‘सदन’ जस्तै नगरसभा

ठाकुरसिंह थारू

नेपालगन्ज — सांसद भवनमा सदन चलेको दृश्य स्थानीय तहमा देखिन थालेका छन् । नेपालगन्ज उपमहानगरपालिकाको शुक्रबार भएको पहिलो नगरसभामा त्यही दृश्य दोहोरियो । नगर सदस्यहरू पनि सांसदकै पहिरनमा उपस्थित थिए । मुलुक संघीयतामा गएपछि सांसदजस्तै नगरसभा भएको नेपालगन्जवासीका लागि पहिलो अनुभव हो ।

सभामा मेयर डा. धवलशम्शेर राणाले आव ०७४/७५ को नीति तथा कार्यक्रम पेस गरे । उपमेयर उमा थापा मगरले प्रस्तावित बजेट पेस गरिन् । नगरसभा सदस्यले प्रस्तावित नीति तथा कार्यक्रम र बजेटमाथि खुलेरै टिप्पणी गरे । यसअघि नीति तथा कार्यक्रम सरकारले पठाउँथ्यो । यसपल्ट भने जनप्रतिनिधिले स्थानीय तहबाटै तर्जुमा गरेका छन् । सभाले आर्थिक तथा राजस्व संकलनलाई बढी प्राथमिकतामा परेको छ । आन्तरिक राजस्व वृद्धि, एकीकृत सम्पत्ति वृद्धि, घरधनी र व्यावसायिक करको दायरा विस्तार गर्ने नीति लिइएको छ । 

‘त्यससँगै बहाल, यातायात करको दायरा बढाइने छ,’ नीति तथा कार्यक्रम प्रस्ताव गर्दै मेयर राणाले भने, ‘स्थानीय स्तरबाट करको दायरा बढाएर नेपालगन्जलाई स्मार्ट सिटीका रूपमा विकास गरिने छ ।’ त्यस्तै, भौतिक पूर्वाधार तथा योजनाअन्तर्गत चक्रपथ निर्माण, नगरका सबै सडक कालोपत्रेलगायत महत्त्वाकांक्षी योजना अघि सारिएको छ । भवन आचारसंहिता तथा मापदण्ड, कृषि विकाससँग सम्बन्धित नीति, पशु विकास, स्वास्थ्य, शिक्षा तथा खेलकुद, घरेलु तथा साना उद्योग, धर्म, संस्कृति तथा पर्यटन पूर्वाधार विकास, वातावरण तथा सरसफाइ, लैंगिक समानता तथा सामाजिक समावेशीकरण, संस्थागत क्षमता विकास र सुशासन, विपद् व्यवस्थापनलगायत नीतिहरू पेस गरिएका छन् । 

नीति तथा कार्यक्रम र प्रस्तावित बजेटमाथि टिप्पणी गर्दै नगरसभा सदस्य तरुण ब्रजाचार्यले वडाअध्यक्षलाई अधिकारविहीन बनाएको गुनासो गरे । त्यस्तै अर्का सदस्य दीपक बर्माले पनि विकास योजनाका काम वडाबाटै हुनुपर्ने धारणा राखे । उपमेयर मगरले आगामी आवका लागि २ अर्ब ७७ करोड ९ लाख १ हजार ५ सय ९६ रुपैयाँको बजेट प्रस्ताव गरेकी छन् । उनले स्थानीय सरकार सञ्चालन ऐन ०७४, स्थानीय तहको योजना तथा बजेट तर्जुमासम्बन्धी दिग्दर्शन आवधिक योजनाले परिलक्षित गरेका लक्ष्य प्राथमिकतामा परेको बताइन् ।

उनले मध्य र सुदूरपश्चिमकै केन्द्रका रूपमा रहेको नेपालगन्जलाई विकासको उत्कृष्ट नमुना सहर बनाउने दाबी गरिन् । ‘स्थानीय तहमा आफैं योजना बनाउने र सांसदजस्तै छलफल गर्ने अभ्यास पहिलो हो,’ नेपालगन्ज उपमहानगर प्रमुख प्रशासकीय अधिकृत हरि प्याकुरेल भन्छन्, ‘यसले अपनत्व महसुस गराउँछ ।’

 

प्रकाशित : मंसिर ९, २०७४ ०८:०६
ADVERTISEMENT
प्रतिक्रिया
पठाउनुहोस्

मतदान केन्द्रमा सर्वदलीय बैठक बस्दै

मनोज बडु

दार्चुला — पहिलो चरणमा हुने निर्वाचनलाई शान्तिपूर्ण र भयरहित सम्पन्न गर्न यहाँका सबै मतदान केन्द्रमा खटिएका निर्वाचन अधिकृत दलहरूसित छलफलमा व्यस्त छन् ।

