माओवादी केन्द्र भत्किएर देशमा अर्को शक्ति पैदा हुँदैछ : दाहाल

कान्तिपुर संवाददाता

काठमाडौं — मोहनविक्रम सिंह, नारायणमान विजुक्छे, मोहन वैद्यलगायत नेतालाई लक्षित गर्दै दाहालले भने ‘मेरा कतिपय गुरुहरु पुरानै पार्टीमा हुनुहुन्छ । त्यही पार्टीमा हिँडिराख्नुभएको छ । भिक्षुजस्तै घण्टी बजाइरहनुभएको छ । उहाँहरुबाट न समाजमा कुनै परिवर्तन छ । न त जीवनमा कुनै आवेग वा कुनै आक्रोश नै । उहाँहरु पुरानै ढंगले चलिरहनै रहनुभएको छ ।’

नेकपा माओवादी केन्द्रका अध्यक्ष पुष्पकमल दाहालले माओवादी केन्द्र भत्किएर देशमा अर्को नयाँ पार्टी बन्न लागेको बताएका छन्।

काठमाडौंमा बुधबार आयोजित पार्टी एकता कार्यक्रममा बोल्दै दाहालले प्रतिनिधिसभा र प्रदेशसभा निर्वाचनको संघारमा बढिरहेको राजनीतिक ध्रुविकरणले देशमा नयाँ शक्तिशाली पार्टी निर्माण हुने र जनताको इच्छाअनुसार काम हुने दाबी गरेका हुन्। माओवादी केन्द्र र नेकपा (संयुक्त)बीचको एकताको प्रसंग जोड्दै दाहालले भने, ‘आजको एकता र अर्को एकताको कुरा हुँदैछ। जसबाट माओवादी केन्द्र भत्किन्छ र देशमा नयाँ शक्ति पैदा हुन्छ।’असोज १७ गते एमाले, माओवादी केन्द्र र नयाँ शक्तिबीच चुनावी तालमेल गर्दै पार्टी एकता गर्नेसम्मको घोषणा गरिएको थियो।

‘माओवादीले कहिल्यै पनि घिसेपिटे तरिकाले सोचेन, एउटा नयाँ सोच र क्रमभङ्गका रुपमा सोचेकाले हामी अहिलेको ठाउँमा आइपुगेका छौं’, अध्यक्ष दाहालले भने, ‘कतिपय कम्युनिस्ट नेता र अग्रजहरु मन्दिरमा घण्टी बजाएझैं एकै ठाउँमा बसिरहनु भएको छ, हामीले त्यसो गरेनौं।’

उनले थपे ‘कतिपय साथीहरु भक्तपुरमा बसिरहनुभएको छ। भक्तपुरभन्दा बाहिर हेर्नुहुन्न। कतिपय साथी प्यूठानमा हुनुहुन्छ। प्यूठानबाहिर जानुहुन्न। केही साथी त्यस्तै यस्तै हुनुहुन्छ।’

‘तर हामी त्यो भन्दा फरक छौं। फरक ढंगले उत्पीडित वर्ग र समुदायको मुक्तिका निम्ति अगाडि बढ्ने जमर्को गरिरहेका छौं’ दाहालले भने, 'नयाँ तरंग र आवेग पैदा गराएर मात्रै समाजलाई रुपान्तरण गर्न सकिन्छ।'

प्रकाशित : आश्विन २५, २०७४ १६:४०
प्रतिक्रिया
पठाउनुहोस्

एमाले हिन्द महासागर जस्तो : ओली

कान्तिपुर संवाददाता

काठमाडौं — एमाले अध्यक्ष केपी शर्मा ओलीले एमाले पार्टी हिन्द महासगर जस्तो भएको बताएका छन् ।‘हिन्द महासागरमा विभिन्न नदीहरु मिसिन्छन्,’ हालै भएको वामपन्थी तालमेल इंगित गर्दै ओलीले भने ।

एमाले अध्यक्ष केपी शर्मा ओलीले एमाले पार्टी हिन्द महासगर जस्तो भएको बताएका छन् ।

‘हिन्द महासागरमा विभिन्न नदीहरु मिसिन्छन्,’ हालै भएको वामपन्थी तालमेल इंगित गर्दै ओलीले भने, ‘तिनिहरु कुनै धमिला होलान्,कुनैमा फोहोर बगेर आएको होला तर महासगरमा मिसिएपछि त्यो कञ्चन हुन्छ । शाखा नदीको धमिलो र फोहोरलाई महासागरले फिल्टर गरेर सफा बनाउछ ।’

प्रवासी नेपाली मञ्च (ओएनएफ)र गैर आवासीय नेपाली संघ (एनआरएनए)का प्रतिनिधिहरुसँग बुधबार निजी निवास बालकोटमा भएको भेटमा ओलीले वाम आन्दोलनका विभिन्न पार्टीहरु एक हुँदा शक्ति केन्द्रहरुमा भूकम्प पैदा गरेको बताए । देश बनाउने एमालेको महाअभियानलाई साथ र सहयोग गर्न ओलीले विदेशमा रहेका नेपालीहरुलाई आग्रह गरे ।

एमाले नेता माधवकुमार नेपालले वाम तालमेलले देशी विदेशीहरु अतालिएको बताए । ‘वाम गठबन्धन देश भित्र भएकाहरुको मात्र हो,’ उनले भने, ‘गैर वामगठबन्धनमा विदेशीहरु पनि सहभागी छन् । त्यस कारण यसको नियत नै स्पष्ट छ ।’

प्रकाशित : आश्विन २५, २०७४ १६:४०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT