प्रधानमन्त्री देउवाले गरे पाँचौंपटक मन्त्रीमण्डल विस्तार, राप्रपाबाट ३ मन्त्री र १ राज्यमन्त्रीले साेमबार सपथ लिने

दीपक बाेहाेरा विज्ञान तथा प्रविधि, विक्रम पाण्डे वन तथा भू संरक्षण, सुनिल थापा उद्याेग र रेशम लामा उद्याेग राज्यमन्त्री
टीकाराम तामाङ

काठमाडौं — प्रधानमन्त्री शेरबहादुर देउवाले सोमबार पाँचौंपटक मन्त्रीमण्डल विस्तार गरेका छन् । राष्ट्रिय प्रजातन्त्र पार्टी (प्रजातान्त्रिक) बाट ३ जना मन्त्री थपेर देउवाले मन्त्रीमण्डल विस्तार गरेका हुन् । राप्रपाबाट संसदीय दलका नेता दीपक बोहरा, उपनेता विक्रम पाण्डे र सांसद् सुनिलबहादुर थापा मन्त्री बन्ने भएका छन् ।

व्यवस्थापिका–संसद्‌मा १८ सांसद रहेको पार्टीले वन तथा भू संरक्षण, उद्योग र विज्ञान तथा प्रविधि मन्त्रालयको जिम्मेवारी प्राप्त गरेकाे छ ।  दीपक बाेहाेरा विज्ञान तथा प्रविधि, विक्रम पाण्डे वन तथा भू संरक्षण, सुनिल थापा उद्याेग तथा रेशम लामा उद्याेग राज्यमन्त्री हुने टुंगाे लागेको प्रधानमन्त्रीका प्रेस संयोजक गोविन्द परियारले जानकारी दिए । उनले सोमबार बिहान ११ बजे मन्त्रिपरिषद् विस्तारको सूचना रहेको जानकारी दिए । सोमबार ३ मन्त्री र १ राज्यमन्त्री थपिएपछि देउवा नेतृत्वको मन्त्रिपरिषद् राज्यमन्त्रीसहित ५४ सदस्यीय पुग्नेछ ।

गत जेठ २३ गते प्रधानमन्त्रीमा निर्वाचित देउवाले २४ जेठमा मन्त्रिमण्डल गठन गरेका थिए भने त्यसपछि २८ गते, असार २, साउन ११ र भदौ ४ गरी चारपटक मन्त्रिपरिषद् विस्तार गरे । सरकारमा अहिले प्रधानमन्त्री सम्बद्ध कांग्रेस, माओवादी केन्द्र, लोकतान्त्रिक फोरमसहितका दलहरु सहभागी छन् । देउवाले इतिहासकै 'जम्बो' मन्त्रिपरिषद् बनाएको भन्दै सर्वत्र आलोचना भइरहेको छ । 

राप्रपाका अध्यक्ष पशुपतिशम्शेर राणाले मुलुकमा राजनीतिक स्थायित्व कायम गर्न तथा आगामी असोज २ गतेको तेस्रो चरणको स्थानीय तह र मंसिरमा हुने प्रादेशिक एवं केन्द्रीय निर्वाचनको कार्यक्रमलाई पूरा गर्ने उद्देश्यले पार्टी सरकारमा सहभागी हुन लागेको बताए । 

राप्रपाबाट वैचारिक असहमति राख्दै गत साउन २२ गते विभाजनका लागि निर्वाचन आयोगमा दल दर्ता गरेको उक्त पार्टीले करिब दुई साता अगाडि दलका रुपमा मान्यता प्राप्त गरेको थियो ।

प्रकाशित : भाद्र २५, २०७४ १७:०५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

सात वर्षअघि वृद्धा हत्या गरेर फरार अभियुक्त सार्वजनिक, चार वटा मुद्दा चलाइने

प्रताप विष्ट

हेटौंडा — सात वर्षअघि घरमा बसिरहेकी वृद्धालाई गोली हानी हत्या गरेर फरार भएका एक अभियुक्तलाई प्रहरीले आइतबार पत्रकार सम्मेलन गरेर सार्वजनिक गरेको छ ।

मकवानपुरको कैलाश गाउँपालिका-१० साविकको नामटार गाविस ६ का ३६ वर्षीय फोरम भन्ने सागर पाख्रिनलाई जिल्ला प्रहरी कार्यालय हेटौंडाले सार्वजिनक गरेको हो । २०६७ फागुन ३ गते पाख्रिनले मकवानपुरको मनहरी गाउँपालिका-४ साविकको हाडीखोला गाविस ७ मुलखोलाकी ६२ वर्षीया वृद्धा ठुलीमाया थिङलाई घरभित्रै गोली हानी हत्या गरेर फरार भएका थिए । 

गाँजा बोकेर लगिरहेको अवस्थामा हल्ला गरेको भनेर वृद्धालाई गोली प्रहार गरेका थिए । वृद्धाले घर अगाडिको बाटो भएर राति गाँजा बोकेर लगिरहेको अवस्थामा कराइएकी थिइन । प्रहरीले तत्कालै वृद्धाको हत्या गरेको आरोपमा नामटारस्थित पाख्रिनको घर खानतलासी गर्दा कटुवा पेस्तोल २ थान, भरुवा बन्दुक एक थान, बारुद, छर्रा, गाँजा २० केजी र सालकको खपटा एक  केजी बरामद गरेको थियो ।

फरार रहेका चन्द्रागिरि नगरपालिका २ झ्याप्ले खोला क्षेत्रको बस्तीमा लुकीछिपी बसेको अवस्थामा प्रहरीले शनिबार पक्राउ गरेर कारबाही गर्न आइतबार हेटौंडा ल्याएको थियो ।
 
०७३ वैशाख ३ गते पाख्रिन घरमा आएको जानकारी पाएपछि प्रहरी उनलाई पक्राउ गर्न घरमा नै पुगेको थियो । प्रहरी आएको थाहा पाउनेबित्तिक्कै पाख्रिन भागेका थिए ।  गतवर्ष प्रहरीले नामटार क्षेत्रमा गाँजा फाँड्न लागेको अवस्थामा प्रहरीलाई लक्षित गरेर  गोली प्रहार पाख्रिनले नै गरेको प्रहरी उपरीक्षक विकासराज खनालले पत्रकार सम्मेलनमा जानकारी दिएका थिए । 

पाख्रिनलाई हत्या, हातहतियार, लागूऔषध, आखेटो ओसारपसारलगायत चार वटा  मुद्दा चलाएको प्रहरी उपरीक्षक खनालले बताए । नामटारका बासिन्दालाई लामो समयदेखि पाख्रिनले त्रसित बनाउँदै आएका थिए । पाख्रिन गाउँमा आउँदा हतियार बोकेर आउने गरेका थिए । नामटारका अधिकांश वासिन्दाले उनलाई गुन्डा, गाँजा तस्कर र अपराधीको रुपमा चिन्ने गर्छन् । 

प्रकाशित : भाद्र २५, २०७४ १७:०५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT