पराजयपछिको हार्दिकता !

कान्तिपुर संवाददाता

काठमाडौं — प्रतिनिधिसभा र प्रदेशसभा चुनावको मत परिणाम सार्वजनिक भइरहँदा जित्नेहरू मात्र हैन, केही पराजित समेत चर्चामा आए । पराजयपछिको चर्चाको केन्द्रमा सबैभन्दा अघि थिए, झापा– १ का कांग्रेस उम्मेदवार विश्वप्रकाश शर्मा ।

वाम गठबन्धनका विजेता राम कार्कीलाई बधाई दिँदै उनले आफैंले उनेको माला लगाइदिए । २०७० को संविधानसभा निर्वाचनमा एमालेका रविन कोइरालासँग पराजित हुँदा पनि उनले त्यसै गरेका थिए । 
चुनावअघि प्रतिस्पर्धी उम्मेदवारको खेदो खन्ने, अहंकार देखाउने र परिणाम आएपछि हार नस्विकार्ने संस्कार नेपाली राजनीतिमा नौलो कुरा होइन । तर यसपालि चुनावपछि विजेता उम्मेदवारलाई हार्दिकतापूर्वक बधाई दिएर केही उम्मेदवारले असल राजनीतिक संस्कारको परिचय दिए । ‘नेपाली राजनीतिमा राजनीतिक संस्कार र ग्रहणशीलताको अभाव छ,’ शर्माले भने, ‘लोकतान्त्रिक राजनीतिमा प्रतिस्पर्धीलाई सम्मान गर्न सक्नुपर्छ ।’ 
०४८ यताका पाँचवटै निर्वाचनमा तनहुँबाट जितेका कांग्रेस नेता रामचन्द्र पौडेल यस पटक क्षेत्र नं १ बाट पराजित भए । ०७० को संविधानसभामा आफूले हराएका एमालेका कृष्णकुमार श्रेष्ठ किसान विजयी भएपछि आइतबार साँझ पौडेल दमौलीमा निस्किएको वाम गठबन्धनको विजय जुलुसमै पुगे । जुलुसमाझ पुगेर उनले श्रेष्ठलगायत वाम गठबन्धनका सबै विजयीलाई खादा पहिराई बधाई दिए । पराजयपछि एक वक्तव्य निकाल्दै पौडेलले आफ्नो पार्टीको जेजस्तो परिणाम आए पनि निर्वाचनले संविधान कार्यान्वयनमा उल्लेख्य उपलब्धि हासिल भएको बताएका छन् । 
कांग्रेसकै अर्का नेता रामहरि खतिवडाले पनि वाम गठबन्धनका उम्मेदवार यज्ञराज सुनवारलाई बधाई दिए । काठमाडौं ४ का एमाले उम्मेदवार राजन भट्टराईले विजेता गगन थापालाई राष्ट्रिय सभा गृहमा घण्टौं कुरेपछि भेटेरै बधाई दिए ।

झापा १ बाट प्रतिनिधिसभा सदस्यमा निर्वाचित माओवादी केन्द्रका सुरेन्द्रकुमार कार्कीलाई आफैंले उनेको माला पहिर्‍याएर बधाई दिँदै उनका निकटतम प्रतिद्वन्द्वी कांग्रेस नेता विश्वप्रकाश शर्मा र गुल्मी १ बाट निर्वाचित एमालेका प्रदीप ज्ञवालीलाई बधाई दिँदै उनका निकटतम प्रतिद्वन्द्वी कांग्रेस नेता चन्द्र भण्डारी । तस्बिर : कान्तिपुर

त्यस्तै अन्य पराजितहरूले पनि सामाजिक सञ्जाल र फोनमार्फत प्रतिस्पर्धी विजेतालाई बधाई दिएर राजनीतिक संस्कार प्रदर्शन गरेका छन् । नुवाकोटका पराजित कांग्रेस उम्मेदवार रामशरण महतले मतपरिणाम घोषणालगत्तै ट्विटरमा वाम गठबन्धनका तर्फबाट आफ्ना प्रतिस्पर्धी हितबहादुर तामाङलाई बधाई दिए । उनले विगत २३ वर्षमा लगातार ४ पटक विजयपछिको पराजयलाई परिवर्तनको जनचाहना मानेको बताउँदै बधाई र शुभकामना दिएका हुन् । 
काठमाडौं १ मा कांग्रेसका प्रकाशमान श्रेष्ठसँग हारेका विवेकशील साझाका उम्मेदवार रवीन्द्र मिश्रले पनि मतपरिणाम सार्वजनिक भएपछि विजेतालाई बधाई दिन हिचकिचाएनन् । 
गोर्खा २ बाट प्रतिनिधिसभा सदस्यमा नयाँ शक्ति पार्टी नेपालका बाबुराम भट्टराई निर्वाचित भएको घोषणालगत्तै उनका प्रतिस्पर्धी वाम गठबन्धनका उम्मेदवार नारायणकाजी श्रेष्ठले फोनमार्फत बधाई दिए । जबकि चुनावअघि यी दुवै नेता आरोपप्रत्यारोप र घोचपेचमा उत्रिएका थिए । 
गुल्मीमा आफू पराजित भएपछि कांग्रेस नेता चन्द्र भण्डारीले एमालेका विजयी प्रदीप ज्ञवालीलाई भेटेर खादा लगाइदिए ।

प्रकाशित : मंसिर २५, २०७४ ०७:२२
प्रतिक्रिया
पठाउनुहोस्

झनै बढ्यो वाम वर्चस्व, प्रदेशसभामा पनि अगाडि

राजेश मिश्र

काठमाडौं — प्रतिनिधिसभाको प्रत्यक्षतर्फका १ सय ६५ निर्वाचन क्षेत्रमध्ये सोमबार बिहान ७:३० बजेसम्म परिणाम आएका १ सय २५ स्थानमध्ये वाम गठबन्धनले १ सय ११ स्थानमा विजय हासिल गरेको छ । गठबन्धनको प्रमुख घटक नेकपा एमालेले ७२ र माओवादी केन्द्रले २९ स्थानमा जित हासिल गरेका छन् ।

नेपाली कांग्रेसले १७ तथा राष्ट्रिय जनता पार्टी ७, संघीय समाजवादी फोरम ७ र नयाँ शक्ति पार्टी , राष्ट्रिय प्रजातन्त्र पार्टीलगायतले ४ स्थानमा जितेका छन् । 
एमालेले १०, माओवादीले ६, नेपाली कांग्रेसले ५ र अन्यले ८ स्थानमा अग्रता लिइरहेका छन् । समानुपातिकतर्फको मत गणनाको भने परिणाम आइसकेको छैन । 
आइतबार घोषित परिणामअनुसार धेरै शीर्ष नेता प्रतिनिधिसभामा पुगेका छन् भने कतिपयले पराजय व्यहोर्नुपरेको छ । एमाले अध्यक्ष केपी ओली, कांग्रेस सभापति शेरबहादुर देउवा, राष्ट्रिय जनता पार्टीका अध्यक्षमण्डलका संयोजक महन्थ ठाकुर र सदस्यहरू राजेन्द्र महतो र अनिल झा विजयी भइसकेका छन् । संघीय समाजवादी फोरम नेपालका अध्यक्ष उपेन्द्र यादव यसअघि नै विजयी भइसकेका छन् । शीर्ष नेताहरूमध्ये माओवादी केन्द्रका अध्यक्ष पुष्पकमल दाहालको परिणाम आउन बाँकी छ । चितवन–३ मा राप्रपाका विक्रम पाण्डेसँग दाहाल ७ हजार मतले अगाडि छन् । 
ठाकुर, महतो र यादवले यसअघि चुनाव लड्दै आएका साबिकका जिल्ला र क्षेत्र छाडेर अन्यत्रबाट जित हात पारेका हुन् । ठाकुरले यसअघि कांग्रेसमै रहँदा सर्लाहीबाट ०४८, ०५१ र ०५६ को संसदीय चुनाव जितेका थिए । तर, कांग्रेस छाडेर मधेसी दलको संस्थापक भएपछि ठाकुरले पहिलो पटक 
जित हात पारेका हुन् । 
०६४ र ०७० को संविधानसभा निर्वाचनमा उनले तत्कालीन तमलोपा पार्टीबाट सर्लाहीमा हारेका थिए । एमाले नेताहरू माधव नेपाल, झलनाथ खनालले पनि जित हासिल गरिसकेका छन् । राजपा परित्याग गरी वाम गठबन्धनबाट एमालेको सूर्य चिह्न लिएर चुनाव लडेका हृदयेश त्रिपाठी र वृजेश गुप्ताले पनि जित हात पारेका छन् । त्यस्तै, फोरमबाट कांग्रेस प्रवेश गरेका अभिषेकप्रताप शाहले पनि चुनाव जितेका छन् । 
एमालेका प्रभावशाली नेता वामदेव गौतमले भने बर्दियामा हार व्यहोरेका छन् । उनी कांग्रेस उम्मेदवार सञ्जय गौतमबाट थोरै अन्तरमा पराजित भए । वाम गठबन्धनबाट माओवादी नेता नारायणकाजी श्रेष्ठपछि पराजय व्यहोर्ने ठूला नेता उनै हुन् । वाम गठबन्धनले ठूलो बहुमतका साथ सत्तारोहणको तयारी गरिरहँदा गठबन्धनका सूत्रधार मानिने श्रेष्ठ र गौतम भने पराजित भएका छन् । श्रेष्ठ आफ्ना पूर्वसहयात्री नयाँ शक्ति पार्टीका संयोजक बाबुराम भट्टराईसँग गोरखामा पराजित भएका हुन् । वाम गठबन्धन तथा राजपा र फोरमको छुट्टै गठबन्धनको परिणामस्वरूप कांग्रेस खुम्चिन पुगेको छ । उसका धेरै केन्द्रीय नेताले चुनाव हारेका छन् । 
कांग्रेसका वरिष्ठ नेता रामचन्द्र पौडेल तथा पूर्वमहामन्त्रीहरू विमलेन्द्र निधि र कृष्ण सिटौलासम्मले पराजय बेहोरेका छन् । पौडेलले ०४८ सालयता भएका ५ वटै चुनावमा तनहुँबाट जितेका थिए । तर, यस पटक वाम गठबन्धनका उम्मेदवारबाट उनी पराजित भएका छन् । 
धनुषा–३ मा निधिले राजपा नेता राजेन्द्र महतोबाट हार व्यहोर्नुपरेको छ । त्यस्तै सिटौलाले वाम गठबन्धनले सघाएको राप्रपा नेता राजेन्द्र लिङदेनसँग हारेका छन् । कांग्रेससँगको गठबन्धनबाट उम्मेदवार बनेका राप्रपा अध्यक्ष कमल थापा र राप्रपा प्रजातान्त्रिकका अध्यक्ष पशुपतिशमशेर राणाले पनि हार व्यहोरिसकेका छन् ।
७ वटा प्रदेशमा प्रदेश नम्बर २ बाहेक बाँकीमा वाम गठबन्धन नै बलियो भएका छन् । ७ वटै प्रदेशको कुल ३ सय ३० निर्वाचन क्षेत्रमध्ये सोमबार बिहानसम्म २ सय ५९ स्थानको परिणाम आइसकेको छ । त्यसमध्ये एमालेले १३५, माओवादीले ५९ र कांग्रेसले ३५ सिटमा जित हात पारेको छ । राजपा, फोरम र अन्यले ३० स्थान जितेका छन् । एमालेले २१, माओवादीले १०, कांग्रेसले ८ र अन्यले ७ स्थानमा अग्रता लिइरहेका छन् ।

प्रकाशित : मंसिर २५, २०७४ ०७:२२
पूरा पढ्नुहोस्
प्रतिक्रिया
पठाउनुहोस्