उपत्यकाका १० स्थानमा लाइन लागेर मात्रै सार्वजनिक यातायात चढ्न पाउने व्यवस्था

महानगरीय ट्राफिकले स्काउट र स्वयंसेवक परिचालन गरी सो व्यवस्थालाई सहज बनाउने

काठमाडौं — महानगरीय ट्राफिक प्रहरी महाशाखाले आइतबारदेखि काठमाडौँ उपत्यकाका १० स्थानमा लाम लागेर सवारी चढ्ने व्यवस्थाको थालनी गरेको छ । उपत्यकाको सबैभन्दा बढी यात्रुको चाप हुने एनएसी, रत्नपार्क, भृकुटीमण्डप, सामाखुशी, बानेश्वर, कोटेश्वर, कुपण्डोल, जडीबुटी र चाबहिलमा अब यात्रुले सार्वजनिक यातायात चढ्न लाइन लाग्नु पर्ने छ।

सार्वजनिक सवारी साधनमा चढ्दा बलिया व्यक्ति जबर्जस्ती चढेर सिटमा बस्ने र बालबालिका, वृद्ध, अशक्त, महिला र सुत्केरीले सिट नपाएपछि महानगरीय ट्राफिक प्रहरी महाशाखाले लाम बसेर सवारी चढ्ने व्यवस्था मिलाएको हो ।

महाशाखाका अनुसार लाम बसेर सवारी चढ्दा जो पहिले आएको हो त्यसले पहिलो प्राथमिकता पाउनेछ । अघिल्लो सार्वजनिक यातायातमा चढ्न नपाएका यात्रु लगत्तै पछिल्लोमा जान पाउनेछन् । धेरै यात्रु सवारीमा हुने दैनिक धकेलाधकेलका कारण हिँडेर भए पनि गन्तव्यस्थलमा जान बाध्य छन् । केही महिना अगाडि मात्र काठमाडौँ खरीबोट–वनस्थली हुँदै रत्नपार्क चल्ने सवारी साधनले यात्रुलाई लाममा बसेर सवारी चढ्ने व्यवस्था मिलाएको थियो । उक्त कार्यक्रम अहिले पनि सञ्चालनमै छ ।

महाशाखाका प्रमुख डिआईजी सर्वेन्द्र खनाल यात्रुले सवारी चढ्दा भोग्नुपरेको दुःखकष्टमा कमी ल्याउन महाशाखाले यस्तो अभियान सञ्चालन गरेको जानकारी दिए। 'यात्रु दुःख पाएर सवारीमा जानुभन्दा एकछिन संयम भएर सवारीमा सुरक्षित गन्तव्यस्थलसम्म पुग्नका लागि हामीले यो कार्यक्रम चलाएका हौँ,' उनले भने।

महाशाखाले यो अभियान एक हप्तासम्म प्रत्येक दिन बिहान–बेलुका सवारी साधन भिड हुने कार्यालय समयमा सञ्चालन गर्ने छ। सुरुको समयमा अभियान सञ्चालनमा केही समस्या परे पनि विस्तारै बानी पर्दै जाने महाशाखाले विश्वास लिएको छ । मर्यादित र व्यवस्थित ट्राफिक होस् भन्ने चाहना महाशाखाको रहेको डिआईजी खनालको भनाइ छ।

सो अभियानलाई सहयोग पुर्‍याउन महाशाखाले स्काउट र स्वयंसेवकसमेत परिचालन गर्नेछ। नयाँ सडकको प्रवेशद्वार एनएसीबाट मात्र काठमाडौं उपत्यकाका ८६ स्थानमा जाने सवारी पाइन्छ । उक्त स्थानमा अभियान सञ्चालन गरे धेरै ठाउँमा सहयोग पुग्ने विश्वास महाशाखाको छ ।

बूढानीलकण्ठ–एनएसी मार्गका माइक्रोबस चालक विवेक तामाङ लाम बस्ने व्यवस्थाले आफूहरुलाई मानिस उकाल्न तथा ओराल्न सहज हुने बताए । 'मानिस ओर्लन पाएको छैन यात्रुलाई चढ्न हतार हुँदा मानिस ठेलमठेल गर्न पुग्छन्, कोही त घाइते पनि हुन्छन्,' उनले भने।

यस्तै एनएसी–गोँगबु मार्गका माइक्रोबस चालक रुद्र खड्का लाम बसेर चढ्ने बानी बसाल्दा सवारी चालक तथा सहचालकलाई काम गर्न सहज हुने बताए। 'मानिस एक मिनेट भए पनि चाँडो गन्तव्यस्थलमा जान खोज्दा सवारी भीड हुने गर्छ,' उनले भने।

यस्तै एनएसीबाट बूढानीलकण्ठ जान लागेकी राधिका सापकोटा बस कहाँ पाइन्छ भन्नेबारे सूचनापाटी नराख्दा अन्योलमा परेको गुनासो गरिन् । 'लाइन त बस्ने भनियो, कुन रुटको गाडी कुन ठाउँमा पाइन्छ भन्नेबारे हामीले कसरी थाहा पाउनू?' उनको प्रश्न थियो। (रासस)

प्रकाशित : पुस २, २०७४ १४:०१
ADVERTISEMENT
प्रतिक्रिया
पठाउनुहोस्
ADVERTISEMENT

अन्तर्राष्ट्रिय बौद्धिक समुदायले नेपाललाई सहयोग गर्ने

कान्तिपुर संवाददाता

लण्डन — बेलायतको लिड्स विश्वविद्यालयका प्राडा सूर्यप्रसाद सुवेदीले एक विज्ञप्ति प्रकाशित गरी नेपालमा हालै सम्पन्न संसदीय निर्वाचन सफल भएकोमा सबै नेपाली जनता, निर्वाचन आयोग, नेपाल सरकार र सबै दलका नेताहरुलाई हार्दिक बधाई व्यक्त गरेका छन्।

'यो निर्वाचनले नेपालको लामो राजनीतिक तथा संवैधानिक संक्रमणकालको अन्त्य भएको र धेरै उतार-चढाव पछि लोकतन्त्रको नयाँ युग सुरु हुन लागेको छ,' विज्ञप्तिमा भनिएको छ । 

प्राडा सुवेदीले देशलाई राजनीतिक स्थिरता दिन, आर्थिक समृद्धीमा अगाडि बढाउन, लोकतन्त्र, विधिको शासन र मानवअधिकारलाई संस्थागत र सुदृढीकरण गर्न तथा अन्य चुनौतीहरुलाई सामना गर्न अन्तर्राष्ट्रिय क्षेत्रमा फैलिएको बौद्धिक समुदायलाई परिचालन गर्न आफू व्यक्तिगत र संस्थागत दुवै रुपमा क्रियाशिल हुने बताएका छन् ।

ब्रिटेन-नेपाल प्राज्ञिक फोरम फर नेपालका अध्यक्ष तथा अन्तर्राष्ट्रिय कानुन इन्स्टिच्युटका निर्वाचित सदस्य रहेका प्रा सुवेदीले नेपाल सरकारलाई नितान्त राष्ट्रियहितको सवालमा गैरदलीय, निष्पक्ष र सवतन्त्र रुपमा नीतिनिर्माणमा सहयोग गर्न आफू तत्पर रहेको पनि बताएका छन् । 

प्रकाशित : पुस २, २०७४ १२:३७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT