बाढीले बिचल्ली छ, अर्कोतर्फ आफन्त र छिमेकी गुमाएपछि गाउँमा चुलो बलेको छैन । स्थानीयले जताततै पानी जमेकाले अन्तिम संस्कार गर्नसमेत समस्या परेको बताए । डुबानका कारण एक बस्तीबाट अर्कोमा पुग्न सकिएको छैन । जिल्लामा बिजुली र टेलिफोन सेवा अवरुद्ध छ । पीडितले आइतबार साँझसम्म पनि राहत पाउन सकेका छैनन् ।

एसपी पोख्रेलका अनुसार बाढीले बगाएर देवाही–२ की ६५ वर्षीया जोगिया देवी, दुर्गा भगवती–६ की ४० वर्षीया कोशिला देवी र ईशनाथ–९ का १४ वर्षीय सकिल देवानको पनि मृत्यु भएको छ । विभिन्न खोलाले बगाएर आइतबार रौतहट राजपुर–३ का मताज खान र अन्य पाँच जना बेपत्ता रहेको प्रहरीले जनाएको छ । देवाही र गुजरामा पनि एक/एक जना बगेर बेपत्ता भएका छन् । उनीहरूको साँझसम्म पत्तो लागेको छैन ।

परिवारै पहिरोमा
मकवानपुरमा बाढी र पहिरोमा परेर ५ जनाको ज्यान गएको छ भने एकै परिवारका ६ बेपत्ता छन् ।
बकैया गाउँपालिका–१० मा आइतबार बिहान पहिरोले मंगलसिंह न्यासुरको घर पुर्दा उनी, पत्नी, ४ छोरी र १ छोरासहित ७ जना पुरिएका हुन् । पहिरो पन्छाएर खोज्ने क्रममा ७ वर्षीया पाल्मको मात्र शव फेला परेको छ । अन्य ६ जना बेपत्ता छन् । घरमा सबै जना सुतिरहेको अवस्थामा बिहान ४ बजे पहिरोले घर पुरेको प्रहरी उपरीक्षक विकासराज खनालले बताए । ५० वर्षीय मंगलसिंह, ४५ वर्षीया सुनमाया, १० वर्षीया हिरा, ८ वर्षीया सानु र २ वर्षीय विकास बेपत्ता छन ।
यस्तै बकैया–१ धियालकी ३२ वर्षीया सुनमाया मोक्तान, बकैया–६ छतिवनका ४० वर्षीय वीरबहादुर मोक्तान र हेटौंडा उपमहानगर–१३ का २५ वर्षीय ज्ञानबहादुर हिमडुङको पनि बगेर मृत्यु भएको छ । पहिरोले घर पुर्दा भीमफेदी–८ इपापाखा टोलकी ५० वर्षीया मिठुमाया दानीको ज्यान गएको छ ।

५ को मृत्यु, ३ बेपत्ता
चितवनमा आइतबार बाढीले तीनको ज्यान लिएको छ । राप्ती नगरपालिका–८ स्थित पम्फा खोलाको बाढीले बगाएर स्थानीय गुमनकुमारी रानामगरको मृत्यु भएको हो । त्यस्तै राप्ती–४ का फूलमती प्रजाको घर ढलेर ज्यान गएको छ । उनका अनुसार बिहान इच्छा कामना गाउँपालिका–३ कोरेकका कमलबहादुर चेपाङ बारबाङ खोलामा आएको बाढीले बगाएर मृत्यु भएको हो । राप्ती नगरपालिकाका ५५ वर्षीय रणबहादुर चेपाङ बाढीमा परी बेपत्ता भएका छन् । चितवनको राप्ती र केरुङ नदीमा आएको बाढीले डुबानमा पारेपछि भरतपुर–२३ स्थित जगतपुरको बलहठ्ठामा रहेको आशा अनाथालयमा फसेका २ सय ५० बालबालिकालाई नेपाली सेनाको हेलिकप्टरले उद्धार गरेको छ । यस्तै बाराको पसाहा खोलाको बाढीमा डुबेर महागढीमाई–१ बरियारपुरका १२ वर्षीय मैफुज मियाँको मृत्यु भएको छ । उनीसँगै रहेका ११ वर्षीय (नजिर हुसेनका छोरा) सरफाज हुसेनलाई स्थानीयले उद्धार गरेका थिए । सर्लाहीमा लखनदेही नदीले बगाउँदा बरहथवा नगरपालिका–१६ की १७ वर्षीया रुनुकुमार मण्डलको मृत्यु भएको छ । बाढीले पर्सामा २ जनालाई बगाएर बेपत्ता बनाएको प्रहरीले जनाएको छ । जगरनाथपुर–१ पिपडारीकी ५५ वर्षीया बुनी महतो र पकाहामैनपुर गाउँपालिका–५ खेस्राहामा भारत बेतियाका ५५ वर्षीय रामस्वरूप माझीलाई बाढीले बगाएको हो ।
(शिव पुरी/पवन यादव/प्रताप विष्ट)

प्रकाशित : श्रावण ३०, २०७४ ०६:३०
पूरा पढ्नुहोस्
प्रतिक्रिया
पठाउनुहोस्
ADVERTISEMENT