कोमामा रहेका सार्कीको परिवारलाई घर

कान्तिपुर संवाददाता

भक्तपुर — साउदी अरबबाट कोमामा फर्केका रामकृष्ण सार्कीको परिवारलाई घर निर्माण गरी हस्तान्तरण गरिएको छ । सामाजिक सञ्जाल अभियानमार्फत स्वदेश तथा विदेशमा रहेका नेपालीबाट संकलित रकमले चाँगुनारायण नगरपालिका–४, संगम टोलका ४३ वर्षीय रामकृष्ण सार्कीको परिवारलाई घर निर्माण गरी हस्तान्तरण गरेको छ ।

वैदेशिक रोजगारीका लागि उनी साउदी अरब पुगेर चार वर्षअघि कोमामा फर्किएका थिए । सार्कीको परिवार ०७२ वैशाखको भूकम्पका कारण घर भत्किएपछि करिब ३० महिनायता कुखुरा पाल्न बनाइएको टहरामा बसेका थिए । सामाजिक सञ्जालबाट दीनदु:खीहरूको सेवामा कार्यरत सामाजिक अभियन्ता ढिकुरपोखरी–६, पाउदुरकोट कास्कीकी सरिता गुरुङले शुक्रबार घर हस्तान्तरण गरेकी हुन् । सामाजिक संकलित रकमबाट चारकोठे भूकम्प प्रतिरोधी घर निर्माण गरिएको थियो । सार्कीको आवास पुनर्निर्माणका लागि विभिन्न सामाजिक सञ्जालमार्फत ११ लाख १२ हजार ५ सय ५५ रुपैयाँ संकलन भएको उनले बताइन् ।

सार्कीको आवास पुनर्निर्माणका लागि सरिता गुरुङ फाउन्डेसनले डेढ लाख रुपैयाँ सहयोग गरेको उनले बताइन् ।

प्रकाशित : कार्तिक २८, २०७४ ०९:३०
प्रतिक्रिया
पठाउनुहोस्

नगर प्रमुखको घरजग्गा कब्जा

कान्तिपुर संवाददाता

खोटाङ — विप्लव माओवादीले हलेसी तुवाचुङ नगरपालिका प्रमुख इवन राईको घरजग्गा कब्जा गरेको छ । उक्त समूहले घरमा विज्ञप्ति टाँसेर हलेसी तुवाचुङ नगरपालिका ६ मंगलटारस्थित घरजग्गा नियन्त्रणमा लिएको जनाएको हो ।

सेक्रेटरीबाट हस्ताक्षरित विज्ञप्तिमा मेयर राईको स्वामित्वमा रहेको घर, जग्गा, सम्पत्ति कब्जा गरेर जनतालाई उपभोग गराउने उल्लेख गरिएको छ । विज्ञप्तिमा भनिएको छ, ‘खोटाङका जनतालाई गुण्डा र पैसाको बलमा चुनाव जितिसकेर देश लुट्न लागिपरेका राई दलाल संसदीय व्यवस्थाको मतियार बनेको हुँदा निजको स्वामित्वका सम्पूर्ण सम्पत्ति हाम्रो पार्टीको नियन्त्रणबाट जनताले उपभोग गर्ने जानकारी गरिन्छ ।’

 

प्रकाशित : कार्तिक २८, २०७४ ०९:३०
पूरा पढ्नुहोस्
प्रतिक्रिया
पठाउनुहोस्