शुक्रबार दिउँसोसम्म सम्बन्धित मतदान केन्द्रमा भाग लिने दलका प्रतिनिधिहरूसित स्वच्छ, शान्तिपूर्ण तवरमा निर्वाचन गराउन छलफल भइरहेको महेन्द नमुना मावि केन्द्रका अधिकृत विष्णुराज जोशीले बताए ।

मतदान केन्द्र पुगिसकेकाले बिहीबार नै मतदान केन्द्रको चारकिल्ला छुट्याई निर्वाचन आचारसंहिता कार्यान्वयनको अवस्था बुझ्ने र सुरक्षा अवस्थाबारे सुरक्षा निकायसँग समन्वय गरेको उनले जानकारी दिए ।

मतदान अधिकृतहरू शुक्रबार बिहानैबाट केन्द्रका बारेमा मुख्य निर्वाचन अधिकृतको कार्यालयलाई जानकारी गराइरहेको मुख्य निर्वाचन अधिकृत राजेन्द्र नेपालले बताए । सबै मतदान अधिकृतले बिहीबार मतदान केन्द्रका चार किल्ला तोकेको र शुक्रबार बिहानैबाट सर्वदलीय बैठक बोलाएर निर्वाचनबारे जानकारी गराइसकेका छन् ।

जिल्लाका १ सय १० मतदानस्थल र १ सय २९ केन्द्रमा बिहीबार नै कर्मचारी र सुरक्षाकर्मी पुगिसकेको मुख्य निर्वाचन अधिकृतको कार्यालयले जनाएको छ । सबै मतदान अधिकृतले शुक्रबारदेखि मतदाता परिचयपत्र वितरण गरिरहेका छन् । सबै केन्द्रमा सुरक्षा व्यवस्थापन, कर्मचारी खटपटन र जिम्मेवारी तोक्ने काम भइरहेको छ । 
सुरक्षा व्यवस्था कडा
निर्वाचनलाई शान्तिपूर्ण ढंगले सम्पन्न गर्न जिल्लाभरको सुरक्षा व्यवस्था कडा पारिएको छ । सबै मतदान केन्द्रमा चारवटै सुरक्षा निकाय परिचालन गरिएको छ ।

नेपाल प्रहरीसँगै म्यादी, नेपाली सेना, सशस्त्र प्रहरी र राष्ट्रिय अनुसन्धानका कर्मचारी परिचालन गरिएको जिल्ला सुरक्षा समन्वय समितिले जनायो । सुरक्षा समितिका अनुसार स्थानीय तह निर्वाचन, पछिल्ला विकसित घटनाक्रम र सुरक्षा योजना तयार पारी तथा केन्द्रीय योजनाअनुसार विकसित घटना क्रमलाई आधार मानेर १ सय २९ मतदान केन्द्रमध्ये १९ अतिसंवेदनशील, २५ संवेदनशील र ८५ केन्द्रलाई सामान्य किसिममा राखेर सुरक्षा अवस्था व्यवस्थापन गरिएको समिति संयोजक एवं प्रमुख जिल्ला अधिकरी जनार्दन गौतमले जानकारी दिए ।

समितिका अनुसार चारै सुरक्षा निकायका दुई हजारभन्दा बढी सुरक्षाकर्मी परिचालन गरिएको प्रजिअ गौतमले बताए । सुरक्षा संवेदनशीलतालाई ध्यान दिँदै समितिले प्रत्येक केन्द्रमा नेपाल प्रहरी र म्याद परिचालन गरिएको छ । साथै जिल्लाका ९ वटै स्थानीय तहमा नेपाली सेनाको अस्थायी क्याम्प राखी परिचालन गरिएको र सशस्त्र प्रहरीले पनि पस्ती, धुलीगडा र लटिनाथमा अस्थायी वेश क्याम्प राखेर सबै मतदान केन्द्रमा गस्ती गरिरहेको संयोजक गौतमले जानकारी दिए ।

त्यस्तै सुरक्ष संवेदनशीलतालाई हेरेर भारत सीमा जोडिएका ५ वटा नाका बिहीबार बेलुकी ७ बजेदेखि ७२ घण्टाका लागि सिल गरिएका छन् । भारतीय सीमा जौलजिवी, दत्तु, खलंगाको पुलघाट, तिग्रम र ब्यासको सीतापुल नाकालाई सिल गरिएको प्रजिअ गौतमले बताए । योसँगै सीमा क्षेत्रमा सुरक्षा निगरानीसमेत बढाएको उनको भनाइ छ । 

 

प्रकाशित : मंसिर ९, २०७४ ०८:०६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT