उर्लिए मतदाता

कान्तिपुर टिम

विराटनगर — प्रदेश १ का सात जिल्लामा बिहीबार प्रतिनिधिसभा र प्रदेशसभा सदस्य चयन गर्न भएको मतदानमा उत्साहपूर्ण सहभागिता देखिएको छ । चिसो मौसम र धान थन्क्याउने चटारोबीच ग्रामीण क्षेत्रका मतदान केन्द्रमा बिहानको समयमा मतदाताको उपस्थिति पातलो थियो ।

मध्याह्नपछि भने उल्लेख्य संख्यामा सर्वसाधारणले मतदान गरे । मतदान केन्द्रहरूमा महिलाको उपस्थिति बाक्लो थियो । सहरी क्षेत्रका केन्द्रमा भने बिहानैदेखि मतदाताको भीड लागेको थियो ।

एकै केन्द्रमा १५ किरियापुत्री
आफन्तको मृत्युले शोकाकुल भए पनि धरान–६ पानबारीस्थित घोपालीमार्गका तीन परिवारका १५ जना किरियापुत्रीले मतदान गरेका छन् । उनीहरूले सुनसरी क्षेत्र नम्बर १ को ‘क’ अन्तर्गत पर्ने पानबारीको सरस्वती उच्च मावि केन्द्रमा मत खसालेका हुन् । जनआन्दोलन ०६२/०६३ पछिको ऐतिहासिक चुनाव भएकाले मतदानमा सहभागी भएको उनीहरूले बताए । 
 किरियापुत्रीलाई अरूले छोइछिटो गर्न नहुने संस्कार रहेकाले निर्वाचन कार्यालयले दिउँसो २ बजेको समय तोकी उनीहरूका लागि सहज मतदानको व्यवस्था मिलाएको साबिक पाँचकन्याका पूर्वअध्यक्ष रमेश बस्नेतले बताए । उक्त केन्द्रबाट ४ हजार ४ सय ६८ जनाले मतदान गरे ।


झमक आठै बजे केन्द्रमा 
साहित्यकार झमक घिमिरेले धनकुटा ६ स्थित कभर्डहल केन्द्रबाट बिहान ८ बजे मतदान गरिन् । घिमिरे आमा आशाकुमारीका साथ केन्द्र पुगेकी थिइन् । कचिडेस्थित निवासबाट गाडीमा गएकी उनलाई बहिनीले बोकेर केन्द्रभित्र लगेकी थिइन् । घिमिरेले प्रतिनिधि तथा प्रदेशसभा निर्वाचनमा मतदान गर्न पाउँदा निकै उत्साही भएको प्रतिक्रिया दिइन् । शारीरिक अवस्थाका कारण आफैं मतदान गर्न नसक्ने घिमिरेलाई आमा आशाकुमारी र झमक घिमिरे साहित्य कला प्रतिष्ठानका अध्यक्ष गोपाल गुरागाईंले सहयोग गरेका थिए । 

शृंखलाबद्ध विस्फोट
धनकुटाको खाल्सा छिन्ताङ सहिदभूमि गाउ‘पालिकाअन्तर्गत ऑखिसल्लामा बिहीबार बिहान अज्ञात समूहले शृंखलाबद्ध विस्फोट गराएको छ । घटनामा कुनै मानवीय क्षति नभएको प्रहरीले जनाएको छ । ऑखिसल्लाको थलथले मतदान केन्द्रभन्दा करिब ६ सय मिटरदेखि २ किमि दूरीमा विस्फोट भएको जिल्ला प्रहरी प्रमुख सुदीप राजभण्डारीले जनाए ।

