कर फर्स्यौट आयोगका दुई पदाधिकारीविरुद्ध पक्राउ पूर्जी जारी

 २०७१ सालमा गठन भएको कर फर्स्यौट आयोगका दुई पदाधिकारीविरुद्ध अख्तियार दुरुपयोग अनुसन्धान आयोगले पक्राउ पूर्जी जारी गरेको छ ।

‘एक साताअघि गत आईतबार नै हामीले उनीहरुको घरमा पत्र पठाएर आयोगमा उपस्थित हुन आग्रह गरेका थियौं भने त्यसपछि फेरी ताकेता गरेका थियौं’ अख्तियार स्रोतले भन्यो, ‘तोकिएको तीन दिनभित्र पनि उनीहरु आयोगमा उपस्थित नभएपछि पक्राउका लागि सार्वजनिक सूचना निकालिएको हो ।’

२१ अर्ब रुपैयाँ अनियमित ढंगले कर मिनाहा गरिदिएको घटनाको अनुसन्धान गरिरहेको अख्तियार दुरुपयोग अनुसन्धान आयोगले आन्तरिक राजस्व विभागका महानिर्देशक चुडामणी शर्मालाई पक्राउ गरेर बयान लिइरहेको छ । बयानकै क्रममा महत र ढकाललाई अख्तियारले झिकाएको थियो ।

आयोगमा बसेर काम गरेका लुम्बध्वज महत तत्कालिन अर्थमन्त्री रामशरण महत निकटका चाटर्ड एकाउन्टेण्ड हुन भने उमेश ढकाल एमाले निकटका मानिन्छन् । फरार हुनुअघि दुवैजना अनुसन्धानलाई प्रभावित पार्न राजनीतिक दौडधुपमा रहेको स्रोतले बतायो ।