सरकार र तीन दलले देशलाई विखण्डन गर्न खोजेको महतोको आरोप

शनिबार रिपोर्टर्स क्लबमा भएको साक्षात्कारमा बोल्दै नेता महतोले ठूला दलले मधेस र थरुहटलाई एक हुन नदिन षड्यन्त्र गरिरहेको आरोप समेत लगाए । उनले मुलुकलाई बर्वादीबाट बचाउनका लागि आफूहरुले संघर्षका कार्यक्रम सार्वजनिक गरेको स्पष्ट पारे । उनले मधेसी तथा आदिवासी जनताले अधिकार प्राप्तिको लागि सहादत दिएको कुरा लत्याएर कोही पनि अघि बढ्न नहुने धारणा राखे । महतोले आफूहरुले संवैधानिक घेराभित्र रहेर संघर्षका आन्दोलनहरु सार्वजनिक गरेको समेत दाबी गरे । 
 
मधेसी तथा जनजातिहरुले उठाएका माग पूरा गराई मेचीदेखि महाकालीसम्म, झापादेखि कञ्चनपुरसम्म र मधेसदेखि थरुहटसम्म एकैपटक निर्वाचन हुनुपर्ने उनको भनाइ थियो । उनले बल प्रयोग गरेर र जनता मारेर निर्वाचन गराइए मुलुकलाई असफलतातर्फ धकेल्नुबाहेक अरु केही नहुने समेत ठोकुवा गरे । 

उनले प्रदेश नम्बर २ को निर्वाचनको मिति सार्ने कुरामा आफूहरुको कुनै पनि सहमति नरहेको भनाइ दाहोर्‍याए । उनले सरकारलाई मूर्खको संज्ञा दिँदै भने,‘अरे, मुर्ख ! हदको पनि सीमा हुन्छ नि, २ नम्बर प्रदेशमात्रै मधेस हो र ?’उनले तीन ठूला दल र सरकारले फुटाउ र शासन गर भन्ने नीति लिएको समेत आरोप लगाए ।