क्रान्तिकारीको वैकल्पिक गठबन्धन बन्छ : बैद्य

भीम घिमिरे

पोखरा — एमाले र माओवादी केन्द्रको गठबन्धनसँग चिढिएका साना बामपंथी दलहरूले बेग्लै गठबन्धन बनाउने तयारी गरेका छन् । यसको खुलासा नेकपा क्रान्तिकारी माओवादीका अध्यक्ष मोहन बैद्यले गरेका हुन् ।

 

पार्टीको पोखरामा आइतवार सुरू प्रथम राष्ट्रिय सम्मेलनको उद्घाटन सत्रमा बोल्दै उनले नेकपा, नेकपा मसाल र विप्लव समुहसँग कुरा भइरहेको बताए । उनले माओवादी केन्द्र जनयुद्धको जगमा अडिन नसकेर सधैं सत्तालिप्सामा लागेको आरोप लगाए । ‘एमालेसँगको गठबन्धनमा प्रचण्डले निरन्तरताको क्रमभंग भनेका छन् । तर, क्रमभंग सुल्टो होइन उल्टो भएको छ,’ उनले भने, ‘एमालेका बारेमा हामीले धेरै अघिदेखि भन्दै आएका हौं, अहिले भन्नु केही छैन तर, माओवादी केन्द्र सच्चा क्रान्तिकारी कम्युनिष्ट रहेन ।’

माओवादी जनयुद्धले मुलुकमा परिवर्तन ल्याएपनि त्यसका उपलब्धि संस्थागत गर्न नसक्नु, त्यसको समीक्षा गरेर अगाडि जान नसक्नु बामपंथी दलहरूको कमजोरी भएको उनले बताए । ‘एक थरि जनवादी क्रान्ति सकियो अब समृद्धिको क्रान्ति गर्नुपर्छ भन्छन्, त्यस्तालाई जवाफ दिनुपर्ने बेला छ,’ उनले भने, ‘प्रतिक्रियावादी सत्तालाई निरन्तरता दिएर अघि बढ्नु क्रान्ति होइन ।’ धेरै गुटमा विभाजित बामपंथी दलहरूले अब एमाले र माओवादी गठबन्धनलाई जवाफ दिन एकता गर्नुपर्ने समय आएको उनले बताए । ‘हाम्रो सम्मेलनको यो मुख्य एजेण्डा पनि हो,’ उनले भने, ‘अब अवस्थाको समीक्षा गरेर बलियो वैकल्पिक बाम शक्ति हुनुपर्छ ।’ एकता प्रयासलाई सक्दा अघि बढाउन आफूहरूले प्रयास गर्ने उनले बताए । ‘प्रतिगामी राज्यसत्तामा जाने बामपंथी हुँदैन, त्यसैले हाम्रो कार्यदिशा प्रष्ट हुन जरुरी छ,’ उनले भने, ‘राजनीतिक क्रान्ति जरुरी छ तर, अब समयअनुसार हामीले त्यसका लागि रणनीति परिवर्तन गरेर लैजाने विषयमा छलफल चलाउनु पर्छ ।’ 

धेरै चिरामा विभाजित बाम घटकहरू बीच बिचार र सिद्धान्तका हिसाबले आधारभूत कुरा मिलेपनि नेतृत्वको बुझाइ र बहसमा मतभेद आउने गरेको उनले बताए । ‘अहिले माओवादी र एमालेको गठबन्धन हाम्रा लागि चुनौतिमात्रै होइन अवसर पनि हो,’ उनले भने, ‘क्रान्तिकारीबीच एकता जरुरी भएको छ । एकअर्कालाई बुझ्न जरुरी भएको छ ।’

मुलुकका विभिन्न जिल्लाबाट कार्यकर्ता सहभागी सम्मेलनलाई नेकपाका हेमन्तप्रकाश ओली, ऋषि कट्टेल र नेकपा मसालका रामप्रकाश पुरीलगायतले पनि सम्बोधन गरेका थिए । 

प्रकाशित : आश्विन २२, २०७४ १९:०५
प्रतिक्रिया
पठाउनुहोस्

कांग्रेसका तीन सांसदद्धारा विद्युतीय मुद्रा लागू गर्न माग

कान्तिपुर संवाददाता

काठमाडौं — भ्रष्ट्राचार अन्त्यका लागि विद्युतीय मुद्रा प्रणाली लागू गर्न माग राख्दै कांग्रेसका तीन सांसदले जरुरी सार्वजनिक महत्वको प्रस्ताव सोमबार व्यवस्थापिका संसदमा दर्ता गराएका छन् ।

राज्यका सवै निकायमा व्याप्त भ्रष्ट्राचारको अन्त्य गर्ने उपयाको रुपमा नोट मुद्राको प्रचलनलाई विद्यूतीय मुद्राले पूर्णरुपमा प्रतिस्थापना गर्ने विकल्प रहेको उनीहरुले बताएका छन् ।

कांग्रेसका धनराज गुरुङ प्रस्तावक, सांसद बद्री पाण्डे र जीवन परियार समर्थक रहेको प्रस्तावमा विद्युतीय मुद्रा प्रचलनमा ल्याउँदा व्यक्तिको आर्थिक कारवोबार पारदर्शी हुने उल्लेख गरेका छन् ।

उनीहरुले सिक्का वा नोट मुद्राको सट्टा बैंक कारोबारबाट हुने र त्यसले व्यक्तिको तलब, पेन्सन, लाभांश, विदेशबाट पठाएको रकम, ऋण लिएको तथा अन्य आम्दानीको हिसावकिताब विद्युतीय ट्रान्सफर अर्थात क्रेडिट वा डिभिड कार्डको प्रयोग मार्फत हुनेछ । जसले गर्दा प्रत्येक व्यक्तिको आम्दानी र खर्च पारदर्शी हुने हुँदा कुनै किसिमको भ्रष्टाचारजन्य कार्यको नियन्त्रण भई लोक कल्याणकारी राज्य स्थापना गर्न सकिने विश्वास सांसद त्रयले गरेका छन् ।

‘सरकारलाई दुई बर्षको समयावधि भित्र नेपालमा नोट मुद्रालाई विद्युतीय मुद्राले प्रतिस्थापन गर्न आवश्यक निर्देशनका लागि यो जरुरी सार्वजनिक महत्वको प्रस्ताव पेश गरेका छौ’ उनीहरुले भनेका छन । 

‘मुलुकमा जबसम्म भ्रष्ट्राचार रोक्न सकिदैन तबसम्म मुलुक समृद्धि तर्फ अघि बढ्न सक्दैन’ जरुरी सार्वजनिक महत्वको प्रस्ताबमा भनिएको छ, ‘मुलुकको समृद्धिको लागि भ्रष्टाचारको जालोलाई जरैदेखि उखेलेर फाल्न आवश्यक छ । यसका लागि नोट मुद्राको प्रचलनलाई विद्युतिय मुद्राले प्रतिस्पथापन गर्नुपर्छ ।’

 

प्रकाशित : आश्विन २२, २०७४ १९:०५
पूरा पढ्नुहोस्
प्रतिक्रिया
पठाउनुहोस्