विजय जुलुसमा झडप, प्रहरीद्वारा हवाई फायर

पवन यादव

रौतहट — विजयी उम्मेदवारहरुले निकालेको विजय जुलुसको क्रममा रौतहटको २ वटा छुट्टाछुट्टै स्थानमा मधेसी गठबन्धन र कांग्रेसका कार्यकर्ताबीच आइतबार मध्यान्ह झडप भएको छ ।

निर्वाचन क्षेत्र नं २ को प्रदेश सभा (ख) मा विजयी भएका संघीय समाजवादी फोरमका उम्मेदवार रामकिशोर प्रसाद यादवको विजय जुलुस माथि कांग्रेसका कार्यकर्ताले राजपुर नगरपालिका-५ मा ढुंगामुढा गरेपछि झडप भएको थियो । 

झडपलाई नियन्त्रणमा लिन प्रहरीले ३ राउण्ड हवाई फायर र ८ राउण्ड बढी आश्रुग्यास प्रहार गरेको जिल्ला प्रहरी कार्यालय रौतहटका प्रहरी उपरीक्षक यज्ञविनोद पोखरेलले बताए ।

त्यस क्रममा घाइते भएका मानिसहरुको विवरण प्रहरीले उपलब्ध गराउन चाहेन । स्थानीय बासिन्दाका अनुसार झडपको क्रममा दुवै पक्षका आधा दर्जन बढी मानिस घाइते भएको स्थानीयले बताएका छन् ।

त्यस्तै नेपाली कांग्रेसको जितको खुशीमा पटका पड्काउने क्रममा इसनाथ नगरपालिका-८ मनसरीमा एक घरमा आगलागी भएपछि घरधनी र कांग्रेसी कार्यकर्ताबीच झडप भएको थियो ।

समयमै आगलागी नियन्त्रणमा लिइएपछि थप क्षति हुन नसकेको प्रहरीले जनायो । घटनाको खबर पाए लगत्तै पुगेको प्रहरी टोलीले दुवै पक्षलाई तितरवितर पारेर अवस्था साम्य पारेको सुरक्षा अधिकारीले बताएका छन् ।  

प्रकाशित : मंसिर २४, २०७४ १९:२२
प्रतिक्रिया
पठाउनुहोस्

सात बजेसम्मको मत परिणाममा एमाले ५० प्रतिशतभन्दा बढी स्थानमा विजयी

कान्तिपुर संवाददाता

काठमाडौं — आइतवार बेलुका ७ बजेसम्मको मत गणना अनुसार एमालेले प्रतिनिधिसभा र प्रदेशसभाको प्रत्यक्ष तर्फ एमालेले ५० प्रतिशत भन्दा बढी स्थानमा जित हात पारेको छ ।

प्रतिनिधिसभामा कुल ११२ स्थानको मत परिणाम आउँदा ६३ स्थानमा एमालेले जितेको छ । दोस्रो स्थानमा २४ सीट जितेर माओवादी केन्द्र रहेको छभने नेपाली कांग्रेसले १३ सीट जितेको छ । अन्य दलहरु तथा स्वतन्त्रले १२ सीट जितेको छ ।

त्यसैगरी अग्रतापनि एमालेले नै लिएको छ । एमालेले १६ स्थानमा अग्रता लिएको छ भने माओवादी केन्द्र र कांग्रेसले १०/१० स्थानमा अग्रता लिएको छ । अन्य दलहरुले १५ स्थानमा अग्रता लिएको छ ।

त्यसैगरी प्रदेशसभातर्फ २१४ क्षेत्रको परिणाम आउँदा ११४ क्षेत्रमा एमालेले जितेको छ । माओवादीले ५०, कांग्रेसले २८ र अन्य दलहरुले २२ प्रदेशसभामा जित हात पारेको छ ।

त्यस्तै प्रदेशसभा तर्फपनि एमालेले ३७ स्थानमा अग्रता लिएर सबैभन्दा अघि छ । माओवादी केन्द्रले २०, कांग्रेसले १५ र अन्य दलहरुले २४ स्थानमा अग्रता लिएको छ ।

प्रकाशित : मंसिर २४, २०७४ १९:१३
पूरा पढ्नुहोस्
प्रतिक्रिया
पठाउनुहोस्