करिब २० मिनेटको अवधिभित्र सातचोटि विस्फोटपछि सर्वसाधारणमा त्रास बढे पनि मतदान जारी 
रह्यो । विस्फोट जिम्मा हालसम्म कसैले लिएको छैन । घटनालगत्तै त्यस क्षेत्रका मतदान केन्द्रमा नेपाल प्रहरी, सशस्त्र प्रहरी तथा नेपाली सेनाले कडा सुरक्षा दिएका थिए । सुरक्षाकर्मीका अनुसार उक्त स्थानमा सुतली बम विस्फोट भएको हो । मतदान केन्द्रमा उल्लेख्य मतदाता रहेका बेला विस्फोट भए पनि पर्याप्त सुरक्षा उपलब्ध गराई मतदान निरन्तर गरिएको प्रजिअ प्रेमप्रकाश उप्रेतीले बताए । ‘मतदान समग्रमा शान्तिपूर्वक सम्पन्न भएको छ’, उनले भने, ‘मतदाताको उपस्थिति उत्साहप्रद रह्यो ।’ 


इलाममा ६५ प्रतिशत 
प्रदेशसभा र प्रतिनिधिसभा निर्वाचनमा इलाममा ६५ प्रतिशत मत खसेको छ । निर्वाचन शान्तिपूर्ण रूपमा सम्पन्न भएको मुख्य निर्वाचन अधिकृतको कार्यालयले जनायो । शुक्रबार बिहान ४ बजेसम्ममा सबै मतपेटिका सदरमुकाम ल्याएर तत्काल गणना थाल्ने तयारी रहेको मुख्य निर्वाचन अधिकृत कृष्ण सुवेदीले बताए । उनका अनुसार २६ संकलन केन्द्रमार्फत जिल्लाभरका मतपेटिका सदरमुकाम ल्याइनेछ । 
क्षेत्र नम्बर १ को प्रतिनिधिसभातर्फ वाम गठबन्धनबाट पूर्वप्रधानमन्त्री झलनाथ खनाल एवं २ मा पूर्वसभामुख सुवास नेम्वाङ उम्मेदवार भएका कारण जिल्लाको चुनावी परिणामप्रति देशव्यापी चासो छ । नेपाली कांग्रेसका तर्फबाट १ मा भूपेन्द्र कट्टेल एवं २ नम्बर क्षेत्रमा केशव थापा उम्मेदवार छन् । खनालले सूर्योदय नगरपालिकास्थित रम्फोकको राष्ट्रिय आधारभूत मावि र प्रतिस्पर्धी कट्टेलले सूर्योदयकै मालुम केन्द्रबाट मतदान गरे । नेम्वाङ, थापा र कांग्रेसका पूर्वमहामन्त्री केबी गुरुङले सदरमुकामको बालमन्दिर केन्द्रबाट मतदान गरे । इलाममा स्थानीय निर्वाचन तुलनामा मतदान घटेको हो । स्थानीय निर्वाचनमा ७३ प्रतिशत मत खसेको थियो । 

तेह्रथुममा ६६ प्रतिशत
जिल्लामा उत्साहजनक रूपमा मतदान सम्पन्न भएको छ । मतदाता चिसोका कारण बिहान निर्धारित समयभन्दा केही ढिला गरी मतदान केन्द्र पुगे पनि घाम लागेपछि उपस्थिति बाक्लिएको थियो । जिल्लामा ६६ दशमलव ५५ प्रतिशत मत खसेको जिल्ला निर्वाचन अधिकारी निर्मलकुमार राईले बताए । 


सिन्धुली र काभ्रेमा ६५ प्रतिशत
सिन्धुली (कास)– जिल्लामा बिहीबार भएको निर्वाचनमा ६५ प्रतिशत मत खसेको छ । मतदान शान्तिपूर्ण रहेको प्रजिअ जनकराज दाहालले जानकारी दिए । मतपेटिका राति २ बजेसम्म मुख्य निर्वाचन अधिकृतको कार्यालय पुर्‍याउने गरी व्यवस्था मिलाइएको उनले बताए । 
वृद्धवृद्धा, अपांगता भएका व्यक्तिका लागि मतदान गर्न विशेष व्यवस्था मिलाइएको थियो । दुई प्रतिनिधिसभा र चार प्रदेशसभा रहेको सिन्धुलीमा १ सय ३७ मतदानस्थल र २ सय ४० मतदान केन्द्र छन् ।

त्यसैगरी काभ्रेमा पनि झन्डै ६५ प्रतिशत मत खसेको अनुमान छ । प्रारम्भिक तथ्यांकका आधारमा ६५ प्रतिशत मत खसेको आकलन गरिएको मुख्य निर्वाचन अधिकृत अर्जुन अधिकारीले जानकारी दिए । स्थानीय तहको निर्वाचनको तुलनामा कम मत खसेको छ । स्थानीय तहको निर्वाचनमा झन्डै ७५ प्रतिशत खसेको थियो ।

सबै मतदान केन्द्रमा शान्तिपूर्ण रूपमा निर्वाचन भएको मुख्य निर्वाचन अधिकृत अर्जुन अधिकारीले जानकारी दिए । जिल्ला प्रहरी प्रमुख एसपी सहकुलबहादुर थापाले सुरक्षा निकायको सक्रियताका कारण कुनै पनि घटना हुन नपाएको दाबी गरे । यस्तै शुक्रबारबाट मात्रै मतगणना सुरु हुने भएको छ । 
 ३ सय ५० वटै मतदान केन्द्रका मतपेटिका संकलन भइसकेपछि मात्रै मतगणना सुरु गरिने मुख्य निर्वाचन अधिकृत अर्जुन अधिकारीले जानकारी दिए । उनका अनुसार, भौगोलिक रूपमा विकट डाँडापारि क्षेत्रका मतदान केन्द्रका मतपेटिका हेलिकप्टरमार्फत ढुवानी गरिनेछ । 

 

प्रकाशित : मंसिर २२, २०७४ ०७:३१
प्रतिक्रिया
पठाउनुहोस्

प्रदेशसभाले मतदातामा उत्साह

जनक नेपाल, प्रकाश अधिकारी

सुर्खेत — वीरेन्द्रनगर १० नयाँगाउँकी ५८ वर्षीया स्यानी थारू मतदान गरेर फर्किंदा निकै उत्साही देखिन्थिन् । मत त उनले धेरैपटक दिइन् तर यसपटक नेताहरूले छुट्टै प्रदेश सरकार बन्ने भनेका छन् । सुर्खेतमै प्रदेश सरकार बनेपछि आफूलाई हेर्लान् भन्ने आशामा उनले खुसीसाथ मतदान गरेकी हुन् ।

नयाँ संविधान जारी भएपछि पहिलोपल्ट भएको प्रतिनिधिसभा तथा प्रदेशसभा निर्वाचनले मतदातामा आशा जगाएको छ । ‘अहिलेसम्म धेरैपल्ट भोट दिइयो । कहिल्यै भनेजस्तो काम भएन,’ उनले भनिन्, ‘यसपटक सुर्खेतमै सरकार बन्ने सुनेकी छु । अब त केही होला भनेर आफूखुसी भोट हाल्न आएँ ।’ स्यानी थारूसँगै मतदान गरेर फर्किएकी नयाँगाउँकै लाइटी थारूले आफूले मत दिएर जिताएका सांसदले गाउँको विकास गरून् भन्ने चाहना राखेको बताइन् । ‘चुनाव जितेर गएपछि पनि नेताहरू गाउँ फर्किऊन् । हाम्रा सुखदु:ख पनि हेरून् । चाहेकै त्यही हो,’ उनले भनिन् ।

जनसेवा मावि घुस्रा केन्द्रका मतदाता अधिकांश थारू समुदायका छन् । प्रदेश ६ मा सुर्खेतमा मात्र आदिवासी थारू समुदायको बसोबास छ । उनीहरू मात्र हैन, प्रदेश सरकार बन्ने भएकाले मतदातामा बेग्लै उत्साह देखिएको हो । ‘चुनाव जितेर पहिलेजस्तो माननीय (सांसद) काठमाडौं जाँदैनन्, प्रदेशमै बस्छन् । त्यसैले जनताको दु:खसुख नजिकबाट हेर्लान् भन्ने ठानेका छौं,’ वीरेन्द्रनगर १० का भक्तबहादुर थापाले भने । सुर्खेत प्रदेशकै राजधानी हुने भएकाले पनि विकास निर्माण छिटो होला भन्ने लागेको उनले बताए ।

अन्यत्र भएका विस्फोटका घटनाले त्रास फैलिए पनि सुर्खेतका मतदाताले भने बिहीबार ढुक्कले मतदान गरे । बिहान झिसमिसेमै मतदान केन्द्रमा लाइन लागेका उनीहरू मत खसाल्न आतुर देखिन्थे । वृद्ध मतदाता लौरी टेकेर, आफन्तको सहारा लिएरै केन्द्र पुगेका थिए । बिहान जाडो भएकाले मतदाताको भीड दिउँसोसम्म बाक्लै थियो ।

वीरेन्द्रनगर ११ गार्गेतालकी पवित्रा पौडेलले यसपटक पनि नेताहरूसँग विकास मागेको बताइन् । ‘वृद्धभत्ता खाने उमेर आउँदै छ । भत्ता रकम बढाइदिए हुन्थ्यो । नेताहरूसँग विकास र भत्ता रकमकै माग राखेकी छु,’ मतदान केन्द्रबाहिर आराम गरिरहेकी पवित्राले भनिन्, ‘हेरौं केही त गर्लान् । भत्ता बढाउँछौं भनेका छन् ।’ वीरेन्द्रनगरस्थित जन मावि केन्द्रबाट मतदान गरेर फर्किएका २३ वर्षीय उमेश खत्रीले अब चुनिने सांसदहरूले बेरोजगारी समस्या समाधानका लागि पहल गर्नुपर्ने बताए । ‘चुनाव जित्नकै लागि बेराजगारी समस्या समाधान नारा मात्र नबनोस् । अब गरेरै देखाउने बेला आउँदै छ,’ उमेशले भने । पूर्वगृहमन्त्री एवं कांग्रेस नेता पूर्णबहादुर खडकाले मेहेल्कुनाको सूर्यज्योति मावि केन्द्रबाट मतदान गरे । उनी सुर्खेत १ का प्रतिनिधिसभा उम्मेदवार हुन् । त्यस्तै, कांग्रेस केन्द्रीय सदस्य एवं पूर्वमन्त्री हृदयराम थानीले वीरेन्द्रनगर १ स्थित सरस्वती आधारभूत विद्यालय बांगेसिमल, एमाले पोलिटब्युरो सदस्य एवं प्रदेश ६ को मुख्यमन्त्रीका दाबेदार यामलाल कंडेलले वीरेन्द्रनगर ४ स्थित भैरव मावि, सूचना तथा सञ्चार राज्यमन्त्री एवं सुर्खेत २ प्रदेशसभा (ख) का उम्मेदवार तप्तबहादुर विष्टले विद्याज्योति मावि कुइने तातापानीबाट मतदान गरे ।

शान्तिपूर्ण मतदान
दुई प्रतिनिधिसभा सदस्य निर्वाचन क्षेत्र रहेको सुर्खेतका २ सय ६३ वटै मतदान केन्द्रमा शान्तिपूर्ण रूपले मतदान भएको मुख्य निर्वाचन अधिकृतको कार्यालयले जनाएको छ । तोकिएकै समयमा मतदान सुरु भएको थियो । लोकतान्त्रिक र वाम गठबन्धनबीच जिल्लामा कडा टक्कर भए पनि मतदानस्थलमा दुवै पक्षका कार्यकर्ता संयमित थिए । कार्यालयका सूचना अधिकारी वीरेन्द्र मल्लले उच्च सुरक्षा सतर्कता र दलका कार्यकर्ताको संयमले सामान्य विवादसमेत कतै नभएको बताए । २ लाख ४ हजार ५ सय ७७ मतदाता रहेको सुर्खेतमा क्षेत्र १ मा १ लाख १ हजार ६ सय ३७ र २ मा १ लाख २ हजार ९ सय ४० छन् ।

प्रकाशित : मंसिर २२, २०७४ ०७:३१
पूरा पढ्नुहोस्
प्रतिक्रिया
पठाउनुहोस्